ໃນຕອນບ່າຍຂອງວັນທີ 26 ເມສາ 2o16 ຜ່ານມາ ໃນເວລາ 01:3o ໂມງ ໄດ້ເກີດມີລົມພາຍຸລະດູຮ້ອນຂຶ້ນຢ່າງຮຸນແຮງຢູ່ທີ່ເຂດເທສະບານເມືອງທ່າແຂກ ແຂວງຄໍາມ່ວນ ເຮັດໃຫ້ສະຖານທີ່ບ່ອນພັກເຊົາຂອງພະສົງ ແລະ ບ່ອນສັກກາລະບູຊາຂອງພໍ່ແມ່ປະຊາຊົນຢູ່ທີ່ວັດພະທາດສີໂຄດຕະບອງໄດ້ຮັບຄວາມເສຍຫາຍ ເຊິ່ງລົມພະຍຸດັ່ງກ່າວ ເປັນລົມທີ່ພັດມາປະສານກັບຝົນໂດຍພັດມາທາງທິດເໜືອຂອງວັດມາໃນແລວຕໍ່າຽບຕາມໜ້າດິນດ້ວຍຄວາມແຮງ ອັນໄດ້ເຮັດໃຫ້ສະຖານທີ່ໃນບໍລິເວນດັ່ງກ່າວນັ້ນຖືກເສຍຫາຍ ເປັນຕົ້ນຄື ຫຼັງຄາກະເບື້ອງ ກະຕຶບພະ (ສິມໃຫຽ່) ສາລາໂຮງທຳ (ຫໍແຈກ) ໄດ້ຂຸລົງຈົນ ແລະ ເສຍຫາຍໜັກກວ່າໝູ່ແມ່ນ ກຳແພງກົມມະລຽນ ຢູ່ທາງຟາກເບື້ອງໃຕ້ຂອງວັດເປັນແຖວ ທີ່ມີຄວາມຍາວ 4o ແມັດ ໄດ້ຖືກລົມພາຍຸພັດລົງເສຍຫາຍຢ່າງຮຸນແຮງ ເຊິ່ງສະຖານທີ່ນີ້ເປັນບ່ອນທີ່ໃຊ້ຮອງຮັບ ຫຼື ເປັນບ່ອນທີ່ພັກເຊົາຂອງພະສົງ-ສຳມະເນນ ແລະ ອອກຕົນຍາດໂຍມ ໃນຍາມບຸນປະເພນີເດືອນສາມເພັງ ໂດຍສະເພາະກໍແມ່ນ ໃນງານບຸນນະມັດສະການພະທາດສີໂຄດຕະບອງໃນແຕ່ລະປີ.
ຕໍ່ກັບສະພາບດັ່ງກ່າວ ໃນຕອນເຊົ້າຂອງວັນທີ 27 ເມສາ 2o16 ທາງອໍານາດການປົກຄອງເມືອງທ່າແຂກ ແລະ ພາກສ່ວນທີ່ກ່ຽວຂ້ອງ ພ້ອມດ້ວຍອຳນາດການປົກຄອງ-ພໍ່ແມ່ປະຊາຊົນບ້ານມ່ວງສຸມ ກໍພ້ອມພາກັນ ເຮັດອະນາໄມເກັບມ້ຽນ-ມ້ຽນມັດທຳຄວາມສະອາດໃນສະຖານທີ່ທີ່ຖືກຜົນກະທົບດັ່ງກ່າວ ເຊິ່ງເຫດການລົມພາຍຸລະດູຮ້ອນພັດຖະຫຼົ່ມເຂົ້າວັດພະທາດສີໂຄດຕະບອງໃນຄັ້ງນີ້ ຖືວ່າໂຊກດີທີ່ບໍ່ມີປະຊາຊົນ ແລະ ນັກທ່ອງທ່ຽວໄດ້ຮັບບາດເຈັບ ແຕ່ກໍມີວັດຖຸອຸປະກອນ ພາຫະນະເຄື່ອງໃຊ້ຈຳນວນນຶ່ງຖືກເປ່ເພເສຍຫາຍ ຕໍ່ເຫດການດັ່ງກ່າວນີ້ ທາງອຳນາດການປົກຄອງເມືອງທ່າແຂກ ແລະ ພ້ອມດ້ວຍພາກສ່ວນທີ່ກ່ຽວຂ້ອງກໍຈະມີການຄົ້ນຄວ້າປຶກສາຫາລື ຂົນຂວາຍທຶນຮອນ ເພື່ອບູລະນະກໍ່ສ້າງສະຖານທີ່ດັ່ງກ່າວຄືນໃໝ່ໃນຕໍ່ໜ້າ.
ຂ່າວຈາກ: ວິທະຍຸ-ໂທລະພາບນະຄອນຫຼວງ