ເມື່ອປາຍປີ 2015 ຜ່ານມາ ນາຍົກລັດຖະມົນຕີ ແລະລັດຖະມົນຕີກະຊວງມະຫາໄທ ແຫ່ງຣາຊະອານາຈັກກ່ຽວກັບການບໍ່ອະນຸຍາດໃຫ້ຄົນຕ່າງ ດ້າວເດີນທາງເຂົ້າຣາຊະອານາຈັກ ໂດຍ ມີຜົນບັງຄັບໃຊ້ເລີ່ມແຕ່ວັນທີ 20 ມີນາ 2016 ເປັນຕົ້ນມາ.
ແນວໃດກໍດີ ໄທນັບວ່າເປັນປະເທດໜຶ່ງທີ່ຄົນລາວເຂົ້າໄປອອກແຮງງານຈຳນວນຫຼາຍໃນແຕ່ລະປີ ແລະຄຳສັ່ງສະບັບນີ້ອາດມີຜົນກະທົບຕໍ່ຜູ້ທີ່ເຂົ້າໄປລີ້ຊ້ອນ, ແຕ່ງດອງ ແລະອອກແຮງງານ ຢ່າງຜິດກົດໝາຍສະນັ້ນວັນທີ 24 ມີນາ 2016 ນີ້ ກົມກົງສຸນກະຊວງການຕ່າງປະເທດຈິ່ງໄດ້ອອກໜັງສືແຈ້ງການໃຫ້ປະຊາຊົນລາວຜູ້ທີ່ຢູ່ໃນປະເທດໄທເກີນກຳນົດຕະຫຼອດຮອດຜູ້ທີ່ຈະເດີນທາງໄປປະເທດໄທ ຈົ່ງໄດ້ມີສະຕິເປັນເຈົ້າການກວດກາບັນດາເອກະສານເດີນທາງຕ່າງໆເພື່ອຫຼີກເວັ້ນບັນຫາທີ່ອາດເກີດຂຶ້ນ.
ໂດຍເນື້ອໃນຄຳສັ່ງກົມກົງສຸນໄດ້ ສັງລວມໂດຍຫຍໍ້ດັ່ງນີ້:
1. ໃນກໍລະນີຄົນຕ່າງດ້າວພັກເຊົາຢູ່ໃນຣາຊະອານາຈັກໄທເກີນກຳນົດການອະນຸຍາດຜູ້ທີ່ສະໝັກໃຈເຂົ້າມອບຕົວຕໍ່ເຈົ້າໜ້າທີ່ຈະຖືກດຳເນີນການຄື: ຜູ້ພັກເຊົາເກີນກຳນົດ 90 ວັນ, ຈະຖືກຫ້າມເຂົ້າຣາຊະອານາຈັກເປັນໄລຍະເວລາ 1 ປີ ນັບແຕ່ວັນທີ່ຜູ້ກ່ຽວຖືກສົ່ງຕົວກັບປະເທດ, ຜູ້ພັກເຊົາເກີນກຳນົດ 1 ປີ ຈະຖືກຫ້າມເຂົ້າຣາຊະອານາຈັກເປັນໄລຍະເວລາ 3 ປີ ນັບແຕ່ວັນທີ່ຜູ້ກ່ຽວຖືກສົ່ງຕົວກັບປະເທດ, ຜູ້ພັກເຊົາເກີນກຳນົດ 3 ປີ ຈະຖືກຫ້າມເຂົ້າຣາຊະອານາຈັກ ເປັນໄລຍະເວລາ 5 ປີ ນັບແຕ່ວັນທີ່ຜູ້ກ່ຽວຖືກສົ່ງຕົວກັບປະເທດ, ຜູ້ພັກເຊົາເກີນກຳນົດ 5 ປີ ຈະຖືກຫ້າມເຂົ້າຣາຊະອານາຈັກເປັນໄລຍະເວລາ 10 ປີ ນັບ ແຕ່ວັນທີ່ຜູ້ກ່ຽວຖືກສົ່ງຕົວກັບປະເທດ.
- ກໍລະນີຄົນຕ່າງດ້າວພັກເຊົາຢູ່ ໃນຣາຊະອານາຈັກໄທເກີນກຳນົດການອະນຸຍາດຖືກເຈົ້າໜ້າທີ່ຈັບກຸມ ແລະດຳເນີນຄະດີຄື: ຜູ້ພັກເຊົາເກີນກຳນົດ 1 ປີ ຈະຖືກຫ້າມເຂົ້າຣາຊະອານາຈັກ ເປັນໄລຍະເວລາ 5 ປີ ນັບແຕ່ວັນທີ່ຜູ້ກ່ຽວຖືກສົ່ງຕົວກັບປະເທດ, ຜູ້ພັກເຊົາເກີນກຳນົດ 5 ປີ ຈະຖືກຫ້າມເຂົ້າຣາຊະອານາຈັກເປັນໄລຍະເວລາ 10 ປີ ນັບແຕ່ວັນທີ່ຜູ້ກ່ຽວຖືກສົ່ງຕົວກັບປະເທດ.
ຢ່າງໃດກໍຕາມ ກ່ອນຄຳສັ່ງສະບັບນີ້ຈະມີຜົນບັງຄັບໃຊ້ທາງການໄທກໍໄດ້ປະຊາສຳພັນໃຫ້ຄົນຕ່າງດ້າວທີ່ພັກເຊົາໃນຣາຊະອານາຈັກເກີນກຳນົດການອະນຸຍາດເຂົ້າມາມອບຕົວຕໍ່ເຈົ້າໜ້າທີ່ປະຈຳດ່ານຕຳຫຼວດກວດຄົນເຂົ້າເມືອງ (ທາງ ບົກ, ທາງນໍ້າ ແລະທາງອາກາດ) ໂດຍໃຫ້ເສຍຄ່າປັບໃໝໃນກໍລະນີຢູ່ເກີນກຳນົດວັນລະ 500 ບາດ, ຊຶ່ງສູງສຸດຄ່າປັບໃໝຈະບໍ່ເກີດ 20 ພັນບາດຕາມກົດໝາຍຂອງໄທກຳນົດໄວ້ແລ້ວຈຶ່ງຖືກສົ່ງກັບຄືນປະເທດເດີມ.