ເພື່ອສ້າງຄວາມເປັນທໍາແກ່ຜູ້ບໍລິໂພກ ກໍຄືເພື່ອຮັກສາພາບພົດ ແລະ ກຽດສັກສີໃນຖານະອົງການລັດ ເຊິ່ງເປັນຜູ້ມອບ ແລະ ປະກາດນໍາໃຊ້ການໝາຍ ນຶ່ງເມືອງ ນຶ່ງຜະລິດຕະພັນແຫ່ງຊາດ ຫຼື ໂອດ໊ອບ ຮວມເຖິງຄວາມຮັບຜິດຊອບຂອງຜູ້ຜະລິດ-ທຸລະກິດທີ່ໄດ້ຮັບກາໝາຍ ໃຫ້ຮັກສາໄດ້ຄວາມຍືນຍົງ ແລະ ຮັບປະກັນດ້ານຄຸນະພາບຕະຫຼອດໄປ ທັງນີ້ ທ່ານ ສົມຫວັງ ນິນທະວົງ ຫົວໜ້າກົມສົ່ງເສີມ ແລະ ພັດທະນາສິນຄ້າ ກະຊວງອຸດສາຫະກໍາ ແລະ ການຄ້າ ໄດ້ເປີດເຜີຍວ່າ ຈະມີການກວດກາຄືນບັນດາຫົວໜ່ວຍການຜະລິດ-ທຸລະກິດທີ່ໄດ້ຮັບກາໝາຍໂອດ໊ອບໄປແລ້ວນັ້ນ ເພື່ອສ້າງຄວາມເຊື່ອໝັ້ນ ແລະ ສ້າງໂອກາດໃຫ້ແກ່ການເຂົ້າເຖິງຕະຫຼາດແບບຍືນຍົງຂອງຜູ້ຜະລິດເປັນສິນຄ້າ.
ຖືເປັນນຶ່ງມາດຕະການໃນການຢັ້ງຢືນເຖິງຄຸນະພາບ ແລະ ມາດຕະຖານຂອງການຜະລິດ ນັ້ນກໍຄື ພິທີປະກາດການນໍາໃຊ້ກາໝາຍ ນຶ່ງເມືອງ ນຶ່ງຜະລິດຕະພັນແຫ່ງຊາດ ຫຼື ໂອດ໊ອບ (ODOP) ເຊິ່ງແມ່ນການປະກາດການນໍາໃຊ້ກາໝາຍໂອດ໊ອບແຫ່ງຊາດໃຫ້ແກ່ຜະລິດຕະພັນທີ່ດີເດັ່ນຂອງເມືອງ ໂດຍກົມສົ່ງເສີມ ແລະ ພັດທະນາສິນຄ້າ ເຊິ່ງເປັນໜ່ວຍງານທີ່ມີບົດບາດຕັດສິນ ພ້ອມທັງໃຫ້ການສະໜັບສະໜູນ ແລະ ພັດທະນາຜະລິດຕະພັນໂດຍຜ່ານການຕິດຕາມກວດກາຫຼາຍຄັ້ງຈາກຂະແໜງການຕ່າງໆທີ່ກ່ຽວຂ້ອງ ກ່ອນຈະມີການມອບ-ຮັບ ກາໝາຍໂອດ໊ອບ ເຊິ່ງສັງຮວມໃນທົ່ວປະເທດມາຮອດປັດຈຸບັນນີ້ສາມາດອອກອະນຸຍາດນໍາໃຊ້ກາໝາຍ ODOP ໄດ້ທັງໝົດ 103 ຫົວ ໜ່ວຍຜູ້ຜະລິດ 377 ຜະລິດຕະພັນ ເຊິ່ງນອນຢູ່ໃນ 99 ບ້ານ 55 ເມືອງ 14 ແຂວງ ໃນນັ້ນ ນະຄອນຫຼວງວຽງຈັນ ແມ່ນໄດ້ຮັບກາໝາຍຫຼາຍກວ່າໝູ່ເຖິງ 34 ຫົວໜ່ວຍ 164 ຜະລິດຕະພັນ.
ຢ່າງໃດກໍຕາມ ພາຍຫຼັງທີ່ໄດ້ຮັບກາໝາຍ ໂອດ໊ອບ ໄປແລ້ວກໍເຫັນວ່າ ມີບາງຫົວໜ່ວຍໄດ້ດໍາເນີນການຜະລິດແບບຖືເບົາ ອັນໄດ້ເຮັດໃຫ້ຄຸນະພາບສິນຄ້າບາງຜະລິດຕະພັນຫຼຸດຕໍ່າກວ່າເກນມາດຕະຖານໂອດ໊ອບ ນີ້ຄືຄວາມກັງວົນ ແລະ ເປັນຫວ່ງຢ່າງຍິ່ງຂອງທາງພາກລັດ ແລະ ເພື່ອເຮັດໃຫ້ການຈັດຕັ້ງປະຕິບັດວຽກງານໃນຂອບໂອດ໊ອບ ມີຄວາມຮັບປະກັນໄດ້ຊື່ສຽງ ສັກສີ ແລະ ຄວາມເປັນທໍາຕໍ່ຜູ້ບໍລິໂພກ ຈິ່ງຈະມີການລົງຕິດຕາກວດກາຢ່າງລຽນຕິດ ເພື່ອສ້າງຄວາມໝັ້ນໃຈໃຫ້ແກ່ສັງຄົມ ແລະ ເພື່ອເຮັດໃຫ້ຄຸນະພາບມາດຕະຖານ ມີລັກສະນະຍືນຍົງ ສົມສັກສີທີ່ມວນຊົນໄວ້ວາງໃຈ ທີ່ສໍາຄັນແມ່ນເພື່ອເຮັດໃຫ້ຊື່ສຽງສິນຄ້າລາວໄດ້ຮັບການຍອມຮັບໃນຕະຫຼາດພາຍໃນ ແລະ ພາກພື້ນຕະຫຼອໄປ ຈິ່ງເຫັນຄວນໃຫ້ມີຄວາມເຂັ້ມງວດກວດຂັນ ຕິດຕາມເປັນໄລຍະໆ ເພື່ອວ່າ ຖ້າມີບັນຫາ ຫຼື ມີປັດໄຈສ່ຽງດ້ານໃດກໍໃຫ້ພະແນກການທີ່ກ່ຽວຂ້ອງເຂົ້າໄປແກ້ໄຂ ຫຼື ໃຫ້ຄວາມຊ່ອຍເຫຼືອຢ່າງທັນເວລາ.
ໂດຍ: ເຜິ້ງຄໍາ