ກະຊວງສຶກສາທິການ ແລະ ກີລາ ອົງການຈັດຕັ້ງສາກົນ ຄູ່ຮ່ວມພັດທະນາ ແລະ ຂະແໜງການທີ່ກ່ຽວຂ້ອງ ໄດ້ຮ່ວມເວທີສົນທະນາປຶກສາຫາລືໃນກອງປະຊຸມລະດັບວິຊາການ ຂອງໜ່ວຍງານຂະແໜງການສຶກສາຂຶ້ນໃນຕອນເຊົ້າວັນທີ 27 ພຶດສະພາ 2016 ທີ່ໂຮງແຮມລ້ານຊ້າງ ນະຄອນຫຼວງວຽງຈັນ ໂດຍການເຂົ້າຮ່ວມເປັນປະທານຂອງທ່ານ ລີຕູ້ ບົວປ່າວ ຮອງລັດຖະມົນຕີກະຊວງສຶກສາທິການ ແລະ ກີລາ ທ່ານນາງ ເຄເມັນຊີ ໂອລິແພນ ເລຂາເອກ ຮັບຜິດຊອບວຽກງານການສຶກສາ ຈາກສະຖານທູດອົດສະຕຣາລີ ປະຈໍາ ສປປ.ລາວ ທ່ານ ໄບຣອັນ ຟຣໍນາຣີ ຫົວໜ້າດ້ານການຮ່ວມມືຈາກສະຫະພາບເອີຣົບ ປະຈໍາ ສປປ.ລາວ ມີຜູ້ຕາງໜ້າອົງການຈັດຕັ້ງສາກົນ ອົງການຈັດຕັ້ງທາງສັງຄົມ ກະຊວງ ສູນ ສະຖາບັນການສຶກສາ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ທ່ານຮອງລັດຖະມົນຕີກະຊວງສຶກສາທິການ ແລະ ກີລາ ໄດ້ກ່າວໃນທີ່ປະຊຸມວ່າ ໃນໄລຍະທີ່ຜ່ານມາ ລັດຖະບານອົດສະຕຣາລີ ສະຫະພາບເອີຣົບ ແລະ ບັນດາຄູ່ຮ່ວມພັດທະນາຕ່າງໆ ໄດ້ເຮັດວຽກຮ່ວມ ແລະ ໃຫ້ການສະໜັບສະໜູນຕໍ່ຂະແໜງການສຶກສາ-ກີລາ ຂອງກະຊວງສຶກສາທິການ ແລະ ກີລາ ໃນຫຼາຍດ້ານເຊັ່ນ ໃຫ້ທຶນສະໜັບສະໜູນທາງດ້ານຊ່ຽວຊານ ເພື່ອສ້າງຄວາມອາດສາມາດໃຫ້ແກ່ວຽກງານການຕິດຕາມປະເມີນຜົນ ແລະ ວຽກງານແຜນການ-ການເງິນ ໃຫ້ທຶນຮ່ວມເຮັດວຽກກັບພາກສ່ວນກ່ຽວຂ້ອງເພື່ອພັດທະນາວຽກງານໃນຂະແໜງການສຶກສາໃນການຈັດຕັ້ງປະຕິບັດຫຼາຍໂຄງການ ໂດຍສະເພາະແມ່ນສຸມໃສ່ພັດທະນາວຽກງານການສຶກສາຂັ້ນພື້ນຖານ ຫຼັງການສຶກສາຂັ້ນພື້ນຖານ ແລະ ວຽກງານອື່ນໆທີ່ປິ່ນອ້ອມ ເຊິ່ງສາມາດເວົ້າໄດ້ວ່າ ເປັນໂຄງການໂຕແບບທີ່ດີໃຫ້ແກ່ການພັດທະນາຂະແໜງການສຶກສາ ແລະ ສາມາດບັນລຸຜົນສໍາເລັດໃນການແກ້ໄຂຄວາມແຕກໂຕນດ້ານການເຂົ້າເຖິງການສຶກສາຂັ້ນພື້ນຖານ ໂດຍສະເພາະໃນບັນດາເມືອງທີ່ຢູ່ເຂດຊົນນະບົດ ຫ່າງໄກສອກຫຼີກ ແລະ ໂຕເມືອງກໍມີການພັດທະນາ ສາມາດຫຽັບເຂົ້າຫາກັນເທື່ອລະກ້າວ ເຊິ່ງເປັນການຊ່ອຍເຫຼືອທີ່ີມີປະໂຫຽດໃຫຽ່ຫຼວງ ປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາຂະແໜງການສຶກສາ ແລະ ກີລາ ຄັ້ງທີ VIII (2016-2020) ເພື່ອໃຫ້ບັນລຸຕາມແຜນການທີ່ວາງໄວ້.
ຂ່າວ/ພາບ: ເທບພະວົງ