ງານບຸນມະໂຫລານກາເຟລາວ ຄັ້ງທີ I ຈະຈັດຂຶ້ນໃນລະຫວ່າງວັນທີ 24-26 ຕຸລາ 2014 ທີ່ຈະມາເຖິງນີ້
ທີ່ແຂວງຈຳປາສັກ ເຊິ່ງສະມາຄົມກາເຟລາວໄດ້ຈັດງານຖະແຫລງຂ່າວຕໍ່ສື່ມວນຊົນ ກ່ຽວກັບການ
ຈັດງານດັ່ງກ່າວ ໃນວັນທີ 11 ກໍລະກົດ 2014 ທີ່ຮ້ານສີໜຸກກາເຟ ນະຄອນຫລວງວຽງຈັນ ໂດຍມີ
ທ່ານ ສີສະໜຸກ ສີສົມບັດ ປະທານສະມາຄົມກາເຟລາວ, ທ່ານ ສົມສະໜຸກ ມີໄຊ ຮອງປະທານສະມາ
ຄົມນັກຂ່າວ ແຫ່ງ ສປປ ລາວ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ສີສະໜຸກ ສີສົມບັດ ໃຫ້ຮູ້ວ່າ: ງານບຸນມະໂຫລານກາເຟລາວ ຄັ້ງທີ I ຈະຈັດຂຶ້ນທີ່ໂຮງແຮມ
ເອຣາວັນ ຣີເວີໄຊ ແລະ ໂຮງແຮມ ຈຳປາສັກ ແກຣນ ແຂວງຈຳປາສັກ ໃນລະຫວ່າງວັນທີ 24-26 ຕຸລາ
ທີ່ຈະມາເຖິງນີ້ ໂດຍແບ່ງອອກເປັນຫລາຍກິດຈະກຳເຊັ່ນ: ງານວາງສະແດງຜະລິດຕະພັນກາເຟ ຂອງ
ບັນດາສະມາຊິກສະມາຄົມກາເຟລາວ ແລະ ພາກສ່ວນປະກອບການອື່ນໆຈາກພາຍໃນ ແລະ ຕ່າງປະ
ເທດ; ທັດສະນະສຶກສາທ່ຽວຊົມແຫລ່ງກຳເນີດ ແລະ ການປຸງແຕ່ງກາເຟລາວ ທີ່ພູພຽງ ບໍລະເວນ ແລະ
ຈັດຊຸດສຳມະນາກ່ຽວກັບຄວາມເປັນມາຂອງກາເຟລາວ, ວິວັດທະນາການການຄ້າກາເຟໂລກ, ໂອກາດ
ແລະ ສິ່ງທ້າທາຍທຸລະກິດກາເຟຂອງກຸ່ມປະເທດອາຊຽນ ໂດຍວິທະຍາກອນຈາກພາຍໃນ ແລະ ຕ່າງປະເທດ.
ແຫຼ່ງຂ່າວ: ສຳນັກຂ່າວສານປະເທດລາວ