ລະບາດຢ່າງໜັກພະຍາດໄຂ້ຍຸງຢູ່ຈຳປາສັກມີຜູ້ຕິດເຊື້ອຢູ່ທົ່ວແຂວງສະເລ່ຍ 10 ກໍລະນີຕໍ່ວັນທີ່ໜັກກວ່າໝູ່ ແມ່ນເມືອງສຸຂຸມາມີຜູ້ຕິດເຊື້ອຫຼາຍກວ່າ 200 ກໍລະນີ, ໃນຂະນະທີ່ມີຜູ້ເສຍຊີວິດແລ້ວ 5 ລາຍ, ດ້ານສາທາລະນະສຸກແຂວງໄດ້ເອົາໃຈໃສ່ຕ້ານ ແລະເຝົ້າລະວັງຢ່າງຈິງຈັງພ້ອມລະດົມໃຫ້ພໍ່ແມ່ປະຊາຊົນຊ່ວຍທຳລາຍແຫຼ່ງເພາະພັນຂອງຍຸງລາຍໄປພ້ອມກັນໃນທົ່ວແຂວງຈິ່ງຈະສາມາດຕ້ານການແຜ່ລະບາດຂອງພະຍາດດັ່ງກ່າວໄດ້ໃນເວລາສັ້ນໆ.
ທ່ານ ສົມກຽດ ວໍລະລາດ ຫົວໜ້າພະແນກສາທະລະນະສຸກແຂວງຈຳປາສັກ, ເປີດເຜີຍຕໍ່ນັກຂ່າວໜັງສືພິມເສດຖະກິດ-ສັງຄົມປະຈຳແຂວງເມື່ອວັນທີ 25 ພຶດສະພານີ້ຮູ້ວ່າ: ການແພ່ລະບາດຂອງພະຍາດດັ່ງກ່າວແມ່ນໄດ້ເລີ່ມມາແຕ່ຕົ້ນເດືອນກຸມພາ 2016 ທີ່ເມືອງສຸຂຸມາ, ໂດຍມີການແຈ້ງໃຫ້ຮູ້ເຖິງຈຳນວນຜູ້ຕິດເຊື້ອໄຂ້ຍຸງ ແຕ່ກໍ່ຍັງບໍ່ທັນຫຼາຍ, ແຕ່ຕົ້ນເດືອນເມສາ ເປັນຕົ້ນມາຈຳນວນຜູ້ຕິດເຊື້ອໄດ້ເພີ່ມ ຂຶ້ນເປັນຈຳນວນຫຼາຍ, ປະຈຸບັນໃນທົ່ວແຂວງມີຜູ້ຕິດເຊື້ອແລ້ວ 286 ກໍລະນີ, ໃນນັ້ນເມືອງສຸຂຸມາມີ 230 ກໍລະນີ ແລະ ຜູ້ເສຍຊີວິດຢູ່ເມືອງດັ່ງກ່າວ 3 ກໍລະນີ, ເມືອງໂຂງ ແລະເມືອງໂພນທອງເສຍຊີວິດເມືອງລະ 1 ກໍລະນີ, ຂະນະທີ່ປະຈຸບັນການແພ່ລະບາດຂອງພະຍາດດັ່ງກ່າວແມ່ນຍັງສືບຕໍ່ຢ່າງຮຸນແຮງສະເລ່ຍມີການແຈ້ງຈຳນວນຜູ້ຕິດເຊື້ອ 5-10 ຄົນຕໍ່ວັນ.
ຢ່າງໃດກໍຕາມ ຕໍ່ກັບເຫດການດັ່ງກ່າວອຳນາດການປົກຄອງແຂວງຈຳປາສັກກໍຄືພະແນກສາທາລະນະສຸກ ແຂວງໃນຜ່ານມາແມ່ນໄດ້ຈັດກອງປະຊຸມຫຼາຍຄັ້ງເພື່ອຈັດຕັ້ງຄະນະຄວບຄຸມຕ້ານ, ຄະນະຕິດຕາມຂັ້ນແຂວງ, ເມືອງແລະຂັ້ນບ້ານເພື່ອເຝົ້າລະວັງຢ່າງໃກ້ຊິດແລະເອົາຈິງເອົາຈັງຕໍ່ການແພ່ລະບາດຂອງພະຍາດດັ່ງກ່າວ, ພ້ອມດຽວກັນນີ້ຍັງໄດ້ລົງໂຄສະນາເຜີຍແຜ່ເຖີງຜົນຮ້າຍ, ລົງນຳພາປະຊາຊົນທຳລາຍແຫຼ່ງເພາະພັນຂອງຍຸງລາຍ, ທີ່ສຳຄັນແມ່ນໄດ້ມີຊ່ຽວຊານດ້ານການປີ່ນປົວພະຍາດດັ່ງກ່າວຈາກສູນກາງມາປະຈຳຢູ່ໂຮງໝໍ ແຂວງ ແລະໂຮງໝໍເມືອງ, ໂດຍສະເພາະແມ່ນເມືອງສຸຂຸມາທີ່ເປັນເມືອງແພ່ລະບາດໜັກຂອງພະຍາດດັ່ງກ່າວ.
ທ່ານ ສົມກຽດ ວໍລະລາດ ຍັງຝາກ ຮຽກຮ້ອງໃຫ້ພໍ່ແມ່ປະຊາຊົນທົ່ວແຂວງຈົ່ງພ້ອມກັນທຳລາຍແຫຼ່ງເພາະພັນ ຂອງຍຸງລາຍໄປພ້ອມໆກັນ, ໂດຍໃຫ້ເຮັດເປັນຂະບວນການທີ່ຕັ້ງໜ້າເພື່ອທຳລາຍແຫຼ່ງເພາະພັນດັ່ງກ່າວ, ຫາກເຮັດພຽງແຕ່ເເມືອງໃດເມືອງໜຶ່ງກໍບໍ່ສາມາດ ຢຸດການແພ່ລະບາດຂອງພະຍາດດັ່ງກ່າວໃນເວລາສັ້ນໄດ້.
ທີ່ມາ: 