ຂປລ. ໃນວັນທີ 7 ກັນຍາ 2016, ທ່ານ ພັນຄໍາ ວິພາວັນ ຮອງປະທານປະເທດ ແຫ່ງ ສປປ ລາວ ແລະ ທ່ານ ມາຄອມ ເທີນບູ ນາຍົກລັດຖະມົນຕີ ແຫ່ງປະເທດ ອົດສະຕາລີ ໄດ້ໃຫ້ກຽດເຂົ້າຮ່ວມພິທີເປີດນໍາໃຊ້ ຫ້ອງການສະຖາບັນ ລາວ-ອົດສະຕາລີ ແລະ ສູນສົ່ງເສີມພາສາຕ່າງປະເທດຄືນໃໝ່ ເຊິ່ງຕັ້ງຢູ່ບ້ານສີສະເກດ (ໜ້າຫໍພະແກ້ວ) ເມືອງຈັນທະບູລີ ນະຄອນຫລວງວຽງຈັນ, ພາຍຫລັງ ສໍາເລັດການບູລະນະສ້ອມແປງ ເມື່ອບໍ່ດົນມານີ້. ໂດຍໄດ້ຮັບທຶນຊ່ວຍເຫລືອ ຈາກລັດຖະບານອົດສະຕາລີ.
ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ກ່າວວ່າ: ໂຄງການບູລະນະຫ້ອງການດັ່ງກ່າວ ແມ່ນໄດ້ມີການປັບປຸງ ແລະ ສ້ອມແປງອາຄານເກົ່າແກ່ ໃຫ້ມີໃບໜ້າໃໝ່, ມີມາດຕະຖານ ແລະ ສອດຄ່ອງກັບການພັດທະນາ ໃນໄລຍະໃໝ່. ສູນແຫ່ງນີ້ ຈະມີບົດບາດສໍາຄັນ ໃນການພັດທະນາຊັບພະຍາກອນມະນຸດ ໃຫ້ແກ່ ສປປ ລາວ ໃນອະນາຄົດ ເພື່ອສ້າງຂີດຄວາມສາມາດໃຫ້ແກ່ພະນັກງານ ໃນລະດັບຜູ້ບໍລິຫານ ແລະ ລະດັບວິຊາການ ທີ່ຮັບຜິດຊອບດ້ານການວາງແຜນ ແລະ ການຄຸ້ມຄອງບໍລິຫານວຽກງານ ພັດທະນາຊັບພະຍາກອນມະນຸດ.
ຜ່ານມາໃນແຕ່ລະປີ ລັດຖະບານອົດສະຕາລີ ໄດ້ປະກອບສ່ວນຢ່າງຕັ້ງໜ້າ ເຂົ້າໃນການພັດທະນາ ຊັບພະຍາກອນມະນຸດແກ່ ສປປ ລາວ ໂດຍໄດ້ສະໜອງທຶນໃຫ້ນັກສຶກສາ, ຄູ-ອາຈານ ແລະ ພະນັກງານ ໄປຮຽນຕໍ່ທີ່ປະເທດອົດສະຕາລີ ໃນຫລາຍສາຂາວິຊາ ເພື່ອປະກອບສ່ວນພັດທະນາ ສປປ ລາວ. ຕະຫລອດໄລຍະກວ່າ 50 ປີຜ່ານມາ ມີອະດີດນັກສຶກສາຂອງລາວຫລາຍກວ່າ 1.200 ຄົນ ທີ່ສໍາເລັດການສຶກສາ ຈາກປະເທດອົດສະຕາລີ, ປັດຈຸບັນ ອະດີດນັກສຶກສາດັ່ງກ່າວ ສ່ວນໃຫຍ່ເປັນພະນັກງານອາວຸໂສ ທີ່ເຮັດວຽກສັງກັດຢູ່ພາກລັດ, ສ່ວນຫລາຍເຮັດວຽກໃນຂະແໜງຄົ້ນຄວ້າ ແລະ ສິດສອນ, ອີກຈໍານວນໜຶ່ງ ກໍໄດ້ກາຍເປັນຜູ້ປະກອບການ ແລະ ນັກທຸລະກິດ ທີ່ປະສົບຜົນສໍາລັດ.
ໃນໂອກາດດຽວກັນ, ທ່ານນາຍົກລັດຖະມົນຕີອົດສະຕາລີ ກໍໄດ້ເປັນກຽດມອບທຶນການສຶກສາ ທີ່ຈະໄປຮຽນຕໍ່ຢູ່ປະເທດອົດສະຕາລີ ຈໍານວນ 31 ທຶນ ໃນລະດັບປະລິນຍາເອກ 4 ທຶນ, ປະລິນຍາໂທ 25 ທຶນ ແລະ ຊັ້ນສູງ 2 ທຶນ ໃນສາຂາວິສະວະກອນໄຟຟ້າແບບຍືນຍົງ, ການພັດທະນາຊຸມຊົນ, ການບັນຊີ, ເສດຖະສາດ, ວິທະຍາສາດສັງຄົມ ແລະ ອື່ນໆ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!