ອີງຕາມການລາຍງານຂ່າວຂອງສຳນັກຂ່າວຕ່າງປະເທດລາຍງານ ເມື່ອວັນທີ 4 ຕຸລາຜ່ານມານີ້ວ່າ ມີແມ່ຍິງຄົນອິນເດຍ ອາຍຸ 20 ປີ ຈາກເມືອງ ອັດເມີ ຢູ່ລັດຣາຊສະຖານ ໄດ້ເກີດລູກຝາແຝດຊາຍ ທີ່ມີພາວະຜິດປົກກະຕິຄື ມີ 2 ຫົວໃນຮ່າງດຽວ ແຕ່ກໍສະລົດໃຈ ເຖິງເດັກຈະມີໂອກາດລອດຊີວິດ ແຕ່ມາເສຍຊີວິດລົງ ໃນໄລຍະເວລາ 32 ຊົ່ວໂມງ ເພາະຜູ້ເປັນພໍ່ແມ່ ຂອງເດັກນ້ອຍຢືນຢັນທີ່ຈະເອົາເດັກກັບບ້ານ ທັງໆທີ່ແພດເຕືອນແລ້ວວ່າ ສ່ຽງຫຼາຍ ແລະແນະນຳໃຫ້ຢູ່ໂຮງໝໍໄປກ່ອນ
ຫຼັງຈາກທີ່ເກີດອອກມາແລ້ວ ແພດໄດ້ເປີດເຜີຍວ່າ ເດັກນ້ອຍແຝດຄູ່ນີ້ ອາຍຸໃນການຖືພາສົມບູນ ມີນໍ້າໜັກ 2,5 ກິໂລ ສຸຂະພາບຮ່າງກາຍແຂງແຮງ ແຕ່ມີບັນຫາເລື່ອງການຫາຍໃຈ, ຄູ່ແຝດນີ້ມີອະໄວຍະວະຢູ່ພາຍໃນ 2 ຊຸດ ແຕ່ອະໄວຍະວະພາຍນອກ ແມ່ນມີແຕ່ຫົວທີ່ບໍ່ໃຊ້ຮ່ວມກັນ ສ່ວນອື່ນໆແມ່ນໃຊ້ຮ່ວມກັນ ຈຶ່ງບໍ່ສາມາດຜ່າຕັດແຍກອອກຈາກກັນໄດ້
ດັ່ງນັ້ນ ທາງແພດໝໍ ມີຄວາມເຫັນວ່າ ເດັກນ້ອຍແຝດຄູ່ນີ້ ຄວນຈະຕ້ອງຢູ່ພາຍໃຕ້ການດູແລຢ່າງໃກ້ຊິດ ຢູ່ໂຮງໝໍກ່ອນ ແຕ່ພໍ່ກັບແມ່ ບໍ່ເຊື່ອ ຕັດສິນໃຈພາລູກຊາຍກັບບ້ານ ເຮັດໃຫ້ເດັກນ້ອຍແຝດຄູ່ນີ້ ຕ້ອງເສຍຊີວິດລົງ ໂດຍຢູ່ໄດ້ພຽງແຕ່ 1 ມື້ ກັບ 8 ຊົ່ວໂມງເທົ່ານັ້ນ