ໂຄງການຟື້ນຟູທາງເລກ 9 ແຂວງສະຫວັນນະເຂດສັນຍາ 2 ໄດ້ຮັບທຶນກໍ່ສ້າງຈາກກອງທຶນບູລະນະຮັກສາທາງຫຼວງ 70% ແລະງົບປະມານຂອງລັດ 30% ໂດຍແມ່ນບໍລິສັດຄູນໄຊພັດທະນາກໍ່ສ້າງຈຳກັດຜູ້ດຽວເປັນຜູ້ຮັບເໝົາກໍ່ສ້າງ ແລະມີບໍລິສັດ CaRol ຈາກປະເທດຍີ່ປຸ່ນແນະນຳທາງດ້ານເຕັກນິິກ ແລະລັດວິສາຫະກິດວິສາວະກຳຄົມມະນາຄົມຮ່ວມກັບລັດວິສາຫະກິດສຳຫຼວດອອກແບບ ແລະວິໄຈວັດສະດຸກໍ່ສ້າງເປັນບໍລິສັດທີ່ປຶກສາ, ລວມມີໄລຍະທາງທັງໝົດ 100 ກິໂລແມັດ, ໃນມູນຄ່າການລົງທຶນທັງໝົດ 319 ຕື້້ກວ່າກີບ, ຊຶ່ງການກໍ່ສ້າງໄດ້ແບ່ງອອກເປັນ 3 ຕອນຄື: ຕອນທີ 1 ແມ່ນເລີ່ມຈາກ ກິໂລແມັດທີ 105 ເມືອງພະລານໄຊຫາ ກິໂລແມັດທີ 126 ດົງກະເພາະ, ຕອນທີ 2 ແມ່ນເລີ່ມຈາກກິໂລແມັດທີ 126 ດົງກະເພາະກິໂລແມັດທີ 149 ບ້ານເຊ ທ່າມວກ ແລະຕອນທີ 3 ແມ່ນ ກິໂລແມັດທີ 185 ຂົວຫ້ວຍຢອນຫາ ກິໂລແມັດທີ 242 ຊາຍແດນລາວຫວຽດນາມ.
ຕາມການລາຍງານຂອງທ່ານຫົວໜ້າໂຄງການຟື້ນຟູທາງເລກ 9 ແຂວງສະຫວັນນະເຂດສັນຍາ 2 ເມື່ອບໍ່ດົນມານີ້ໄດ້ໃຫ້ຮູ້ວ່າ:ພາຍຫຼັງທີ່ເລີ່ມລົງມື ຈັດຕັ້ງປະຕິບັດໂຄງການນັບແຕ່ເດືອນ ພຶດສະພາ 2014 ເປັນຕົ້ນມາ, ມາຮອດປະຈຸບັນນີ້, ໂຄງການແມ່ນມີຄວາມຄືບໜ້າຫຼາຍດ້ານ, ທຽບໃສ່ແຜນການແມ່ນ ບັນລຸໄດ້ແລ້ວເກືອບ 60% ໃນນີ້ໄດ້ຂຸດຮື້ໜ້າທາງເກົ່າມີຄວາມຍາວ 27,50 ກິໂລແມັດ, ຈົກວັດສະດຸທີ່ບໍ່ເໝາະສົມອອກ ແລະຖົມຄືນດ້ວຍວັດ ສະດຸດີກໍ່ສ້າງຊັ້ນພື້ນທາງໄດ້ 23,77 ກິໂລແມັດ, ປູຢາງອາສຟານຊັ້ນ 1 ໄດ້ 22,95 ກິໂລແມັດ, ປູຢາງອາສຟານ ຊັ້ນ 2 ໄດ້ 33,22 ກິໂລແມັດ, ຕິດຕັ້ງ ຫຼັກຂອບເຂດສະຫງວນທາງຫຼວງໄດ້ 130 ຫຼັກ.
ຊຶ່ງມາໃນປະຈຸບັນພວກເຮົາແມ່ນພວມຂຸ້ນຂ້ຽວຈັດຕັ້ງປະຕິບັດໂຄງການ ກໍ່ສ້າງໃນຕອນທີ 2 ກໍຄື ໃນກິໂລແມັດທີ 126149 ຊຶ່ງເປັນໄລຍະທາງທີ່ມີ ການເປ່ເພຫຼາຍ ແລະໜັກທີ່ສຸດຂອງທາງເລກ 9 ເພື່ອໃຫ້ສຳເລັດ ແລະໃຫ້ໄດ້ ມອບຮັບໃນທ້າຍເດືອນມິຖຸນານີ້ພາຍຫຼັງທີ່ໄດ້ມອບຮັບ ຈິ່ງຈະສືບຕໍ່ໃນຊ່ວງທີສາມໃນຊ່ວງເມືອງເຊໂປນຫາຊາຍແດນ ເພື່ອໃຫ້ສຳເລັດຕາມແຜນການທີ່ວາງ ໄວ້ໃນປີ 2017 ນີ້.
ທີ່ມາ: