ອົງການກອງທຶນອະນຸຮັກທໍາມະຊາດໂລກ ປະຈໍາ ສປປ.ລາວ ຮ່ວມກັບ 55 ພາກສ່ວນທີ່ມາຈາກອົງການຈັດຕັ້ງທາງພາກລັດ-ເອກະຊົນ ອົງການຈັດຕັ້ງທີ່ບໍ່ຂຶ້ນກັບລັດຖະບານ ທີ່ເປັນໜ່ວຍງານດໍາເນີນທຸລະກິດກ່ຽວຂ້ອງກັບການອະນຸຮັກທໍາມະຊາດ ແລະ ສິ່ງແວດລ້ອມໃນ ສປປ.ລາວ ພ້ອມດ້ວຍພາກສ່ວນທີ່ກ່ຽວຂ້ອງ ໄດ້ສະແດງພະລັງຮ່ວມກັບ 160 ກວ່າປະເທດໃນທົ່ວໂລກຈັດກິດຈະກໍາ ວັນມອດໄຟຟ້າໂລກ ວັນທີ 31 ມີນາ ເຊິ່ງມີຂຶ້ນໃນຕອນຄໍ່າຂອງວັນທີ 19 ມີນາ 2016 ທີ່ອົງການດັ່ງກ່າວ ເຊິ່ງຕັ້ງຢູ່ບ້ານສາຍລົມ ເມືອງຈັນທະບູລີ ນະຄອນຫຼວງວຽງຈັນ ໂດຍການເປັນປະທານຂອງທ່ານ ສົມພອນ ບົວສະຫວັນ ຫົວໜ້າອົງການກອງທຶນອະນຸຮັກທໍາມະຊາດໂລກ ປະຈໍາ ສປປ.ລາວ ມີຜູ້ຕາງໜ້າອົງການຈັດຕັ້ງສາກົນ ກະຊວງອ້ອມຂ້າງສູນກາງ ອົງການຈັດຕັ້ງທັງພາກລັດ-ເອກະຊົນ ອົງການຈັດຕັ້ງທີ່ບໍ່ຂຶ້ນກັບລັດຖະບານ ແລະ ນັກຮຽນ ນັກສຶກສາ ອາສາສະໝັກທີ່ມາຈາກຄະນະວິທະຍາສາດ-ປ່າໄມ້ ແລະ ຄະນະສິ່ງແວດລ້ອມ ມະຫາວິທະຍາໄລແຫ່ງຊາດ ເຂົ້າຮ່ວມຢ່າງຫຼວງຫຼາຍ.
ທ່ານຫົວໜ້າອົງການກອງທຶນອະນຸຮັກທໍາມະຊາດໂລກ ປະຈໍາ ສປປ.ລາວ ໃຫ້ຮູ້ວ່າ ກິດຈະກໍາວັນມອດໄຟຟ້າໂລກ ຖືເປັນກິດຈະກໍານຶ່ງທີ່ທົ່ວໂລກໄດ້ຈັດຂຶ້ນທຸກໆປີ ໂດຍສະເພາະແມ່ນໃນໂຕເມືອງໃຫຽ່ໆທົ່ວໂລກເຂົ້າຮ່ວມຂະບວນມອດໄຟຟ້າໂລກ ທີ່ບໍ່ຈໍາເປັນ ປະມານ 60 ນາທີ ຫຼື 1 ຊົ່ວໂມງ ໂດຍການເຂົ້າຮ່ວມຂອງບັນດາຫົວໜ່ວຍທຸລະກິດ ອົງການຈັດຕັ້ງ ໜ່ວຍງານພາກລັດ ແລະ ບຸກຄົນຕ່າງໆ ນັບຫຼາຍຮ້ອຍລ້ານຄົນ ໃນຫຼາຍກວ່າ 7.000 ໂຕເມືອງ ແລະ ໃນຫຼາຍກວ່າ 162 ປະເທດທົ່ວໂລກ ໂດຍແນໃສ່ເປົ້າໝາຍອັນດຽວກັນຄື ພະລັງງານເພື່ອອະນາຄົດ ແລະ ຄວາມຍືນຍົງ ກິດຈະກໍາມອດໄຟຟ້າ 1 ຊົ່ວໂມງ ຖືເປັນກາລະໂອກາດ ແລະ ວິທີແກ້ໄຂໃໝ່ໃນການຮ່ວມພະລັງຂອງມວນຊົນ ເພື່ອແກ້ໄຂບັນຫາສະພາບການປ່ຽນແປງຂອງດິນ ຟ້າ ອາກາດ ເພື່ອປຸກຈິດສໍານຶກໃຫ້ທຸກໆຄົນໃນສັງຄົມ ຮັບຮູ້ ເຂົ້າໃຈໃນບັນຫາ ເຊິ່ງປັດຈຸບັນ ທົ່ວໂລກພວມຜະເຊີນຢູ່ ແລະ ຊອກຫາວິທີທາງແກ້ໄຂຮ່ວມກັນ ເພື່ອປະຢັດພະລັງງານ ປະກອບສ່ວນໃນການຫຼຸດຜ່ອນສະພາວະໂລກຮ້ອນ ກໍຄື ຫຼຸດຜ່ອນອາຍພິດເຮືອນແກ້ວ.
ປັດຈຸບັນ ມວນມະນຸດໂລກພວມຜະເຊີນບັນຫາໄພພິບັດຕ່າງໆ ທີ່ມີລະດັບຄວາມຮຸນແຮງ ມີລັກສະນະແຜ່ລາມ ແລະ ນັບມື້ນັບເພີ່ມຂຶ້ນ ເຊິ່ງອີງຕາມບົດລາຍງານຂອງຄະນະຊ່ຽວຊານນາໆຊາດ ໄດ້ຊີ້ໃຫ້ເຫັນວ່າ ໃນໄລຍະສະຕະວັດທີ 10-19 ອຸນຫະພູມຂອງໂລກບໍ່ປ່ຽນແປງ ແຕ່ເລີ່ມແຕ່ສະຕະວັດທີ 20 ເປັນຕົ້ນມາ ອຸນຫະພູມໂລກກໍເລີ່ມມີການປ່ຽນແປງ ໂດຍເພີ່ມຂຶ້ນສະເ}jຍ 0,8 ອົງສາເຊ ແລະ ໃນອະນາຄົດ ຄາດຄະເນວ່າ ອຸນຫະພູມຂອງໂລກ ຈະສູງຂຶ້ນແຕ່ 1-4 ອົງສາເຊ ໃນທົດສະວັດສຸດທ້າຍຂອງສະຕະວັດທີ 21 ຖ້າຫາກບໍ່ມີມາດຕະການແກ້ໄຂຢ່າງຈິງຈັງ ຢ່າງໃດກໍຕາມ ຕໍ່ໜ້າສະພາບການດັ່ງກ່າວ ໄດ້ຮຽກຮ້ອງໃຫ້ປະຊາຄົມທົ່ວໂລກ ຈຳເປັນຕ້ອງໄດ້ຮ່ວມແຮງຮ່ວມໃຈ ຕໍ່ສູ້ກັບການປ່ຽນແປງດິນ ຟ້າອາກາດ ບົນພື້ນຖານແຫ່ງຄວາມຮັບຜິດຊອບຮ່ວມກັນ ຕາມຄວາມອາດສາມາດຂອງໃຜລາວ ໂດຍຕ້ອງມີມາດຕະການປະຕິບັດຮ່ວມກັນ ເພື່ອຫຼຸດຜ່ອນການປ່ອຍອາຍພິດເຮືອນແກ້ວສູ່ຊັ້ນບັນຍາກາດ.
ແຫລ່ງຂ່າວຈາກ: ວິທະຍຸ-ໂທລະພາບນະຄອນຫຼວງ