ສຳນັກຂ່າວຊິນຫົວຂອງຈີນ ໄດ້ລາຍງານໃນວັນທີ 19 ພຶດສະພາຜ່ານມານີ້ວ່າ ເລຂາທິການໃຫຍ່ ພັກກອມມູນິດຈີນ ໄດ້ເນັ້ນຢ້ຳໃຫ້ຍຶດໝັ້ນລັດທິມາກ ເປັນໝາກຫົວໃຈສຳຄັນ ໃນການພັດທະນາຫລັກການຈັດຕັ້ງ ແລະ ການເຄື່ອນໄຫວຂອງພັກ ໃຫ້ມີຄວາມກ້າວໜ້າ ແລະ ພັດທະນາປະເທດຊາດ.

ທ່ານ ສີຈິ້ນຜິງ ເລຂາທິການໃຫຍ່ ພັກກອມມູນິດຈີນ ແລະ ປະທານປະເທດ ແຫ່ງ ສາທາລະນະລັດ ປະຊາຊົນຈີນ ໄດ້ກ່າວມີຄຳເຫັນ ຢູ່ກອງປະຊຸມສຳມະນາວິຊາການ ດ້ານປັດຊະຍາ ແລະ ສັງຄົມສາດ ທີ່ຈັດຂຶ້ນຢູ່ ນະຄອນຫລວງປັກກິ່ງ ໃນວັນອັງຄານທີ 17 ພຶດສະພາ 2016 ຜ່ານມານີ້ວ່າ ການພັດທະນາປະເທດຈີນ ໃຫ້ຈະເລີນກ້າວໜ້າຢ່າງວ່ອງໄວນັ້ນ ຈຳເປັນຕ້ອງອາໄສການປັບປຸງ ແລະ ປະດິດສ້າງສິ່ງໃໝ່ໆ ໃນດ້ານທິດສະດີ ແລະ ການພັດທະນາລັດທິມາກ ຢ່າງບໍ່ຢຸດຢັ້ງ ໂດຍທ່ານໄດ້ຮຽກຮ້ອງ ໃຫ້ນຳເອົາຄຸນລັກສະນະຂອງຊາວຈີນ ມາໝູນໃຊ້ຮ່ວມກັນ ກັບຫລັກການຂອງສັງຄົມນິຍົມ ພ້ອມທັງຮຽກຮ້ອງໃຫ້ນັກວິຊາການ ແລະ ນັກໂຄສະນາອົບຮົມຂອງພັກ ໃຫ້ຄວາມສຳຄັນ ໃນການນຳເອົາລັດທິມາກ ທີ່ພັກກອມມູນິດຈີນ ໄດ້ຍຶດໝັ້ນມາຕັ້ງແຕ່ດັ້ງເດີມ ເພື່ອໝູນໃຊ້ເຂົ້າໃນສະຖານະການຍຸກປັດຈຸບັນ ອັນເປັນການພັດທະນາ ລັດທິມາກສະໄໝໃໝ່ຂອງຈີນ ແລະ ລັດທິມາກແບບຈີນ ແຫ່ງສະຕະວັດທີ 21 ຊຶ່ງທ່ານໄດ້ຍົກໃຫ້ເຫັນວ່າ ລັດທິມາກ ແມ່ນສິ່ງທີ່ເປີດປະຕູ ແລະ ປູທາງໄປສູ່ຄວາມຈິງ.

ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!