ບໍລິສັດ ດາວທຽມລາວເອເຊຍ-ປາຊີຟິກຈຳກັດ ຫຼື LAOSAT ກຳລັງເລັ່ງຫາຕະຫຼາດທັງພາຍໃນ ແລະ ຕ່າງປະເທດ, ຫຼ້າສຸດໄດ້ເຊັນສັນຍາເຊົ່າ 1 ຊ່ອງກັບປະເທດອິນໂດເນເຊຍ ແຕ່ຍັງຢູ່ໃນໄລຍະລໍຖ້າໄດ້ຮັບການອະນຸຍາດຈາກລັດຖະບານອິນໂດເນເຊຍ, ສ່ວນການບໍລິການຊ່ອງ ແລະ ສະຖານີ (VSAT) ໄດ້ມີການຕິດຕັ້ງເພື່ອທົດລອງຢູ່ຫຼາຍກະຊວງ; ຂະນະທີ່ທ່ານລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານໄດ້ແນະນຳໃຫ້ບໍລິສັດກຳນົດຄາດຫມາຍສ້າງລາຍຮັບແຕ່ລະໄລຍະ ເນື່ອງຈາກວ່າ ດາວທຽມມີອາຍຸການນຳໃຊ້ຈຳກັດເພື່ອໃຫ້ລັດຖະບານສົ່ງເງິນກູ້ຢືມຄືນໃຫ້ພຽງພໍ.
ກອງປະຊຸມສະຫຼຸບ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2016 ຂອງບໍລິສັດດາວທຽມລາວເອເຊຍ-ປາຊີຟິກຫຼື LAOSAT ໄດ້ຈັດຂຶ້ນໃນວັນທີ 27 ກໍລະກົດຜ່ານມານີ້ ທີ່ສູນບັນຊາດາວທຽມພາກພື້ນດິນ (ຫຼັກ14) ຖະຫນົນທ່າເດື່ອ ເມືອງຫາດຊາຍຟອງ ນະຄອນຫຼວງວຽງຈັນ ໂດຍມີທ່ານ ທັນສະໄຫມ ກົມມະສິດ ລັດຖະມົນຕີກະຊວງໄປສະນີ ໂທລະຄົມ ແລະ ການສື່ສານ, ມີພາກສ່ວນກ່ຽວຂ້ອງເຂົ້າຮ່ວມ.
ຕາມບົດສະຫຼຸບຂອງບໍລິສັດ LAOSAT ໃຫ້ຮູ້ວ່າ: ບໍລິສັດໄດ້ຮັບການສຳປະທານຈາກລັດຖະບານ ເພື່ອດຳເນີນທຸລະກິດກຳນົດ 15 ປີ ຕາມອາຍຸການນຳໃຊ້ຂອງດາວທຽມ ເຊິ່ງປະກອບດ້ວຍ 3 ຂະແຫນງການຄື້: (1) ໃຫ້ເຊົ່າ ແລະ ບໍລິການຊ່ອງດາວທຽມ (Transponder) ໃຫ້ທັງພາຍໃນ ແລະ ຕ່າງປະເທດຄື້ນ KU-Band, ໂທລະພາບ 8 ຊ່ອງລວມ 432 ເມກາເຮີດ, ໃນນັ້ນໄວ້ໃຫ້ຕ່າງປະເທດເຊົ່າ 5 ຊ່ອງ ແລະ 3 ຊ່ອງໄວ້ຮັບໃຊ້ພາຍໃນ ແລະ ຄື້ນ C-Band 14 ຊ່ອງ 504 ເມກາເຮີດ ໄວ້ໃຫ້ຕ່າງປະເທດເຊົ່າ 10 ຊ່ອງ ແລະ 4 ຊ່ອງໄວ້ໃຊ້ພາຍໃນປະເທດ; (2) ບໍລິການດ້ານໂທລະພາບ Direct to home ຫຼື DTH ແມ່ນການບໍລິການຊ່ອງໂທລະພາບເຖິງເຮືອນໃນຂອບເຂດທົ່ວປະເທດ (3) ບໍລິການດ້ານອິນເຕີເນັດແບບບໍ່ມີສາຍດ້ວຍລະບົບ 4G-LTE.
ພາບ-ຂ່າວຈາກ: ເສດຖະກິດ-ການຄ້າ.