ໃນວັນທີ 28 ກັນຍາ 2012 ກອງປະຊຸມ ໜ່ວຍປະຕິບັດງານ ຄັ້ງທີ 10 ວ່າດ້ວຍ ການເຂົ້າເປັນສະມາຊິກ WTO ຂອງ ສປປ ລາວ ໄດ້ໄຂຂຶ້ນຢ່າງເປັນທາງການ ຢູ່ ນະຄອນ ເຊີແນວ, ປະເທດ ສະວິດສ ພາຍໃຕ້ການເປັນປະທານຂອງ ທ່ານ ອີ້ ຊຽວຈຸນ ເອກອັກຄະລັດຖະທູດ ຜູ້ຕາງໜ້າຖາວອນ ຂອງ ສປ ຈີນ ປະຈໍາອົງການການຄ້າໂລກ. ເນື່ອງໃນ ກອງປະຊຸມຄັ້ງນີ້ ສປປ ລາວ ໄດ້ສໍາເລັດການເຈລະຈາ ເຂົ້າເປັນສະມາຊິກ ອົງການການຄ້າໂລກ (WTO) ພາຍຫລັງ ທີ່ ໄດ້ມີ ການກະກຽມ ນັບແຕ່ປີ 1997 ເປັນຕົ້ນມາ.
ໃນກອງປະຊຸມຄັ້ງນີ້ ຄະນະຜູ້ແທນຝ່າຍລາວແມ່ນນໍາໂດຍ ທ່ານ ດຣ. ນາມ ວິຍະເກດ ລັດຖະມົນຕີວ່າການ ກະຊວງອຸດສາຫະກໍາ ແລະ ການຄ້າ ພ້ອມດ້ວຍຄະນະທີ່ປະກອບດ້ວຍ ທ່ານນາງ ເຂັມມະນີ ພົນເສນາ ລັດຖະມົນຕີຊ່ວຍວ່າການ ກະຊວງອຸດສາຫະກໍາ ແລະ ການຄ້າ, ທ່ານ ສົມຈິດ ອິນທະມິດ, ລັດຖະມົນຕີຊ່ວຍວ່າການ ກະຊວງແຜນການ ແລະ ການລົງທຶນ, ທ່ານ ສັນຕິພາບ ພົມວິຫານ, ລັດຖະມົນຕີຊ່ວຍວ່າການ ກະຊວງການເງິນ ແລະ ຜູ້ຕາງໜ້າຈາກຫ້ອງວ່າການລັດຖະບານ, ກະຊວງອຸດສາຫະກໍາ ແລະ ການຄ້າ, ກະຊວງວິທະຍາສາດ ແລະ ເຕັກໂນໂລຊີ, ກະຊວງກະສິກໍາ ແລະ ປ່າໄມ້, ກະຊວງໄປສະນີ ແລະ ໂທລະຄົມມະນາຄົມ ແລະ ການສື່ສານ.
ທ່ານ ຢົງ ຈັນທະລັງສີ ເອກອັກຄະລັດຖະທູດ ຜູ້ຕາງໜ້າຖາວອນ ສປປ ລາວ ປະຈໍາອົງການ ສະຫະປະຊາຊາດ ທີ່ ນະຄອນ ເຊິແນວ ກໍ່ໄດ້ເຂົ້າຮ່ວມກອງປະຊຸມ ໃນຄັ້ງນີ້.
ກອງປະຊຸມຄັ້ງນີ້ ຈັດຂື້ນເພື່ອໃຫ້ ສະມາຊິກອົງການການຄ້າໂລກທັງໝົດ ພິຈາລະນາ ແລະຮັບຮອງເອົາຜົນຂອງການເຈລະຈາເຂົ້າເປັນສະມາຊິກຂອງ ສປປ ລາວ ໂດຍສະເພາະ ບົດລາຍງານຂອງໜ່ວຍປະຕິບັດງານ (Working Party Report) ຊຶ່ງໄດ້ອະທິບາຍກ່ຽວກັບລະບອບການຄ້າຕ່າງປະເທດ ແລະ ພັນທະທີ່ ສປປ ລາວ ຮັບເອົາເພື່ອຮັບປະກັນຄວາມສອດຄ່ອງກັບສັນຍາຂອງ ອຄລ. ພ້ອມນີ້ ກໍມີຕາຕະລາງຫຼຸດຜ່ອນອັດຕາພາສີ ແລະ ຕາຕະລາງພັນທະການເປີດຂະແໜງບໍລິການ ທີ່ ສປປ ລາວ ໄດ້ຕົກລົງ ກັບບາງສະມາຊິກ ທີ່ສົນໃຈ ເຈລະຈາເປີດຕະຫຼາດແບບສອງຝ່າຍນໍາ. ເຖິງຢ່າງໃດກໍຕາມ, ເພື່ອສໍາເລັດຂັ້ນຕອນການເຂົ້າເປັນສະມາຊິກ ອຄລ ໂດຍສົມບູນ, ເອກະສານເງື່ອນໄຂການເຂົ້າເປັນສະມາຊິກເຫຼົ່ານີ້ ຈະໄດ້ຍື່ນສະເໜີຕໍ່ສະພາໃຫຍ່ ຂອງ ອຄລ ທີ່ໄດ້ກໍານົດ ວ່າຈະຈັດກອງປະຊຸມຂັ້ນສູງ ຮັບຮອງເອົາ ເອກະສານເງື່ອນໄຂການເຂົ້າເປັນສະມາຊິກ ດັ່ງກ່າວ ຢ່າງເປັນທາງການ ພາຍໃນທ້າຍເດືອນຕຸລານີ້. ຖືວ່າ ສປປ ລາວ ສາມາດສະຫຼຸບ ການເຈລະຈາ ເຂົ້າເປັນສະມາຊິກ ກ່ອນທີ່ຈະມີການຈັດ ກອງປະຊຸມອາຊີເອີລົບຄັ້ງທີ 9 ທີ່ ສປປ ລາວເປັນເຈົ້າພາບຈັດ ພາຍໃນຕົ້ນເດືອນພະຈິກ 2012 ນີ້. ພາຍຫຼັງທີ່ເອກະສານເງື່ອນໄຂການເຂົ້າເປັນສະມາຊິກ ໄດ້ຖືກຮັບຮອງຢ່າງເປັນທາງການແລ້ວ, ລັດຖະບານ ສປປ ລາວ ຈະໄດ້ສະເໜີໃຫ້ສະພາແຫ່ງຊາດ ພິຈາລະນາໃຫ້ສັດຕະຍາບັນ ແລ້ວຈຶ່ງແຈ້ງການ ໃຫ້ ກອງເລຂາອົງການການຄ້າໂລກຊາບ. ຫຼັງຈາກນັ້ນ 30 ວັນ, ສປປ ລາວ ຈະໄດ້ເຂົ້າເປັນ ສະມາຊິກສົມບູນ ຂອງ ອົງການການຄ້າໂລກແບບອັດຕະໂນມັດ.
ທ່ານ ດຣ. ນາມ ວິຍະເກດ ໄດ້ມີຄໍາເຫັນຕໍ່ກອງປະຊຸມ ໂດຍມີບາງຕອນສໍາຄັນດັ່ງນີ້: “ປະຊາຊົນລາວ ໄດ້ມີຄວາມຫວັງຄອງຄອຍສູງຕໍ່ຜົນສໍາເລັດຂອງກອງປະຊຸມຄັ້ງນີ້. ຕະຫຼອດໄລຍະ 14 ປີຂອງການກະກຽມ, ສປປ ລາວ ໄດ້ມີການປັບປຸງ ແລະ ອອກລະບຽບກົດໝາຍຫຼາຍກວ່າ 90 ສະບັບເພື່ອໃຫ້ສອດຄ່ອງກັບສັນຍາ ຂອງ ອົງການການຄ້າໂລກ ພ້ອມກັບໃຫ້ຄໍາໝັ້ນສັນຍາໃນການເປີດຕະຫຼາດທັງດ້ານການຄ້າດ້ານສິນຄ້າ ແລະ ການຄ້າດ້ານການບໍລິການ“. ທ່ານລັດຖະມົນຕີຍັງກ່າວຕື່ມວ່າ ”ສປປ ລາວ ໄດ້ໝູນໃຊ້ຂັ້ນຕອນຂອງການເຈລະຈາເປັນແຮງຍູ້ດັນໃຫ້ແກ່ການປັບປຸງກົນໄກຄຸ້ມຄອງດ້ານການຄ້າ ແລະ ເສດຖະກິດຂອງຕົນ ໃຫ້ສອດຄ່ອງກັບລະບຽບການຂອງສາກົນ….ຂັ້ນຕອນການເຈລະຈາໄດ້ປູພື້ນຖານໃຫ້ແກ່ສປປ ລາວ ທີ່ຈະບັນລຸເປົ້າໝາຍຂອງການພັດທະນາ (MDG) ໃນປີ 2015 ແລະ ຫຼຸດພົ້ນອອກຈາກການເປັນປະເທດດ້ອຍພັດທະນາ ໃນປີ 2020”
ບັນດາປະເທດສະມາຊິກ ອຄລ ໂດຍສະເພາະ ກໍາປູເຈຍ (ຕາງໜ້າໃຫ້ກຸ່ມອາຊຽນ), ໄຮຕີ (ຕາງໜ້າ ກຸ່ມປະເທດດ້ອຍພັດທະນາ), ສປ ຈີນ, ຍີ່ປຸ່ນ, ສ.ເກົາຫຼີ, ສະຫະລັດອາເມລິກາ, ສະຫະພາບເອີຣົບ ແລະ ປະເທດອື່ນໆ ຕ່າງກໍໄດ້ກ່າວສະແດງຄວາມຍິນດີ ແລະ ສະໜັບສະໜູນໃຫ້ ສປປ ລາວ ໄດ້ເຂົ້າເປັນ ປະເທດສະມາຊິກ ແລະ ເກັບກ່ຽວຜົນປະໂຫຍດຈາກລະບົບການຄ້າຫຼາຍຝ່າຍ. ຜົນສໍາເລັດທາງດ້ານປະຫວັດສາດຄັ້ງນີ້ ແມ່ນໝາກຜົນແຫ່ງຄວາມພະຍາຍາມ ແລະເອົາໃຈໃສ່ຂອງພັກ ແລະລັດຖະບານລາວ ພ້ອມທັງໄດ້ຮັບ ການຮ່ວມມືຈາກບັນດາພາກລັດ, ເອກະຊົນ ແລະ ປະຊາຊົນລາວທຸກເຜົ່າ, ທຸກຊັ້ນຄົນ, ແລະ ພວກເຮົາ ຈະໄດ້ສືບຕໍ່ຮ່ວມມືກັນໃນການຈັດຕັ້ງປະຕິບັດບັນດາສິດ ແລະ ພັນທະຂອງຕົນໃນອົງການການຄ້າໂລກ ເພື່ອນໍາຜົນປະໂຫຍດສູງສຸດ ປະກອບສ່ວນເຂົ້າໃນການສ້າງສາ ແລະ ພັດທະນາ ສປປ ລາວ ໃຫ້ຫຼຸດພົ້ນອອກຈາກປະເທດດ້ອຍພັດທະນາໃນປີ 2020.
ທີ່ມາ:http://member.bailane.com/Blog/Detail/39488