ພິທີເປີດໂຮງງານຜະລິດຝຸ່ນຫີນກາວຄຸນນະພາບສູງຂອງບໍລິສັດຫວຽດ-ລາວ ຈຳກັດ ຫຼື ບໍລິສັດວິລາໂກ ໄດ້ຈັດຂຶ້ນໃນເຊົ້າວັນທີ 15 ພຶດສະພາ 2016 ນີ້ ທີ່ບ້ານບຶງຫົວນາ ເມືອງເຊບັ້ງໄຟ ເປັນກຽດເຂົ້າຮ່ວມມີ ທ່ານ ສົມໃຈ ເພັດສີນວນ ຮອງເຈົ້າແຂວງໆຄຳມ່ວນ, ທ່ານ ເຈິ່ນກົງທິ່ງ ກົງສູນໃຫຍ່ຫວຽດນາມປະຈຳແຂວງສະຫວັນນະເຂດ, ທ່ານ ເຈິ່ນ ຫິ່ວຈຸງ ປະທານສະພາບໍລິຫານສະຫະບໍລິສັດແຮ່ທາດ ແລະ ການຄ້າແຂວງຮ່າຕິ່ງ, ຕະຫຼອດຮອດພາກສ່ວນກ່ຽວຂ້ອງ, ແຂກຖືກເຊີນ, ນັກຂ່າວທ້ອງຖິ່ນແຂວງຄຳມ່ວນ ແລະ ແຂວງຮ່າຕິ່ງເຂົ້າຮ່ວມ.
ທ່ານ ເລເວດທາວ ຮອງອຳນວຍການໃຫຍ່ບໍລິສັດແຮ່ທາດ ແລະການຄ້າ ແຂວງຮ່າຕິງ ທັງເປັນອຳນວຍການບໍລິສັດຫວຽດ-ລາວ ຈຳກັດ ໄດ້ໃຫ້ຮູ້ໂດຍຫຍໍ້ກ່ຽວກັບໂຮງງານດັ່ງກ່າວ ແມ່ນເລີ່ມກໍ່ສ້າງມາແຕ່ເດືອນກຸມພາຫາວັນທີ 15 ພຶດສະພາ 2016 ໄດ້ສຳເລັດ ແລະເປີດນຳໃຊ້ຢ່າງເປັນທາງການດ້ວຍກຳລັງການຜະລິດ 20 ພັນໂຕນຕໍ່ປີ ລວມມູນຄ່າການລົງທຶນ 2,5 ລ້ານໂດລາສະຫະລັດ ຫຼື ປະມານ 20 ຕື້ກີບ.
ມາຮອດປະຈຸບັນໂຮງງານແມ່ນມີ 5 ປະເພດຜະລິດຕະພັນນຳເຂົ້າໃນການຜະລິດວັດສະດຸກໍ່ສ້າງ, ຜະລິດເຄື່ອງເຊລະມິກ, ຜະລິດຕະພັນລຽບຍິບຊຳ ແລະ ສຳລັບຜະລິດຕະພັນ ຝຸ່ນຫີນກາວຄຸນນະ ພາບສູງແມ່ນຈະໄດ້ສະໜອງໃຫ້ບັນດາຂະແໜງການຜະລິດແມ່ແບບເຄື່ອງເຊີ ລາມິກ.
ບໍລິສັດຫວຽດ-ລາວ ຈຳກັດແມ່ນບໍລິສັດລົງທຶນຂອງຕ່າງປະເທດ 100% ມີເນື້ອທີ່ສຳປະທານ ທັງໝົດ 700 ເຮັກຕາ, ເຄື່ອນໄຫວກິດຈະການໃນຂົງເຂດຂຸດຄົ້ນ ແລະປຸງແຕ່ງເຂົ້າສູ່ລວງເລິກຂອງບັນດາຜະລິດຕະພັນຈາກຫີນກາວທຳມະຊາດປຸງແຕ່ງກາຍເປັນຜະລິດຕະພັນສຳເລັດຮູບ (ແຜ່ນເພດານລາຍດອກ) ຊຶ່ງຜ່ານມາບໍລິສັດແມ່ນເປັນຫົວໜ່ວຍທຸລະກິດໜຶ່ງທີ່ລົງທຶນໃນຂົງເຂດຂຸດຄົ້ນຫີນກາວຢ່າງມີປະສິດທິຜົນພໍສົມຄວນ ແຕ່ລະປີໄດ້ປະກອບສ່ວນມອບພັນທະເຂົ້າງົບປະມານແຫ່ງລັດ, ພ້ອມນັ້ນທາງບໍລິສັດຍັງໄດ້ຊ່ວຍສ້າງວຽກເຮັດງານທຳໃຫ້ແກ່ພໍ່ແມ່ປະຊາຊົນພາຍໃນເຂດສຳປະທານເຊິ່ງສາມາດເວົ້າໄດ້ວ່າບໍລິສັດແມ່ນວິສາຫະກິດໜຶ່ງທີ່ນຳໜ້າໃນການດຳເນີນທຸລະກິດຕະຫຼອດເຖິງການປະຕິບັດພັນທະຕໍ່ລັດ-ຕໍ່ສັງຄົມ.
ທີ່ມາ: 