ໂດຍ: ປັອກ
ນັບເປັນເວລາຫຼາຍກວ່າ 20 ປີມາແລ້ວ ທີ່ປະເທດຍີ່ປຸ່ນຢຶດໝັ້ນ ແລະ ສືບຕໍ່ໃຫ້ການຊ່ວຍເຫຼືອໃນການພັດທະນາເສດຖະກິດສັງຄົມແກ່ ສປປ ລາວ, ທັງໃນຮູບການຊ່ວຍເຫຼືອລ້າ ແລະ ທຶນກູ້ຢືມ ຊຶ່ງຫຼ້າສຸດຕາມລາຍງານໃຫ້ຮູ້ວ່າຍີ່ປຸ່ນຍັງຕິດອັນດັບໜຶ່ງ ທີ່ໃຫ້ການຊ່ວຍເຫຼືອແກ່ລາວໃນຕະຫຼອດ 2 ທົດສະວັດ.
ອີງຕາມຂ່າວລາຍງານໃຫ້ຮູ້ວ່າ: ຕະຫຼອດໄລຍະຜ່ານມາລັດຖະບານຍີ່ປຸ່ນສືບຕໍ່ໃຫ້ການຊ່ວຍເຫຼືອ ເພື່ອການພັດທະນາເສດຖະກິດ-ສັງຄົມຂອງລາວໄປຄຽງຄູ່ກັບ ການສົ່ງເສີມສາຍພົວພັນລະຫວ່າງ 2 ປະເທດໃຫ້ນັບມື້ເຂັ້ມແຂງ ແລະ ປະເທດຍີ່ປຸ່ນເປັນປະເທດຜູ້ໃຫ້ທຶນ ຊ່ວຍເຫຼືອອັນດັບທີໜຶ່ງແກ່ ສປປ ລາວ ມາຫຼາຍກວ່າ 20 ປີແລ້ວ ໃນນີ້ ສະເພາະໃນສົກປີ 2013 ໄດ້ໃຫ້ການຊ່ວຍເຫຼືອເປັນເງິນກູ້ຢືມທັງໝົດ 15 ພັນລ້ານເຢນ, ທຶນຊ່ວຍເຫຼືອລ້າຈຳນວນ 6 ພັນລ້ານເຢັນ ແລະ ການຮ່ວມມືດ້ານເຕັກນິກວິຊາການປະມານ 34 ລ້ານເຢນ ຖືເປັນປະເທດທີ່ໃຫ້ການຊ່ວຍເຫຼືອທາງການ ເພື່ອການພັດທະນາທີ່ມີມູນຄ່າສູງສຸດ.
ພ້ອມດຽວກັນນັ້ນ ໃນເດືອນມິ ຖຸນາ 2014 ນີ້ ລັດຖະບານຍີ່ປຸ່ນ ກໍໄດ້ໃຫ້ທຶນຊ່ວຍເຫຼືອລ້ານອກໂຄງການ (Non Project Grant Aid) ໃຫ້ແກ່ ສປປ ລາວ ລວມມູນຄ່າ 800 ລ້ານເຢນ ຫຼື ປະ ມານ 7,7 ລ້ານໂດລາສະຫະລັດເທົ່າກັບ 61,6 ຕື້ກີບ, ເພື່ອແນໃສ່ສົ່ງເສີມຄວາມພະຍາຍາມຂອງລັດຖະບານລາວໃນການພັດທະນາ ເສດຖະກິດສັງຄົມ ຊຶ່ງຈະນຳທຶນດັ່ງກ່າວໃຊ້ເຂົ້າໃນການຈັດຊື້ສິນຄ້າຕ່າງໆທີ່ເປັນ ອັນຈຳເປັນຕໍ່ການພັດທະນາ, ເປັນການຊ່ວຍຫຼຸດຜ່ອນພາລະດ້ານງົບປະມານ ແລະ ດ້ານຄັງສຳຮອງເງິນຕາຕ່າງປະເທດ.
ທັງໝົດຂອງການຊ່ວຍເຫຼືອບໍ່ວ່າຈະເປັນທຶນຊ່ວຍເຫຼືອລ້າ ຫຼື ທຶນກູ້ຢືມທີ່ລັດຖະບານຍີ່ປຸ່ນໄດ້ໃຫ້ແກ່ລັດຖະບານລາວແມ່ນສຸມ ໃສ່ຈຸດປະສົງອັນດຽວກັນນັ້ນກໍຄືວຽກການພັດທະນາເສດຖະກິດ ສັງຄົມໃຫ້ສາມາດບັນລຸໄດ້ຕາມແຜນການທີ່ວາງໄວ້ພັດທະນາພື້ນຖານ ໂຄງ ລ່າງເພີ່ມຄວາມສະດວກໃນລະບົບການຄົມມະນາຄົມຂົນສົ່ງ, ຊ່ວຍຍົກລະດັບດ້ານການສຶກສາ ແລະ ສາທາລະນະສຸກເຮັດໃຫ້ປະຊາຊົນລາວ ສາມາດເຂົ້າເຖິງການໃຊ້ບໍລິການໄດ້ຫຼາຍຂຶ້ນ.
ຕາມຂໍ້ມູນຍັງໃຫ້ຮູ້ອີກວ່າ: ໃນໄລຍະເດືອນມີນາຜ່ານມາລັດຖະບານຍີ່ປຸ່ນ ກໍໄດ້ໃຫ້ການຊ່ວຍເຫຼືອລ້າຈຳນວນທັງໝົດ 3 ໂຄງການສຳລັບໂຄງການພັດທະນາການຈັດການຂີ້ເຫຍື້ອທີ່ບໍ່ຍ່ອຍ ສະຫຼາຍໃນຕົວເມືອງທີ່ມີຄວາມຍືນຍົງທາງສິ່ງແວດລ້ອມ, ໂຄງການພັດທະນາ ອຸປະກອນ ແລະ ສິ່ງອຳນວຍຄວາມສະດວກໃນຂົງເຂດອຸຕຸນິຍົມ ແລະ ອຸທົກກະສາດ, ໂຄງການພັດທະນາສະພາບແວດລ້ອມໃນໂຮງຮຽນມັດທະຍົມຕອນຕົ້ນຢູ່ແຂວງ ພາກໃຕ້ລວມມູນຄ່າທັງໝົດ 3,03 ລ້ານເຢນ (ສະກຸນເງິນຍີ່ປຸ່ນ) ຄິດເປັນເງິນກີບລາວປະມານ 240 ຕື້ກວ່າກີບ.
ຂ່າວຈາກ: sedthakid.la