ຂ່າວ: ນິດຖະໜອມ
ເຂົ້າໄກ່ນ້ອຍທີ່ປູກໄດ້ໃນບໍ່ເທົ່າໃດແຂວງໃນລາວກຳລັງເປັນທີ່ ນິຍົມຂອງຜູ້ບໍລິໂພກນັບມື້ຫຼາຍຂຶ້ນລວມທັງໂຮງງານອຸດສາຫະກຳສິ່ງ ເຫຼົ່ານີ້ໄດ້ກາຍເປັນແຮງຈູງໃຈໃຫ້ກັບແຂວງທີ່ມີທ່າແຮງເກີດຄວາມ ກະຕືລືລົ້ນຢາກໝຸນໃຊ້ພື້ນທີ່ນາປູກເຂົ້າຊະນິດນີ້ເປັນ ສິນຄ້າເຊັ່ນດຽວກັບແຂວງຫົວພັນ ຊຶ່ງໄດ້ຈັດການຝຶກອົບຮົມໃຫ້ວິຊາການດ້ານກະສິກຳຈາກ 5 ເມືອງ ແນໃສ່ເສີມທັກສະຄວາມສາມາດໃຫ້ພະນັກງານທີ່ໄດ້ຜ່ານການຍົກ ລະດັບສາມາດນຳເອົາຄວາມຮູ້, ວິຊາການໄປຊ່ວຍປະຊາຊົນຜູ້ເຮັດຕົວຈິງໃຫ້ໄດ້ຜົນຜະລິດສູງ.
ຊຸດຝຶກອົບຮົມໃຫ້ພະນັກງານວິຊາການຈາກຫ້ອງການກະສິກຳ 5 ເມືອງປະກອບມີເມືອງຊຳເໜືອ, ວຽງໄຊ, ສົບເບົາ, ຫົວເມືອງ, ແລະ ເມືອງຮ້ຽມໄດ້ຈັດຂຶ້ນໃນວັນທີ 24 ມິຖຸນາ ປີ 2014 ນີ້ ພາຍໃຕ້ການຮ່ວມມືຂອງໂຄງການພັດທະນາຕ່ອງໂສ້ການຜະລິດແນວພັນ ແລະ ສຶກສາລັກສະນະແນວພັນເຂົ້າໄກ່ນ້ອຍສົມທົບກັບພະແນກກະສິກຳ ແລະ ປ່າໄມ້ແຂວງຫົວພັນ ຊຶ່ງມີນັກສຳມະນາກອນມາເຂົ້າຮ່ວມທັງໝົດ 15 ຄົນ.
ການຝຶກອົບຮົມໃນຄັ້ງນີ້ມີຈຸດປະສົງ ເພື່ອສ້າງເງື່ອນໄຂ ແລະ ຂະບວນການຂອງການຜະລິດແນວພັນເຂົ້າໄກ່ນ້ອຍໃຫ້ມີຄວາມບໍລິສຸດ, ຄຸນນະພາບເມັດພັນດີ ແລະ ໄດ້ມາດຖານຕາມລະບຽບການ ເພື່ອຕອບສະໜອງເມັດພັນທີ່ມີຄຸນນະພາບເພີ່ມມູນຄ່າການຜະລິດເຂົ້າ ໄກ່ນ້ອຍໃຫ້ຫຼາຍຂຶ້ນ.
ທັງນີ້ ກໍຍ້ອນວ່າຫົວພັນເປັນແຂວງທີ່ມີທ່າແຮງດ້ານການຜະລິດເຂົ້າໄກ່ ນ້ອຍ ມາຮອດປະຈຸບັນມີເນື້ອທີ່ນາປູກເຂົ້າທັງໝົດ 12.110 ເຮັກຕາ ໃນນັ້ນ ມີເນື້ອທີ່ນາສະເພາະປູກເຂົ້າໄກ່ນ້ອຍ 6.061 ເຮັກຕາ ສະມັດຖະພາບການຜະລິດໄດ້ທັງໝົດ 27.274 ໂຕນຕໍ່ປີ, ສະມັດຖະພາບສະເລ່ຍແມ່ນ 4,5 ໂຕນຕໍ່ເຮັກຕາ.
ໃນທົ່ວແຂວງຫົວພັນເມືອງທີ່ມີທ່າແຮງໃນການຜະລິດເຂົ້າໄກ່ນ້ອຍ ທີ່ສຸດແມ່ນຢູ່ເມືອງຊຳເໜືອ ແລະ ເມືອງວຽງໄຊຍ້ອນພູມອາກາດໜາວເຢັນເໝາະສົມກັບການປູກເຂົ້າໄກ່ນ້ອຍ ທີ່ມີຄຸນນະພາບ ແລະ ເອກະລັກຂອງເຂົ້າໄກ່ນ້ອຍຢ່າງແທ້ຈິ່ງ.
ຢ່າງໃດກໍຕາມອີງໃສ່ຄວາມຕ້ອງການຂອງຕະຫຼາດ ຊຶ່ງການນຳພັກລັດ ແຂວງຫົວພັນເຫັນວ່າການປູກເຂົ້າໄກ່ນ້ອຍຈະເປັນຫົນທາງໜຶ່ງທີ່ຊ່ວຍ ໃຫ້ຊາວກະສິກອນຫຼຸດພົ້ນອອກຄວາມທຸກຍາກ ແລະ ມີຢູ່ມີກິນ ໄດ້ຈິ່ງກຳນົດເອົາ 5 ເມືອງ ແລະ 41 ກຸ່ມບ້ານເປົ້າໝາຍເພື່ອເຮັດການທົດລອງປູກເຂົ້າໄກ່ນ້ອຍ ໂດຍໄດ້ແນວພັນມາທົດລອງໃນ 3 ກຸ່ມຄື: ເຂົ້າໄກ່ນ້ອຍແດງ, ເຂົ້າໄກ່ນ້ອຍລາຍ, ເຂົ້າໄກ່ນ້ອຍເຫຼືອງ. ທັງນີ້ ກໍເພື່ອເສີມສ້າງຄວາມເຂັ້ມແຂງ, ຄວາມສາມາດຂອງຄອບຄົວຊາວກະສິກອນທີ່ດຳເນີນການຜະລິດເມັດພັນ ເຂົ້າໃຫ້ເປັນທີ່ຍອມຮັບ, ເປັນທ່າແຮງຂອງແຂວງ, ຜະລິດເປັນສິນຄ້າ, ບໍລິໂພກ, ສົ່ງອອກຕ່າງແຂວງທົ່ວປະເທດເພື່ອແກ້ໄຂຊີວິດການເປັນຢູ່ຂອງຊາວ ກະສິກອນພາຍໃນແຂວງໃຫ້ມີການພັດທະນາດີຂຶ້ນເທື່ອລະກ້າວ.
ຂອບໃຈຂ່າວຈາກ: ໜັງສືພິມເສດຖະກິດ-ສັງຄົມ