ໃນການດຳເນີນຊີວິດຂອງແຕ່ລະຄົນນັ້ນ ແນ່ນອນວ່າມີດີມີດ້ອຍສັບປ່ຽນກັນໄປ ບໍ່ມີໃຜດອກທີ່ຈະດີຕະຫລອດເວລາ. ໃນນັ້ນຄວາມຄຶດກໍເປັນສິ່ງທີ່ສຳຄັນຫລາຍທີ່ສຸດ ເພາະວ່າມັນເປັນຈຸດປ່ຽນແປງໃນຊີວິດຂອງເຮົາ ວ່າຊິດີຫລືຊິຮ້າຍ, ເມື່ອມີຄວາມຄຶດທາງດ້ານບວກ ກົງກັນຂ້າມມັນກໍມີລົບເຊັ່ນດຽວກັນ ດັ່ງນັ້ນ ມື້ນີ້ພວກເຮົາມາຮຽນຮູ້ວິທີປ້ອງກັນຄວາມຄິດທາງດ້ານລົບນຳກັນ ເຊິ່ງມີຢູ່ 10 ວິທີດັ່ງຕໍ່ໄປນີ້ :
- ບໍ່ໃຊ້ຄຳເວົ້າທາງດ້ານລົບ ເປັນຕົ້ນວ່າ : ໝົດຫວັງ, ມັນເປັນໄປບໍ່ໄດ້, ມັນບໍ່ດີ, ຊີວິດທຸກຈົນ… ແລ້ວປ່ຽນມາເປັນຄຳເວົ້າເຫລົ່ານີ້ແທນ ເຊັ່ນ “ແລ້ວຂ້ອຍຈະເຮັດໃຫ້ມັນດີ ຫລືດີຂຶ້ນກວ່າເກົ່າ”.
- ໃຫ້ອະໄພໂທດແກ່ຄົນອື່ນ ບໍ່ຄວນເອົາຄວາມໂກດເຫລົ່ານັ້ນ ມາຕັດສິນເຮັດໃຫ້ເກີດຄວາມແຕກແຍກ ເພາະວ່າການໃຫ້ອະໄພເຊິ່ງກັນແລະກັນ ມັນຈະເຮັດຄວາມຂຸ່ນເຄືອງ, ຄວາມໃຈຮ້າຍໝົດສ້ຽງໄປ.
- ຕ້ອງເຂົ້າໃຈວ່າໃນໂລກນີ້ຄົນຄຶດບໍ່ຄືກັນ ຄວາມແຕກຕ່າງຂອງແຕ່ລະຄົນນັ້ນ ຄືສິ່ງທີ່ທຳມະຊາດສ້າງມາ ບໍ່ສາມາດກຳຈັດມັນຖິ້ມໄດ້ ແລະຕ້ອງຍອມຮັບໃນສິ່ງທີ່ທຸກຄົນເປັນ.
- ມີອາລົມແຈ່ມໃສ, ຍິ້ມຫົວ ໃນການດຳລົງຊີວິດ ຈະເຮັດໃຫ້ຊີວິດບໍ່ເຄັ່ງຄຽດ ແລະເຮົາຈະມີຄວາມສຸກກັບການດຳລົງຊີວິດ.
- ມີຄວາມຮູ້ສຶກຮ່ວມກັບທຸກຄົນທີ່ຢູ່ອ້ອມຂ້າງ ຫລືທີມງານຂອງເຮົາ ເອົາໃຈເຂົາມາໃສ່ໃຈເຮົາ ສິ່ງຈະເຮັດໃຫ້ສິ່ງແວດລ້ອມໃນການຢູ່ຮ່ວມກັນດີຂຶ້ນ.
- ຫລີກເວັ້ນສິ່ງເຫລົ່ານີ້ຄື ຄວາມໂກດ, ຄວາມກຽດ ແລະອະຄະຕິຕ່າງໆ.
- ເມື່ອຄວາມໂກດ, ຄວາມກຽດ ແລະອະຄະຕິຕ່າງໆເກີດຂຶ້ນຢູ່ໃນຈິດໃຈແລ້ວ ຄວນຄວບຄຸມມັນໃຫ້ໄດ້ ບໍ່ໃຫ້ມັນມາທຳຮ້າຍຕົວເຮົາ ແລະຄົນອື່ນ.
- ຕ້ອງຮູ້ຈັກອາລົມທີ່ກົງກັນຂ້າມກັນ ແລະຊອກຫາວິທີປະຕິບັດດັ່ງຕໍ່ໄປນີ້ :
- ຄວາມປາຖະໜາ ຄວາມຢ້ານກົວ
- ຄວາມຮັກ ຄວາມກຽດຊັງ
- ຄວາມຝັກໄຝ່/ສະແຫວງຫາ ຄວາມໂລບ
- ຄວາມຫວັງ ຄວາມໝົດຫວັງ
………………………………………………………
- ຮູ້ຈັກປະຕິເສດໃນສິ່ງທີ່ຈະທຳຮ້າຍໂຕເຮົາ ບໍ່ວ່າຈະເປັນແນວຄຶດຈິດໃຈຂອງຕົນເອງ ຫລືວ່າແນວຄວາມຄຶດຂອງຄົນພາຍນອກ.
- ພະຍາຍາມຢູ່ໃກ້ ແລະຊຶມຊັບເອົາຄົນທີ່ມັກຄຶດບວກ, ເວົ້າບວກ ແລະເຮັດໃນສິ່ງທີ່ສ້າງສັນ.
ຂໍ້ມູນຈາກ : ປຶ້ມພິກຊີວິດສູ່ຄວາມສຳເລັດ