ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງແນວລາວສ້າງຊາດໄດ້ໄຂຢ່າງເປັນທາງໃນວັນທີ 8-9 ມິຖຸນາ 2016 ນີ້ ໂດຍເປັນກຽດເຂົ້າຮ່ວມຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິ ຫານງານສູນກາງ ພັກປະຊາຊົນ ປະຕິວັດລາວ, ປະທານປະເທດແຫ່ງ ສປປ ລາວ, ມີບັນດາການນໍາພັກ-ລັດ, ອະດີດເລຂາທິການໃຫຍ່ ຄະນະບໍລິຫານງານສູນກາງພັກ, ອາດິດການນໍາອາວຸໂສ, ປະທານ-ຮອງປະທານສູນກາງແນວລາວ ສ້າງຊາດແຂວງ ພ້ອມດ້ວຍຜູ້ແທນພາຍໃນ ແລະ ຕ່າງປະເທດ 400 ກວ່າສະຫາຍ ໃນນັ້ນຜູ້ແທນສົມບູນ 280 ສະຫາຍ,ຍິງ 50 ກວ່າສະຫາຍທີ່ມາຈາກ 29 ຊົນເຜົ່າ.
ໃນໂອກາດໄຂກອງປະຊຸມດັ່ງກ່າວນີ້, ສະຫາຍ ພັນດວງຈິດ ວົງສາ ປະທານສູນກາງແນວລາວສ້າງຊາດ ກ່າວວ່າ ເພື່ອພ້ອມກັນທົບທວນຄືນຜົນຂອງ ການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ IX ຂອງແນວລາວສ້າງຊາດ,ສັງເກດຕິລາຄາບັນ ດາຈຸດດີ ແລະ ຈຸດອ່ອນຕົ້ນຕໍ,ຂໍ້ຄົງຄ້າງ,ສາເຫດ ແລະ ຖອດຖອນບາງບົດຮຽນສໍາຄັນ ພ້ອມທັງກໍານົດຄາດໝາຍສູ້ຊົນ, ທິດທາງວຽກງານ 5 ປີຕໍ່ໜ້າ, ວິໄສທັດຂອງແນວລາວສ້າງຊາດ ແລະ ແຜນງານຍຸດທະສາດການພັດທະນາຂອງ ອົງການແນວລາວສ້າງຊາດໃນໄຍລະ 10 ປີຕໍ່ໜ້າ(2016-2025). ນອກນັ້ນຍັງຈະໄດ້ຄົ້ນຄວ້າ ແລະ ຮັບຮອງເອົາບົດລາຍງານການເມືອງພາຍໃຕ້ຫົວຂໍ້:”ເພີ່ມທະວີຄວາມສາມັກຄີປອງດອງທົ່ວປວງຊົນລາວທັງຊາດ,ປຸກລະດົມທົ່ວສັງຄົມແຂ່ງຂັນຮັກຊາດ ແລະ ພັດທະນາເພື່ອຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ແຜນພັດທະນາເສດ ຖະກິດ-ສັງຄົມແຫ່ງຊາດ 5 ປີຄັ້ງທີ VIII, ສືບຕໍ່ບຸກທະລຸທັງ 4 ດ້ານເພື່ອຍົກສູງບົດບາດ ແລະ ຄຸນນະພາບການເຄື່ອນໄຫວ ຂອງແນວລາວສ້າງຊາດ”.
ປະຈຸບັນມີກໍາມະການແນວລາວສ້າງຊາດຂັ້ນສູນກາງ 161 ສະຫາຍ,ຍິງ 26 ສະຫາຍ,ຂັ້ນແຂວງ 1.300 ກວ່າສະຫາຍ, ຍິງ 160 ສະຫາຍ, ຂັ້ນເມືອງ 7.500 ກວ່າສະຫາຍ,ຍິງ 270 ກວ່າສະຫາຍ ແລະ ຂັ້ນບ້ານ 53 ພັນກວ່າສະຫາຍ,ຍິງ 6. 000 ກວ່າສະຫາຍ.
ຂ່າວຈາກ: ສຳນັກຂ່າວສານປະເທດລາວ