ແລງວັນທີ 12 ພຶດສະພາ 2016 ຄະນະກຳມະການແຫ່ງຊາດເພື່ອຄຸ້ມຄອງເສດຖະກິດພິເສດ ແລະ ເຂດເສດຖະກິດສະເພາະ (ຄຂພສ) ໄດ້ຈັດພິທີເຊັນສັນຍາ ວ່າດ້ວຍການພັດທະນາເຂດເສດຖະກິດວັງເຕົ່າ-ໂພນທອງ ແຂວງຈຳປາສັກ ໃຫ້ເປັນເຂດພັດທະນາພາຍໃຕ້ນະໂຍບາຍ ຂພສ ຢູ່ສປປ ລາວ ທີ່ຂຶ້ນກັບເຂດເສດຖະກິດພິເສດ ແຂວງຈຳປາສັກ ຂຶ້ນຢ່າງເປັນທາງການທີ່ໂຮງແຮມດອນຈັນພາເລດ ນະຄອນຫຼວງວຽງຈັນໂດຍໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ຕາງໜ້າລັດຖະບານຮ່ວມລົງນາມຂອງ ທ່ານ ນາງ ບົວທາ ຂັດທິຍະ ຮອງລັດຖະມົນຕີ, ຫົວໜ້າກອງເລຂາ ຄຂພສ ແລະທ່ານ ສຸດລິດ ແກ້ວດວງດີ ຮອງຜູ້ອຳນວຍການບໍລິສັດດວງດີກໍ່ສ້າງຂົວ- ທາງ ຈຳກັດຜູ້ດຽວ ຕາງໜ້າໃຫ້ບໍລິຜູ້ພັດທະນາ ແລະເຊັນເປັນພິຍານໂດຍ ທ່ານ ດຣ. ບຸນຖອງ ດີວິໄຊ ເຈົ້າແຂວງໆຈຳປາສັກ ແລະທ່ານ ອຸດອນ ແກ້ວດວງດີ ຜູ້ອຳນວຍການບໍລິສັດດວງດີກໍ່ສ້າງ ຂົວ-ທາງ ຈຳກັດຜູ້ດຽວ ທ່ານ ເຂີງຄຳ ແກ້ວໜູຈັນ ຮອງຫົວໜ້າກອງເລຂາເພື່ອ ຄຸ້ມຄອງເຂດເສດຖະກິດພິເສດ ແລະເຂດ ເສດຖະກິດສະເພາະ, ພ້ອມດ້ວຍເຈົ້າເມືອງໆໂພນທອງ ແລະພາກສ່ວນກ່ຽວຂ້ອງເຂົ້າຮ່ວມ.
ທ່ານ ເຂິງຄຳ ແກ້ວໜູຈັນກ່າວວ່າ: ການເຊັນສັນຍາສະບັບນີ້ເປັນການຍົກລະດັບເອົາເຂດຫ່າງໄກສອກຫຼີກໃຫ້ກາຍເປັນເຂດຈຸດສຸມພັດທະນາອີກແຫ່ງໜຶ່ງພາຍໃຕ້ນະໂຍບາຍ, ກົນໄກການຄຸ້ມຄອງ ແລະບໍລິຫານຂພສ ທີ່ເປັນວຽກງານບຸກທະລຸໃນໄລຍະໃໝ່ທີ່ໄດ້ກຳນົດໄວ້ໃນນິຕິກຳວ່າດ້ວຍການພັດທະນາແລະຄຸ້ມຄອງ ຂພສ ໄປຈັດຕັ້ງຜັນຂະຫຍາຍ ໂດຍຜ່ານການຄຸ້ມຄອງບໍລິຫານ ຕາມກົນໄກກາປະທັບດຽວ, ຫັນເປັນອຸດສາຫະກຳ ແລະທັນສະໄໝດ້ວຍການນຳໃຊ້ລະບົບເອເລັກໂຕຼນິກເຂົ້າໃນການຄຸ້ມຄອງບໍລິຫານທີ່ຮັບປະກັນການໂປ່ງໃສ ແລະສາມາດກວດສອບໄດ້ເພື່ອຊຸກຍູ້ ແລະອຳນວຍຄວາມສະດວກໃຫ້ແກ່ການດຳເນີນທຸລະກິດ, ການບໍລິການຢູ່ພາຍໃນເຂດກໍຄືການພັດທະນາເຂດໃຫ້ບັນລຸຕາມຈຸດປະສົງເປົ້າໝາຍທີ່ວາງໄວ້ເພື່ອປະກອບສ່ວນໃຫ້ແກ່ການພັດ ທະນາເສດຖະກິດຂອງທ້ອງຖິ່ນ ແລະ ຂອງຊາດໃຫ້ຂະຫຍາຍຕົວ.
ເຂດພັດທະນາເສດຖະກິດວັງເຕົ່າ-ໂພນທອງ ມີຊື່ຫຍໍ້ວ່າ: “ຂວພ” ຊຶ່ງ ເຂດດັ່ງກ່າວແມ່ນຈະນຳໃຊ້ທຶນເຂົ້າ ໃນການພັດທະນາທັງໝົດຈຳນວນ 250 ລ້ານໂດລາສະຫະລັດ ຫຼື ປະມານ 2 ພັນຕື້ກີບ ໃນເນື້ອທີ່ສຳປະທານ 253 ເຮັກຕາ, ຕັ້ງຢູ່ບໍລິເວນດ່ານສາກົນວັງເຕົ່າເມືອງໂພນທອງ ທີ່ມີອາຍຸສຳປະທານ 99 ປີ, ໂດຍແມ່ນລັດຖະບານຖື ຮຸ້ນ 30% ແລະບໍລິສັດຜູ້ພັດທະນາຖືຮຸ້ນ 70%, ຊຶ່ງຈຸດປະສົງຂອງການສ້າງຕັ້ງເຂດນີ້ ແມ່ນເພື່ອໃຫ້ກາຍເປັນເຂດເສດຖະກິດທີ່ມີສິ່ງອຳນວຍຄວາມສະດວກໃຫ້ແກ່ນັກລົງທຶນທັງພາຍໃນ ແລະຕ່າງປະເທດເຂົ້າມາລົງທຶນໃນບັນດາກິດຈະການຕ່າງໆເຊັ່ນ: ສູນການຄ້າ, ຮ້ານຄ້າປອດພາສີ, ຕະຫຼາດຊາຍແດນ, ການທ່ອງທ່ຽວ, ໂຮງແຮມ ແລະບ້ານຈັດສັນ, ສາງພັກສິນຄ້າ, ທະນາຄານ-ສະຖາບັນການເງິນ, ໂຮງງານຜະລິດເພື່ອສົ່ງອອກຊຶ່ງຈະເຮັດໃຫ້ພື້ນຖານເສດຖະກິດມີຄວາມເຂັ້ມແຂງ, ຕິດພັນກັບວັດທະນະທຳ-ສັງຄົມສີວິໄລ, ເສີມສ້າງອະລິຍະທຳ, ວັດທະນະທຳຂອງຊາດ, ມີການພັດທະນາແບບຍືນຍົງ, ຫັນໄປສູ່ ການບໍລິຫານ ແລະຄຸ້ມຄອງແບບອຸດສາຫະກຳທີ່ທັນສະໄໝ, ໂປ່ງໃສ ແລະສາມາດກວດສອບໄດ້ພ້ອມທັງສ້າງວຽກເຮັດງານທຳທີ່ໝັ້ນຄົງໃຫ້ປະຊາຊົນພາຍໃນທ້ອງຖິ່ນ ແລະອ້ອມຂ້າງຂອງໂຄງການໄປຄຽງຄູ່ກັບການຮັບປະກັນໃນການປົກປັກຮັກສາສິ່ງແວດລ້ອມ, ທ່ານ ເຂິງຄຳແກ້ວໜູຈັນກ່າວຕື່ມວ່າ.
ທີ່ມາ: 