ກອງປະຊຸມຄົບຄະນະບໍລິຫານງານພັກ ແຂວງໄຊຍະບູລີ ຄັ້ງທີ 4 ສະໄໝທີ VI ໄດ້ໄຂຂຶ້ນເມື່ອບໍ່ດົນຜ່ານມານີ້ ທີ່ ຫ້ອງວ່າການປົກຄອງ ແຂວງໄຊຍະບູລີ ໂດຍການເປັນປະທານຂອງ ທ່ານ ພົງສະຫວັນ ສິດທະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງໆໄຊຍະບູລີ, ເຂົ້າຮ່ວມກອງປະຊຸມໃນຄັ້ງນີ້ມີ ບັນດາຄະນະປະຈຳພັກແຂວງ, ກຳມະການພັກແຂວງ, ເລຂາພັກເມືອງ, ເລຂາຄະນະພັກຮາກຖານ, ຫົວໜ້າ- ຮອງຫົວໜ້າພະແນກການ, ກົມກອງ, ອົງການ ແລະ ລັດວິສາຫະກິດອ້ອມຂ້າງແຂວງ ເຂົ້າຮ່ວມ 100 ກວ່າທ່ານ.
ໃນວາລະດຳເນີນກອງປະຊຸມ ຜູ້ເຂົ້າຮ່ວມໄດ້ພ້ອມກັນສຸມສະຕິປັນຍາ ເຂົ້າໃນການຄົ້ນຄວ້າປະກອບຄຳຄິດ-ຄຳເຫັນ ຕີລາຄາສະພາບການຈັດຕັ້ງປະຕິບັດ ແຜນພັດທະນາເສດຖະກິດ – ສັງຄົມ 6 ເດືອນຕົ້ນປີ 2015-2016 ທິດ ທາງແຜນການສູ້ຊົນ 6 ເດືອນທ້າຍປີ ແລະ ແຜນເບື້ອງຕົ້ນສຳລັບສົກ 2016-2017, ແຜນງົບປະມານ 7 ເດືອນຕົ້ນປີ ຄາດຄະເນແຜນງົບປະມານ 5 ເດືອນທ້າຍປີ. ຄົ້ນຄວ້າວຽກງານຈຸດສຸມແຕ່ລະຂົງເຂດທີ່ກຳນົດໄວ້ ໃນແຜນປະຈຳປີ 2015-2016 ແລະ ວາງແຜນສູ້ຊົນປະຕິບັດ ໃຫ້ສຳເລັດໃນ 6 ເດືອນທ້າຍປີ.
ທ່ານ ບຸນລ້ວນ ຊົມສີຫາປັນຍາ ກຳມະການພັກແຂວງ ຫົວໜ້າພະແນກແຜນການ ແລະ ການລົງທຶນແຂວງ ໄດ້ໃຫ້ຮູ້ວ່າ: ໃນໄລຍະ 6 ເດືອນຜ່ານມາ ການພັດທະນາເສດຖະກິດ -ສັງຄົມຂອງແຂວງ ແມ່ນໄປຕາມທິດ ເຮັດໃຫ້ເສດຖະກິດ ສືບຕໍ່ຂະຫຍາຍຕົວໃນລະດັບທີ່ດີ, ຂະບວນການຜະລິດຂອງປະຊາຊົນ ໃນແຕ່ລະເມືອງ ຍັງເປັນຂະບວນການທີ່ກວ້າງຂວາງ, ບັນດາຂະແໜງການອຸດສາຫະກຳປຸງແຕ່ງ ການບໍລິການ ສືບຕໍ່ຂະຫຍາຍຕົວ ແລະ ມີຄຸນນະພາບດີຂຶ້ນ ຕາມກົນໄກຕະຫຼາດ ສະພາບການພາຍໃນແຂວງ ຍັງສືບຕໍ່ມີຄວາມສະຫງົບ, ສັງຄົມມີຄວາມເປັນລະບຽບຮຽບຮ້ອຍດີ. ການລົງກໍ່ສ້າງຮາກຖານການເມືອງ ຕາມທິດນຳສາມສ້າງ ຍັງສືບຕໍ່ເປັນ ຂະບວນຕໍ່ເນື່ອງ ຊຶ່ງສະແດງອອກລວມຍອດຜະລິດຕະພັນພາຍໃນ ສາມາດບັນລຸໄດ້ 4.080 ຕື້ກີບ ເທົ່າກັບ 53,57% ຂອງແຜນປີ. ການຜະລິດເຂົ້ານາປີ ແລະ ເຂົ້າໄຮ່ໄດ້ 183.779 ໂຕນ. ຄາດຄະເນຜົນຜະລິດເຂົ້ານາແຊງ ໄດ້ 15.800 ໂຕນ, ການສົ່ງອອກຜະລິດຕະພັນກະສິກຳສັດລ້ຽງ ແລະ ອື່ນໆ ມີມູນຄ່າ 9,42 ລ້ານໂດລາ, ການນຳເຂົ້າສິນຄ້າມີ 5,66 ລ້ານໂດລາ. ຈຳນວນນັກທ່ອງທ່ຽວ ເຂົ້າມາພາຍໃນແຂວງມີທັງໝົດ 38.447 ໂດລາ. ໄດ້ປະກາດສ້າງບ້ານພັດທະນາໄດ້ 5 ບ້ານ, ປັດຈຸບັນ ທົ່ວແຂວງມີບ້ານພັດທະນາ 234 ບ້ານ, ຄອບຄົວທຸກຍາກ ຍັງ 2,28%, ບ້ານທຸກຍາກຍັງ 3,35%. ດ້ານການສຶກສາອັດຕາການລອດເຫຼືອຂອງຊັ້ນປະຖົມ ບັນລຸໄດ້ 93,2% ຍັງເຫຼືອ 1,9%, ອັດຕາຄວາມສະເໝີພາບຊັ້ນ ມໍ ປາຍ ບັນລຸ 92% ຍັງເຫຼືອ 8%.
ທ່ານຍັງໄດ້ກ່າວຕື່ມວ່າ: ໃນ 6 ເດືອນທ້າຍປີ ໄຊຍະບູລີ ຕ້ອງສູ້ຊົນເຮັດໃຫ້ເສດຖະກິດ ຂະຫຍາຍຕົວໃນລະດັບ 9% ຂຶ້ນໄປ ສ້າງມູນຄ່າເພີ່ມພາຍໃນປີ ໃຫ້ໄດ້ 7.900 ຕື້ກີບ ສະເລ່ຍໃສ່ຫົວຄົນໜຶ່ງໃຫ້ໄດ້ 214.000 ໂຕນ. ຜະລິດພືດ ສິນຄ້າໃຫ້ໄດ້ 768.500 ໂຕນ, ພືດສະບຽງອາຫານໃຫ້ໄດ້ 95.000 ໂຕນ, ອັດຕາການຂະຫຍາຍຕົວຂອງສັດ ບໍ່ໃຫ້ ຫຼຸຸດ 5%ຕໍ່ປີ. ສ້າງສວນອະນຸລັກຊ້າງ ເພື່ອຮອງຮັບນັກທ່ອງທ່ຽວ ໃຫ້ໄດ້ຫຼາຍກວ່າ 200 ຄົນຕໍ່ເດືອນ. ມູນຄ່າການສົ່ງອອກສິນຄ້າ ໃຫ້ບັນລຸ 67,68 ລ້ານໂດລາ, ມູນຄ່າການນຳເຂົ້າໃຫ້ບັນລຸ 46,38 ໂດລາ. ປະຕິບັດ ສູ້ຊົນໃຫ້ອັດຕາຄວາມທຸກຍາກ ຫຼຸຸດລົງຍັງເຫຼືອ 2% ຂອງຄອບຄົວທັງໝົດທົ່ວແຂວງ ບ້ານທຸກຍາກໃຫ້ຍັງເຫຼືອ 3% ຂອງບ້ານທັງໝົດ. ຈັດສັນພູມລຳເນົາ ສ້າງບ້ານໃຫຍ່ໃຫ້ເປັນຕົວເມືອງນ້ອຍ ໃຫ້ໄດ້ 6 ຈຸດຂຶ້ນໄປ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!