ສະພາແຫ່ງຊາດ ຫາລືຫລາຍບັນຫາສຳຄັນ ປະຈຳເດືອນພຶດສະພາໂດຍສະເພາະບັນຫາອາກອນຊ້ຳຊ້ອນ ແລະ ການສະກັດກັ້ນການຫລົບຫລີກການເສຍອາກອນລາຍໄດ້

ກອງປະຊຸມຄະນະປະຈຳສະພາແຫ່ງຊາດ ປະຈຳເດືອນພຶດສະພາ 2016 ໄດ້ຈັດຂຶ້ນ ໃນວັນທີ 24 ພຶດສະພາ ນີ້, ເພື່ອປຶກສາຫາລື ແລະ ພິຈາລະນາຫລາຍບັນຫາສຳຄັນ ໂດຍມີທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ແລະ ບັນດາຄະນະປະຈຳສະພາແຫ່ງຊາດ ເຂົ້າຮ່ວມ.

ກອງປະຊຸມດັ່ງກ່າວ, ໄດ້ປຶກສາຫາລື ແລະ ພິຈາລະນາ ຫລາຍບັນຫາທີ່ສຳຄັນ ເປັນຕົ້ນ ພິຈາລະນາຮ່າງບົດສະຫລຸບຕີລາຄາຜົນສຳເລັດກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ VIII, ພິຈາລະນາໃຫ້ສັດຕະຍາບັນແກ່ສັນຍາວ່າດ້ວຍ ການຫລີກເວັ້ນການເກັບອາກອນແບບຊ້ຳຊ້ອນ ແລະ ການສະກັດກັ້ນການຫລົບຫລີກການເສຍອາກອນລາຍໄດ້ ລະຫວ່າງລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສິງກະໂປ, ພິຈາລະນາໃຫ້ສັດຕະຍາບັນອະນຸສັນຍາ ເພີ່ມເຕີມຂອງກົດບັດອາຊຽນກ່ຽວກັບຂໍ້ຂັດແຍ່ງ, ພິຈາລະນາຫົວຂໍ້ເນື້ອໃນກອງປະຊຸມຄະນະປະສານງານ ສະມັດຊາລັດຖະສະພາລະຫວ່າງຊາດອາຊຽນ (AIPA), ພິຈາລະນາການແຕ່ງຕັ້ງຄະນະມິດຕະພາບ ສະມາຊິກລັດຖະສະພາ ລະຫວ່າງ ສະພາແຫ່ງຊາດ ແຫ່ງ ສປປ ລາວ ກັບລັດຖະສະພາ ຕ່າງງປະເທດ, ພິຈາລະນາຮັບຮອງເອົາແຜນການສ້າງ ແລະ ປັບປຸງກົດໝາຍ ຂອງ ກອງປະຊຸມສະໄໝສາມັນເທື່ອທີ 1 ແລະ ແຜນປະຈຳປີ 2017 ຊຸດທີ VIII, ຮັບຮອງມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະປະຈຳສະພາແຫ່ງຊາດ, ພິຈາລະນາຮ່າງແຜນການຕິດຕາມກວດກາຂອງຄະນະປະຈຳສະພາແຫ່ງຊາດ, ພິຈາລະນາຍົກຍ້າຍບ່ອນປະຈຳການ ຂອງປະທານສານປະຊາຊົນເຂດ 1 ແຂວງຄຳມ່ວນ, ປຶກສາຫາລື ການບໍລິຫານລັດຜ່ານປະຕູດຽວ ແລະ ສະເໜີດັດແກ້, ບັນຈຸໂຄງການຫລຸດຜ່ອນຄວາມທຸກຍາກເຂົ້າໃນແຜນລົງທຶນ ສົກປີ 2015-2016, ຄົ້ນຄວ້າເນື້ອໃນທີ່ຈະນຳເຂົ້າພິຈາລະນາ ຢູ່ກອງປະຊຸມສະໄໝສາມັນເທື່ອທີ 1 ຂອງສະພາແຫ່ງຊາດ ຊຸດທີ VIII ແລະ ບັນຫາສຳຄັນອື່ນໆ

ຂ່າວຈາກ: ສຳນັກຂ່າວສານປະເທດລາວ