ການສຳຫລວດປະຈຳປີ 2013 ຂອງອົງການອະນາໄມໂລກໄດ້ແຈ້ງໃຫ້ຮູ້ກ່ຽວກັບການຊົມໃຊ້ຢາສູບຢູ່ ສປປ ລາວ ໄດ້ມີການເພີ່ມຂຶ້ນ
ແລະ ໄດ້ພົບວ່າມີຄົນເສຍຊີວິດຍ້ອນຢາສູບປະມານ 13 ຄົນ/ວັນ ຫລື ປະມານ 4.807 ຄົນ/ປີ, ຕາມການສຳຫລວດໃນປີ 2012
ຍັງພົບອີກວ່າ ຄົນລາວອາຍຸ ແຕ່ 15 ປີຂຶ້ນໄປສູບຢາເຖິງ 29,4%, ໃນນັ້ນ ຜູ້ຊາຍ 41,0% ແລະ ແມ່ຍິງ 8,1% ໃນຂະນະທີ່
ໄວໜຸ່ມທີ່ມີອາຍຸ ລະຫວ່າງ 13 – 15 ປີທັງເພດຍິງ ແລະ ຊາຍມີທ່າອ່ຽງໃນການສູບຢາເພີ່ມຂຶ້ນ.
ຜົນການສຳຫລວດຂອງອົງການອະນາໄມໂລກ ຍັງແຈ້ງໃຫ້ຮູ້ຕື່ມອີກວ່າ: ການສູບຢາມີຜົນຮ້າຍຢ່າງຫລວງຫລາຍຕໍ່ສຸຂະພາບເປັນຕົ້ນ
ແມ່ນ ກໍ່ໃຫ້ເກີດພະຍາດເສັ້ນເລືອດໃນສະໝອງແຕກ, ຫລອດປອດອັດຕັນຊ່ຳເຮື້ອ ແລະ ມະເຮັງປອດ. ເພື່ອເປັນການຫລຸດຜ່ອນອັດ
ຕາການຊົມໃຊ້ຢາສູບ, ອົງການອະນາໄມໂລກ ໄດ້ແນະນຳໃຫ້ປະເທດພາຄີຂອງສົນທິສົນຍາວ່າດ້ວຍການຄວບຄຸມຢາສູບ ຕ້ອງຈັດຕັ້ງ
ປະຕິບັດ 6 ນະໂຍບາຍ ພື້ນຖານທີ່ສາມາດຕອບໂຕ້ການລະບາດຂອງຢາສູບ ແລະ ຫລຸດຜ່ອນອັດຕາການເສຍຊີວິດລົງໄດ້ເຊັ່ນ:
- ຕິດຕາມການຊົມໃຊ້ຢາສູບ ແລະ ນະໂຍບາຍປ້ອງກັນຢ່າງມີປະສິດທິພາບ
- ປົກປ້ອງປະຊາຊົນຈາກການໄດ້ຮັບຄວັນຢາສູບມືສອງ
- ຊ່ວຍເຫລືອໃຫ້ຜູ້ສູບຢາອອກຢາສູບໃຫ້ໄດ້
- ເຕືອນປະຊາຊົນກ່ຽວກັບອັນຕະລາຍຂອງຢາສູບ ດ້ວຍການພິມຄຳເຕືອນດ້ານສຸຂະພາບໃສ່ຊອງຢາສູບ
- ບັງຄັບໃຊ້ການຫ້າມໂຄສະນາຢາສູບ, ຫ້າມການສົ່ງເສີມການຂາຍ ແລະ ການອຸປະຖຳ ຈາກບໍລິສັດຢາສູບ
- ຂຶ້ນອາກອນຢາສູບໃຫ້ສູງຂຶ້ນເລື້ອຍໆ.
ແຫຼ່ງຂ່າວ: ສຳນັກຂ່າວສານປະເທດລາວ