ໃຜທີ່ເປັນຜູ້ຊາຍ ຖ້າຢາກມີອາຍຸຍືນຍາວ ເຄັດລັບສັ້ນໆນັ້ນກໍຄື ມາຊ່ວຍເມຍລ້ຽງລູກ.
ເລື່ອງມີຢູ່ວ່າ ທ່ານຈອນ ອອລແມນ ນັກວິໄຈຈາກສະຖາບັນເຕັກໂນໂລຊີ ແຫ່ງຄາລິຟໍເນຍ ພົບວ່າ ການລ້ຽງດູລູກຈະຊ່ວຍໃຫ້ເພດພໍ່ໃນກຸ່ມສັດຕະກູນລີງມີອາຍຸຍືນຍາວ.
“ສັດທີ່ມີການແບ່ງໜ້າທີ່ເບິ່ງແຍງລູກໃນຄອບຄົວເທົ່າໆກັນ ທັງໂຕຜູ້ແລະໂຕແມ່ຈະມີຊີວິດຍືນຍາວ” ທ່ານອອລແມນວ່າ
“ແຕ່ກໍບໍ່ໄດ້ໝາຍຄວາມວ່າ ຜູ້ເປັນພໍ່ຈະມີອາຍຸຍືນໄດ້ດ້ວຍການເບິ່ງແຍງລູກໃນທັນທີທັນໃດ”
ທ່ານອອລແມນ ແລະເພື່ອນຮ່ວມງານໄດ້ເຮັດການວິເຄາະເພດພໍ່ເພດແມ່ໃນກຸ່ມມະນຸດ ແລະສັດຕະກູນລີງອີກເກົ້າຊະນິດ ວ່າມີການແບ່ງໜ້າທີ່ໃນຄອບຄົວຢ່າງໃດ ຫລັງຈາກນັ້ນກໍນຳຂໍ້ມູນທີ່ໄດ້ມາປຽບ ທຽບຊ່ວງຊີວິດຂອງກຸ່ມໂຕຢ່າງທັງໝົດວ່າ ລະຫວ່າງເພດຜູ້ແລະເພດແມ່ ໃຜຊິມີອາຍຸຍືນຍາວກວ່າກັນ ໂດຍໃຊ້ຂໍ້ມູນຈາກສຳມະໂນປະຊາກອນຊາວສະວີເດັນ ຢ້ອນຫລັງໄປເຖິງປີ ຄ.ສ 1780 ແລະເຮັດການກວດສອບປະຫວັດຊີວິດຂອງສັດຕະກູນລີງເຖິງ 1,500 ໂຕໃນແຕ່ລະຊະນິດ.
“ຮູບແບບທີ່ເກີດຂຶ້ນນີ້ມີວິວັດທະນາການມາຍາວນານ ພວກເຂົາມີໂຄງສ້າງທາງສັງຄົມທີ່ແຕກຕ່າງກັນໄປຕາມເຜົ່າພັນ” ທ່ານອອລແມນກ່າວ
ຄະນະຂອງອອລແມນພົບວ່າ ກຸ່ມລີງທີ່ໂຕພໍ່ແລະໂຕແມ່ ຊ່ວຍກັນລ້ຽງລູກ ໂຕຜູ້ແລະໂຕແມ່ຈະມີອາຍຸສະເລ່ຍໃກ້ຄຽງກັນ ແຕ່ໃນກຸ່ມທີ່ລີງທີ່ໂຕພໍ່ບໍ່ຍອມລ້ຽງລູກ ປະເພດປະສົມພັນແລ້ວໆຖິ້ມ ປ່ອຍໃຫ້ໂຕແມ່ລ້ຽງລູກເອງ ພົບວ່າໂຕເມຍຈະມີອາຍຸຍືນຍາວກວ່າໂຕຜູ້ ຍົກໂຕຢ່າງເຊັ່ນກຸ່ມຂອງລີງຊິມແປນຊີ ເຊິ່ງໂຕຜູ້ແມ່ນບໍ່ມີບົດບາດໃນການລ້ຽງດູລູກພົບວ່າ ປະຊາກອນຂອງລີງຊິມແປນຊີ ທີ່ໂຕເຕັມທີ່ຈະເປັນໂຕແມ່ຫລາຍກວ່າໂຕຜູ້ເຖິງສາມເທົ່າ.
ສ່ວນກຸ່ມຂອງລີງກໍຣິລລາທີ່ອາໄສຢູ່ແຖວພູເຂົາ ຜູ້ເປັນພໍ່ຈະມີໜ້າທີ່ປົກປ້ອງ ແລະຫລິ້ນກັບລູກໆສະເໝີ ເຮົາຈະພົບວ່າປະຊາກອນລີງກໍຣິລລາທີ່ໂຕເຕັມທີ່ ຈະມີໂຕແມ່ຫລາຍກວ່າໂຕຜູ້ພຽງໜ້ອຍດຽວ.
ແຕ່ສຳລັບມະນຸດນັ້ນ ອອລແມນກ່າວວ່າ ຕາມສະຖິຕິຂອງຊາວສະວີເດັນຢ້ອນກັບໄປ 200 ປີ ມີແນວໂນ້ມວ່າ ເພດຍິງຈະມີອາຍຸຫລາຍກວ່າເພດຊາຍປະມານຮ້ອຍລະ 5-8. ກຸ່ມລີງນົກຫູກກັບກຸ່ມລີງຕິຕິ ເຊິ່ງຜູ້ເປັນພໍ່ຈະໃຊ້ເວລາອຸ້ມລູກລ້ຽງລູກຕັ້ງແຕ່ແຮກເກີດ ແລະຍັງຊ່ອຍໂຕແມ່ເບິ່ງແຍງລູກ ເວລາທີ່ລູກບໍ່ສະບາຍນັ້ນ ປາກົດວ່າລີງຕິຕິໂຕຜູ້ ມີແນວໂນ້ມວ່າຈະມີອາຍຸຫລາຍກວ່າໂຕແມ່ອີກ ສ່ວນກຸ່ມລີງນົກຫູກນັ້ນທັງໂຕຜູ້ ແລະໂຕແມ່ມີອາຍຸສະເລ່ຍໃກ້ຄຽງກັນ.
ສ່ວນກຸ່ມລີງມາໂມເສັດ ລີງຂະໜາດນ້ອຍທີ່ສຸດທີ່ອາໄສຢູ່ໃນທະວີບອາເມຣິກາໃຕ້ນັ້ນ ພົບວ່າບາງຄັ້ງມີໂຕຜູ້ສີ່ໂຕຊ່ອຍກັນລ້ຽງລູກລີງໂຕດຽວ. ບາງຄັ້ງລີງໂຕຜູ້ເຫລົ່ານີ້ ຍັງລັກລູກໆຂອງໂຕອື່ນມາລ້ຽງອີກດ້ວຍ.
ເມື່ອຮູ້ດັ່ງນີ້ແລ້ວ ພວກເຮົາທີ່ເປັນຜູ້ຊາຍທັງຫລາຍທີ່ມີຄອບຄົວແລ້ວ ຄວນຈະຫາເວລາໄປລ້ຽງເບິ່ງແຍງລູກໆຊ່ອຍເມຍ ເພື່ອຈະໄດ້ມີອາຍຸຍືນຍາວ ແລະເຮັດໃຫ້ຄອບຄົວມີຄວາມສຸກ.