ອ່ານຕໍ່ຈາກມື້ວານ
ສັນຈອນ, ນ້າ, ວັນ ແລະ ນິງ ໄດ້ລົມກັບທາງເຟສບຸກ ແຕ່ສ່ວນຫຼາຍກໍ່ມີ ແຕ່ ນ້າ ທີ່ລົມກັບ ສັນຈອນ ເພາະ ນິງ ແລະ ວັນ ສອງຄົນນີ້ເຂົາມີແຟນແລ້ວ ຈິ່ງບໍ່ຄ່ອຍມີເວລາລົມກັບຄົນອື່ນຫຼາຍປານໃດນອກຈາກລົມກັບແຟນ ແລະ ອີກຢ່າງໜຶ່ງ ສັນຈອນ ກໍ່ບໍ່ແມ່ນຜູ້ຊາຍທີ່ລົມເກັ່ງຖາມຄຳຕອບຄຳ ດັ່ງນັ້ນຈິ່ງບໍ່ມີສະເໜ່ທີ່ຢາກຈະແຊັດລົມນຳເລີຍ.
ພວກເຂົາລົມທັງສີ່ຄົນ ລົມກັນຈົນຮອດໜຶ່ງເດືອນ ຈາກນັ້ນກໍ່ຕັດສິນໃຈນັດມາພົບກັນ ເຊິ່ງສະຖານທີ່ນັດພົບກັນແມ່ນຢູ່ແຖວແຄມຂອງ ເພື່ອຍ່າງອອກກຳລັງກາຍນຳກັນ ວັນໄດ້ເປັນຄົນໂທຊວນ ແລະ ສັນຈອນກໍ່ຕອບຕົກລົງວ່າຈະມາຍ່າງນຳ
ຮອດເວລາ 17:00 ໂມງ ອາກາດກຳລັງດີທີ່ແຄມຂອງ ວັນ, ນ້າ ແລະ ນິງ ໄດ້ເປັນຝ່າຍມາຮອດກ່ອນພວກເຂົາທັງສາມຮູ້ສຶກຕື່ນເຕັ້ນທີ່ຈະໄດ້ພົບກັບ ສັນຈອນ ໃນລະຫວ່າງນັ່ງຖ້າພວກເຂົາກໍ່ໄດ້ລົມກັນຕາມພາສາຜູ້ຍິງທີ່ມັກການຊຸ໊ບຊິບເປັນຊີວິດຈິດໃຈ
ນິງເວົ້າ: ເຮີ້ຍ! ພວກໂຕວ່າທ້າວ ສັນຈອນ ໂຕແທ້ລາວ ສິເປັນຕາເບິ່ງຄືຢູ່ໃນເຟສບໍ່
ວັນ ກັບ ນ້າ: ແກ່ວງຫົວ! ບໍ່ຮູ້ຄືກັນ
ວັນ: ຫຼໍ່ ບໍ່ ຫຼໍ່ ແລ້ວມັນກ່ຽວຫຍັງສູ ຈັ່ງໃດພວກເຮົາກໍ່ບໍ່ໄດ້ຄິດຫັຍງກັບລາວ ທີ່ແນ່ໆ ເຮົາ! ມີແຟນແລ້ວ…
ນິງ: ເຮົາກະມີແລ້ວເດີ້! ບໍ່ໄດ້ໂສດຄືຄົນແຖວນີ້
ນ້າ: ເອົ້າ…! ແມ່ນຫຍັງສູ! ເອີ…ແນວກູບໍ່ງາມຄື ສູ ສະເໜ່ບໍ່ແຮງກູເຂົ້າໃຈ
ວັນ: ພວກກູຢອກ! ມຶງກະໜ້າຮັກປານນີ້ຖ້າມຶງບໍ່ຫຼິ້ນຕົວຫຼາຍກະແຮງສິມີແຟນຫຼາຍກ່ວາພວກກູ
ນ້າ ຫົວເບົາໆ: ເວົ້າບ້ານະສູ
ໃນຂະນະທີ່ທັງສາມສາວລົມກັນ ຈັນສອນ ກໍ່ຍ່າງເຂົ້າມາຫາດ້ວຍສີໜ້າຍິ່ມໃສ່ເບົາໆ ທັງສາມສາວໄດ້ເງີຍເບິ່ງໜ້າສັນຈອນພ້ອມກັນ ທັງສາມສາວພາກັນຫົວໃຈເຕັ້ນຕຶກໆ ເພາະເຫັນຄົນຫຼໍ່ມາຢືນຢູ້ຕໍ່ໜ້າ ສັນຈອນໄດ້ທັກທາຍສາມສາວດ້ວຍສຽງເບົາໆວ່າ: ສະບາຍດີ! ທັງສາມສາວເວົ້າບໍ່ອອກໄດ້ແຕ່ງຶກຫົວ.
ຫຼັງຈາກນັ້ນທັງສີ່ຄົນກໍ່ໄດ້ທຳຄວາມຮູ້ຈັກກັນ ແລະ ກໍ່ພາກັນຍ່າງອອກກຳລັງກາຍນຳກັນ ສັນຈອນ ໂດຍບຸກຄະລິກແລ້ວຖືວ່າເປັນຄົນສູງຮູບງາມ ໜ້າຕາກະໂອເຄ ເປັນຄົນຜິວສີແທນສິວ່າຂາວກໍ່ບໍ່ຂາວດຳກໍ່ບໍ່ດຳ ແຕ່ລາວເປັນຄົນຄ່ອນຂ້າງມັກຄວາມສັນໂດດ ເວລາໄປຍ່າງອອກກຳລັງກາຍກັບສາມສາວແທນທີ່ສິຍ່າງຮຽງກັນລົມກັນໄປ ສັນຈອນພັດຍ່າງໄປຄົນດຽວໄປກັບກ້ອງຄູ່ໃຈໂດຍປະໃຫ້ແຕ່ສາວສາມພາກັນຍ່າງ ສັນຈອນເປັນຄົນຍ່າງໄວ ຍ່າງໄປຍ່າງໄປ ແລະ ກໍ່ຖ່າຍຮູບໄປ ແຕ່ກໍ່ມັ່ນຫຼຽວມາເບິ່ງສາມສາວຢູ່ເປັນໄລຍະ ຖ້າຮູ້ສຶກວ່າຕົນເອງຍ່າງຫ່າງສາມສາວນັ້ນນັ້ນຫຼາຍກໍ່ຈະຢືນຖ້າ.
ດ້ານສາມສາວທັງຍ່າງແລະລົມກັບພວກເຂົາຮູ້ສຶກວ່າຫົວໃຈຊຸ່ມຊື່ນເປັນພິເສດ ເພາະສັນຈອນດູດີເກີນທີ່ຄາດໄວ້ ວັນ ກັນ ນິງ ຮູ້ສຶກວ່າຈະສະແດງອາການປື້ມ ສັນຈອນຢ່າງອອກໜ້າອອກຕາ ສ່ວນ ນ້າ ໃນໃຈກໍ່ປື້ມກັບຮູບລັກພາຍນອກຂອງສັນຈອນຢູ່ແຕ່ກໍ່ຫງຽບໄວ້ ນິ້ງໄວ້ ບໍ່ສະແດງອາກາດ
ຍ່າງຈົນຮອດເວລາ 17:30 ໂມງ ພວກເຂົາກໍ່ຮູ້ສຶກເໝື່ອຍ ແລະ ໄດ້ມານັ່ງພັກຜ່ອນທີ່ແຖວຂັນໄດຂອງແຄມຂອງ ຊ່ວງນັ້ນເປັນຊ່ວງຕາເວັນໃກ້ຈະຕົກດິນແສງແດດອ່ອນລົມພັດເຢັນໆ ບັນຍາກາດດີເຫຼືອເກີນ ມີຜູ້ຄົນຫຼວງຫຼາຍມາຍ່າງ ແລະ ມານັ່ງເບິ່ງພະອາທິດຕົກ ບາງຄົນກໍ່ທ່ານຮູບເກັບເອົາໄວ້ ເຊິ່ງແນ່ນອນວ່າ ສັນຈອນ ກໍ່ບໍ່ພາດທີ່ຈະຖ່າຍຮູບ ຕະເວັນກ່ອນຈະລັບຂອບຟ້າ ນ້າ ໄດ້ແອບລັກເບິ່ງສັນຈອນ ພໍສັນຈອນ ແນມມາ ນ້າ ກໍ່ຫັນໜີໄປເບິ່ງທາງອື່ນ ຫຼື ບາງຄັ້ງກໍ່ທຳທ່າຊວນ ວັນ ກັບ ນິງ ລົມເລື່ອງນັ້ນເລື່ອງນີ້ ສ່ວນສັນຈອນກໍ່ຫງຽບຢູ່ກັບກ້ອງຖ່າຍຮູບເໝືອນເດີມ ວັນ, ນ້າ ແລະ ນິງ ໄດ້ຖາມສັນຈອນ ເລື່ອງນັ້ນເລື່ອງນີ້ ແຕ່ບາງຄັ້ງສັນຈອນກໍ່ຕອບ ບາງຄັ້ງກໍ່ຫງຽບ ໂດຍ ທີ່ສັນຈອນບໍ່ໄດ້ມີການຖາມພວກສາມສາວກັບຄືນມາເລີຍ ເຮັດໃຫ້ສາມສາວຮູ້ສຶກໝົດແນວສິລົມ ກັບ ສັນຈອນເລີຍ ທັງສາມສາວໄດ້ພາກັນນັ່ງລົມກັນ ຫົວສະອິກສະອ້ອຍບາດແນມມາອີກເທື່ອໜຶ່ງກໍ່ບໍ່ເຫັນສັນຈອນແລ້ວ ພວກເຂົາແນມຫາວ່າສັນຈອນຫາຍໄປໃສ ແລ້ວກໍ່ເຫັນ ສັນຈອນ ຫິ້ວຕຸກນ້ຳດື່ມມາ 4 ຕຸກ ພ້ອມດ້ວຍຖົງຂະໜົມ 4 ຖົງ ຍ່າງມຸ້ງໜ້າມາຫາສາມສາວພ້ອມທັງເທັກແຄເປັນຢ່າງດີໄຂຝາຕຸກນ້ຳໃຫ້ທຸກຄົນ “ບໍ່ປາກແຕ່ເຮັດ” ທັງສາມສາວງົງໃນພຶດຕິກຳຂອງສັນຈອນເລີຍ. ພໍຮອດ 18:30ໂມງ ພວກເຂົາກໍ່ແຈກຢາຍກັບເຮືອນໃຜມັນ.
ຮອດຕອນຄ່ຳທີ່ຫ້ອງນອນ ສັນຈອນ ໄດ້ເປີດຄອມແລ້ວເອົາແມັມຈາກກ້ອງທີ່ຖ່າຍຮູບທີ່ແຄມຂອງມາໂຫລດພາບລົງຄອມໄວ້ ສັນຈອນໄດ້ຄິລກເບິ່ງຮູບແຕ່ລະຮູບທີ່ຕົນຖ່າຍມື້ນີ້ດ້ວຍຄວາມສຸກ ແລ້ວສຽງ line ໃນມືຖືກໍ່ດັງຂຶ້ນ ສັນຈອນຈັບຂຶ້ນມາເປີດອ່ານ ເປັນຂໍ້ຄວາມຈາກ ນ້າ ສົ່ງມາຖາມວ່າ
line ນ້າ: ມື້ນີ້ເປັນແນວໃດ ໄປຫຼິ້ນກັບພວກເຂົາມ່ວນບໍ່
line ສັນຈອນ: ກໍ່ມ່ວນດີ
line ນ້າ: ເຂົາຄືບໍ່ເຫັນເພິ່ນປາກກັບໃຜເລີຍ! ມ່ວນແທ້ບໍ່ນິ
line ສັນຈອນ: ມ່ວນແທ້! ແຕ່ເຂົາບໍ່ຮູ້ສິລົມຫຍັງກັບພວກເພິ່ນ
line ນ້າ: ອືມມມມ! ຊັ້ນມືໜ້າໄປຫຼິ້ນນຳກັນອີກເນາະ ຝັນດີ! ບ່າຍ
line ສັນຈອນ: ໄດ້! ບ່າຍ
ທີ່ຫ້ອງນອນຂອງ ນ້າ ຫຼັງຈາກທີ່ເຊົາແຊັດ line ກັບສັນຈອນແລ້ວ ລາວກຳລັງສິເຂົ້ານອນ ວັອດແອັບ ກຸ່ມ ນ້າ, ວັ, ນິງ ກໍ່ດັງຂຶ້ນ ນ້າໄດ້ຈັບມືຖືຂຶ້ນມາເປີດອ່ານກໍ່ເຫັນຂໍ້ຄວາມສົນທະນາຂອງວັນແລະ ນິງ ລົມກັນເລື່ອງສັນຈອນ ມີເນື້ອໃນວ່າ: ສັນຈອນນິລໍ່ຢູ່ ແຕ່ຫງຽບໂພດ ມາດຫຼາຍໂພດ ເຢັນຊາ ປານພະເອກໜັງເກົາຫຼີ ຖ້າສັນຈອນບໍ່ແມ່ນສາຍຫງຽບ ບໍ່ວັນ ກໍ່ ນິງ ຕ້ອງສົນໃຈແນ່ນອນ ແຕ່ນີ້ບໍ່ແມ່ນສະເປັກຂອງວັນກັບນິງເລີຍ ເພາະສອງຄົນນີ້ບໍ່ມັກສາຍ ຫງຽບເມື່ອ ນ້າໄດ້ອ່ານຂໍ້ຄວາມທັງສອງຄົນນັ້ນລົມກັນແລ້ວນາງກໍ່ຢາກຫົວ ແລະ ຮູ້ສຶກໂລ່ງໃຈ ເພາະຕົວເອງມັກຜູ້ຊາຍສາຍຫງຽບແບບເກົາຫຼີ ນ້າ ໄດ້ສົ່ງຂໍ້ຄວາມເຂົ້າໄປສົນທະນາໃນກຸ່ມແລ້ວສາມສາວກໍ່ໄດ້ລົມກັນເລື່ອງສັນຈອນທັງຄືນ
ຫຼັງຈາກທີ່ສີ່ຄົນນັ້ນໄດ້ໄປທ່ຽວນຳກັນ ຜ່ານໄປເປັນເວລາ 2 ເດືອນກໍ່ບໍ່ໄດ້ໄປທ່ຽວນຳກັນອີກ ມີແຕ່ແຊັດຫຼິ້ນເຟສບຸກ ຫຼິ້ນ line ນຳກັນ ແຕ່ທີ່ລົມກັນຫຼາຍທີ່ສຸດລົມກັນເລື່ອຍໆກໍ່ຄົງຈະເປັນ ນ້າ ກັບ ສັນຈອນ. ຮອດວັນກີລາໂຮງຮຽນທີ່ເດີ່ນເຕະບານ ຫ້ອງບັນຊີພາກເຊົ້າ (ກ້ອງສັນຈອນ) ຫ້ອງບັນຊີພາກແລງ (ຫ້ອງນ້າ,ວັນ,ນິງ) ທັງສອງຫ້ອງຖືກນັດເຕະບານແຂ່ງກັນ ສັນຈອນໄດ້ເປັນໜຶ່ງໃນທີມເຕະບານຂອງຫ້ອງ ສ່ວນພວກສາມສາວນັ້ນກໍ່ໄປເຊຍຫ້ອງຕົວເອງຄືກັນ ນັ້ນເປັນເຫດເຮັດໃຫ້ພວກເຂົາທັງສີ່ພົບກັບອີກຄັ້ງ ໃນສະໜາມພວກເຂົາບໍ່ໄດ້ລົມກັນພຽງແຕ່ຍິ້ມໃສ່ກັນຊື່ໆ ໃນການແຂ່ງຂັນທັງສອງທີມສະເໜີກັນ 1-1 ເມື່ອສິ້ນສຸດການແຂ່ງຂັນທັງສອງຫ້ອງກໍ່ພາກັນນັດກິນເຂົ້າສາມັກຄີທີ່ຮ້ານອາຫານແຫ່ງໜຶ່ງເຊິ່ງບໍ່ໄກຈາກໂຮງຮຽນຫຼາຍ.
ທີ່ຄອກລົດຮ້ານອາຫານ ພວກເຂົາໄດ້ພາກັນເອົາລົດເຂົ້າໄປຝາກໃນຄອກລົດ ນ້າ, ວັນ, ນິງ ແລະ ສັນຈອນຍ່າງອອກມາພ້ອມກັນຈາກຄອກລົດ ໃນຂະນະທີ່ພວກເຂົາກຳລັງຍ່າງອອກມາ ກໍ່ມີລົດຈັກຂັນໜຶ່ງຂັບເຂົ້າມາດ້ວຍຄົນຂັບສີຊຶມໆເລັກໜ້ອຍເຂົາລົດເລີຍຫັກມາທາງນ້າ.ວັນ.ນິງ ນ້າຢູ່ທາງກາງສ່ວນວັນ ແລະ ນິງຢູ່ທາງຂອກຟ້າວຫຼີກອອກສ່ວນນ້າທີກຳລັງກົ້ມໜ້າແຍງເບິ່ງເກີບບໍ່ທັນເຫັນເລີຍບໍ່ໄດ້ຫຼີກອອກ ແຕ່ໂຊກດີທີ່ສັນຈອນຢູ້ໃກ້ເລີຍໃຊ້ມືທັງສອງເບື້ອງໂອບເອົາຕົວນ້າແລ້ວດຶງມາໃກ້ກັບຕົວເອງ ໜ້າຕໍ່ໜ້າເຊິ່ງກັນນ້າຕົກໃຈແຕ່ບໍ່ກ້າສົບຕາສັນຈອນ ເລີຍໄດ້ແຕ່ກົນໜ້າແລະສັນຈອນໄດ້ເວົ້າຄ່ອຍໆກັບໜ້ານ້າວ່າ: “ຍ່າງເບິ່ງທາງແນ່ ດຽວລົດກໍ່ຕຳຕາຍແຫລະ” ແລ້ວສັນຈອນກໍ່ຄ່ອຍປ່ອຍມືອອກຈາກໂຕນ້າ ແລະ ໄດ້ຍິນສຽງເວົ້າຄ່ອຍໆຈາກປາກນ້າວ່າ: ຂອບໃຈ.. ໂດຍວັນກັບນິງພາກັນຮ້ອງຕໍ່ວ່າພວກທີ່ຂັບລົດບໍ່ເບິ່ງແຕ່ກໍ່ຖືກນ້າຫ້າມໄວ້ຈາກນັ້ນເຫດການກໍ່ປົກກະຕິພວກເຂົາທັງສີ່ກໍ່ພາກັນຍ່າງເຂົ້າໄປໃນຮ້ານ ຢູ່ໃນຮ້ານ ນ້າ,ວັນ,ນິງ ສາມສາວນັ່ງໃກ້ກັນແຖວກາງໂຕະ ສ່ວນ ສັນຈອນກໍ່ໄປນັ່ງກັບໝູ່ຮ່ວມຫ້ອງຂອງລາວແຖວທ້າຍໂຕະອີກຝາກ ທັງສອງຄອຍແອບແນມເບິ່ງກັນໄປໄລຍະບາງເທື່ອກໍ່ເຮັດຄືແນມບໍ່ເຫັນ ບາງເທື່ອກໍ່ແນວເບິ່ງໜ້າກັນບຶດນຶ່ງ ສາຍຕາທັງຄູ່ເໝືອນມີເລ່ສະໄນບາງຢ່າງແອບແຝງ…
ແລ້ວຕອນຕໍ່ໄປພວກເຂົາຈະພັດທະນາຄວາມສຳພັນຈາກເພື່ອນກາຍໄປເປັນຄົນຮູ້ໃຈໄດ້ບໍ່ ເລື່ອງລາວກຳລັງເຂັ້ມຂຸ້ນຂຶ້ນເລື່ອຍໆ ຢ່າລືມອ່ານຕໍ່ມື້ອື່ນ.
ແຕ່ງໂດຍ: ປັອກເລັກ ລາວໂພສຕ໌