ໃນຕອນບ່າຍຂອງວັນທີ 19 ພຶດສະພາ 2016 ນີ້ ຢູ່ທີ່ກອງກວດກາປ່າໄມ້ແຂວງໄຊຍະບູລີ ຈັດພິທີທຳລາຍຊີ້ນສັດປ່າທີ່ເຈົ້າໜ້າທີ່ຍຶດມາໄດ້ຈາກແມ່ຄ້າຈຳນວນ 28,4 ກິໂລກຣາມ ໃຫ້ກຽດເຂົ້າຮ່ວມທຳລາຍຊີ້ນສັດປ່າໃນຄັ້ງນີ້ມີທ່ານ ພຸດທະຄອນ ລັກຊີວີ ຮອງຫົວໜ້າກອງກວດກາປ່າໄມ້ແຂວງ ທ່ານ ສັງຄົມ ສີມູນ ຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງ ໄຊຍະບູລີ ພ້ອມດ້ວຍພະນັກງານວິຊາການກອງກວດກາເຂົ້າຮ່ວມ.

ທ່ານ ພຸດທະຄອນ ລັກຊີວີ ໄດ້ລາຍງານວ່າ ຊີ້ນສັດປ່າຈຳນວນດັ່ງກ່າວ ເຈົ້າໜ້າທີ່ກວດກາປ່າໄມ້ແຂວງ ໄດ້ສົມທົບກັບເຈົ້າໜ້າທີ່ກອງກວດກາປ່າໄມ້ເມືອງໄຊຍະບູລີ ພະນັກງານປະຈຳຢູ່ຕະຫຼາດບ້ານສີມຸງຄຸນ ເຊິ່ງພົບເຫັນປະຊາຊົນຈຳນວນ 3 ຄົນພວມນັ່ງຂາຍຊີ້ນສັດປ່າຢູ່ ສະນັ້ນ ເຈົ້າໜ້າທີ່ກວດກາປ່າໄມ້ຈິ່ງໄດ້ເຂົ້າກວດກາ ແລະ ຍຶດຊີ້ນສັດປ່າທີ່ວາງຂາຍໄດ້ທັງໝົດ 28,4 ກິໂລກາມ ຄິດເປັນເງິນມູນຄ່າ 2.000.000 ກວ່າກີບ ສັດປ່າທີ່ກວດກາ ແລະ ຍຶດໄດ້ໃນຄັ້ງນີ້ປະກອບມີ ແລນ ຈໍານວນ 4 ໂຕ ນໍ້າໜັກ 6,6 ກິໂລກຣາມ ຊີ້ນໝູດິບຈໍານວນ 12,5 ກິໂລກຣາມ ຊີ້ນເຫງັນດິບຈໍານວນ 2 ກິໂລກຣາມ ຊີ້ນນົກດິບຈໍານວນ 0,5 ກິໂລກຣາມ ແລະ ຊີ້ນໝູປ່າແຫ້ງຈໍານວນ 6,8 ກິໂລກຣາມ.

ຂ່າວ/ພາບ: ທອງຈັນ