ປະຊາຊົນບ້ານດົງໂດກສະເໜີໃຫ້ ສສຊ ແກ້ໄຂບັນຫາຮ້ານກິນດື່ມກັບສິ່ງມືນເມົາ
—————————————
ຂປລ. ໃນວັນທີ 15 ມີນາ ນີ້ ບັນດາຜູ້ຮັບສະໝັກເລືອກຕັ້ງ ສສຊ ຊຸດທີ VIII ແລະ ສະມາ ຊິກສະພາປະຊາຊົນ ຂັ້ນນະຄອນຫລວງວຽງຈັນ, ໄດ້ລົງໂຄສະນາຫາງສຽງນຳພໍ່ແມ່ປະຊາຊົນຢູ່ບ້ານດົງໂດກ ເມືອງໄຊທານີ ນະຄອນຫລວງວຽງຈັນ, ເຊີ່ງມີຜູ້ຮັບຟັງຈຳນວນ 100 ກວ່າຄົນ. ໃນໂອກາດດັ່ງກ່າວນີ້, ປະຊາຊົນຈໍານວນບໍ່ໜ້ອຍ ໄດ້ສະເໜີຕໍ່ສະມາຊິກສະພາປະຊາຊົນນະຄອນຫລວງ ໃຫ້ຊ່ວຍສອດສ່ອງ ແລະ ແກ້ໄຂບັນຫາຮີບດ່ວນ ຄື: ຂໍໃຫ້ຢຸດຕິການຕັ້ງ ແລະ ຂະຫຍາຍຮ້ານກິນດື່ມຕິດພັນກັບສິ່ງມືນເມົາ ຢູ່ໃກ້ບໍລິເວນມະຫາວິທະຍາໄລແຫ່ງຊາດ; ຊ່ວຍແກ້ໄຂນໍ້າປະປາມາບໍ່ສະດວກ; ບໍ່ອະ ນຸຍາດໃຫ້ນັກຮຽນນຸ່ງເສື້ອແບບ ຫລື ນຸ່ງເສື້ອນັກຮຽນ ທີ່ຕິດປ້າຍຂອງສະຖາບັນຮ່ວມກັນດື່ມສິ່ງມືນເມົາ ເຊິ່ງຈະເປັນການສ້າງພາບຟົດບໍ່ດີ; ຊ່ວຍປາບປາມ ຫລຸດຜ່ອນບັນຫາຢາເສບຕິດ, ປະກົດການຫຍໍ້ທໍ້ຢ່າງຮີບດ່ວນ ແລະ ອື່ນໆ.
ແນວໃດກໍດີໃນວັນທີ 15 ມີນາ 2016 ນີ້, ທ່ານ ບົວລີ ແກ້ວມະນີວັນ ຄະນະພັກເມືອງ, ຫົວໜ້າຫ້ອງການຖະແຫລງຂ່າວ, ວັດທະນະທຳ ແລະ ທ່ອງທຽວ ເມືອງໄຊທານີ ໄດ້ລົງເຄື່ອນໄຫວພົບ ແລະ ໂຄສະນາຫາສຽງນໍາປະຊາຊົນຢູ່ເຂດບ້ານດົງໂດກ ພ້ອມຜີຍແຜ່ວິທີການປ່ອນບັດເລືອກຕັ້ງໃຫ້ພໍ່ແມ່ປະຊາຊົນເຂົ້າໃຈຢ່າງເລິກເຊິ່ງໂດຍສະເພາະຜູ້ມີອາຍຸ 18 ປີຂຶ້ນໄປ ຕ້ອງພ້ອມກັນໃປໃຊ້ສິດໃຊ້ສຽງໃຫ້ເຕັມສ່ວນ ຍົກເວັ້ນຄົນເປັນບ້າເສຍຈິດ. ສະເພາະເຂດບ້ານດົງໂດກ ລວມມີ 3 ຈຸດປ່ອນບັດຄື: ຈຸດທີ 1 ຢູ່ວັດບ້ານດົງໂດກ, ຈຸດທີ 2 ຢູ່ທາງ 3 ແຍກໄປສະນີ ແລະ ຈຸດທີ 3 ຢູ່ເຮືອນພັກຊີເກມ. ໃນໂອກາດດັ່ງກ່າວ, ຜູ້ຮັບສະໜັກເລືອກຕັ້ງແຕ່ລະທ່ານ ຍັງໄດ້ຜັດປ່ຽນກັນຂຶ້ນນຳສະເໜີປະ ຫວັດການເຄື່ອນໄຫວແຕ່ລະໄລຍະຂອງຕົນ ເປັນຕົ້ນໜ້າທີ່ຕຳແໜ່ງ, ຄວາມຮູ້ຄວາມສາມາດ, ສິດໜ້າທີ່ພາລະບົດບາດຂອງສະພາແຫ່ງຊາດ, ວິທີການປ່ອນບັດຄັດເລືອກເອົາຕົວແທນຂອງຕົນ ໄປນັ່ງໃນສະພາ ພ້ອມທັງໃຫ້ຄຳໝັ້ນສັນຍາວ່າ ຖ້າຫາກໄດ້ເປັນສະມາຊິກສະພາແຫ່ງຊາດແລ້ວ ຈະນໍາເອົາເນື້ອໃນຈິດໃຈ ແລະ ຂໍ້ຄິດເຫັນຕ່າງໆໄປຄົ້ນຄວ້າປະກອບເຂົ້າໃນການສ້າງສາພັດທະນາ, ແກ້ໄຂຄວາມ ທຸກຍາກ, ສ້າງຄວາມສະເໝີພາບ, ເພີ່ມຄວາມຍຸຕິທໍາ-ຄວາມໂປ່ງໃສ ແລະ ອື່ນໆ. ແຕ່ສິ່ງສໍາຄັນໃນປັດຈຸບັນ ຕ້ອງສຸມໃສ່ວຽກງານປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ.
ແຫລ່ງຂ່າວຈາກ: Pathedlao Lao