ສປປ.ລາວ ແລະ ອົງການສະຫະປະຊາຊາດປະຈໍາລາວ ຫາລື ກຳນົດໂຕຊີ້ວັດຂອງແຜນການ 5 ປີ ຄັ້ງທີ VIII

ສປປ.ລາວ ໂດຍກະຊວງແຜນການ ແລະ ການລົງທຶນ ຮ່ວມກັບ ອົງການສະຫະປະຊາຊາດເພື່ອການພັດທະນາ ປະຈໍາ ສປປ.ລາວ ໄດ້ຈັດກອງປະຊຸມປຶກສາຫາລືກ່ຽວກັບການຕິດຕາມ ແລະ ປະເມີນຜົນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ແລະ ເປົ້າໝາຍການພັດທະນາແບບຍືນຍົງຂຶ້ນໃນວັນທີ 07 ມີນາ 2016 ຜ່ານມາ ທີ່ຫ້ອງປະຊຸມໃຫຽ່ ກະຊວງແຜນການ ແລະ ການລົງທຶນ ໂດຍການເປັນປະທານຮ່ວມຂອງທ່ານ ດຣ. ຄຳລຽນ ພົນເສນາ ລັດຖະມົນຕີຊ່ອຍວ່າການກະຊວງແຜນການ ແລະ ການລົງທຶນ ທ່ານນາງ ຄາຣິນາ ອີມໂມເນັນ ຜູ້ຕາງໜ້າອົງການສະຫະປະຊາຊາດເພື່ອການພັດທະນາ ປະຈຳ ສປປ.ລາວ ມີຜູ້ຕາງໜ້າອົງການຈັດຕັ້ງສາກົນ ບັນດາຄູ່ຮ່ວມພັດທະນາ ບັນດາກະຊວງ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ທ່ານ ດຣ.ຄໍາລຽນ ພົນເສນາ ໄດ້ກ່າວວ່າ ການຈັດກອງປະຊຸມໃນຄັ້ງນີ້ ແມ່ນການສືບຕໍ່ເຮັດວຽກພາຍ ຫຼັງກອງປະຊຸມປຶກສາຫາລືກ່ຽວກັບການເຊື່ອມສານເປົ້າໝາຍການພັດທະນາແບບຍືນຍົງເຂົ້າໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ແລະ ແຜນຂອງຂະແໜງການທີ່ໄດ້ຈັດຂຶ້ນໃນເດືອນກຸມພາ 2016 ທີ່ຜ່ານມາ ເພື່ອປຶກສາຫາລືຂອບການຕິດຕາມ ແລະ ປະເມີນຜົນໃຫ້ເປັນເອກະພາບຕໍ່ບັນດາໂຕຊິ້ວັດໃນການຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ແລະ ເປົ້າໝາຍການພັດທະນາແບບຍືນຍົງ ກ່ອນຈະນຳສະເໜີຕໍ່ກອງປະຊຸມສະພາແຫ່ງຊາດ ທີ່ຈະໄຂຂຶ້ນໃນຕໍ່ໜ້າ ເຊິ່ງໃນໄລຍະຜ່ານມາ ກະຊວງແຜນການ ແລະ ການລົງທຶນ ກໍໄດ້ມີການປະສານສົມທົບກັບຫຼາຍພາກສ່ວນທີ່ກ່ຽວຂ້ອງ ແລະ ສາມາດສັງຮວມໄດ້ທັງໝົດ 165 ໂຕຊີ້ວັດ ໃນນັ້ນ ຂົງເຂດເສດຖະກິດ 55 ໂຕຊີ້ວັດ ຂົງເຂດວັດທະນະທຳ-ສັງຄົມ 87 ໂຕຊີ້ວັດ ຂົງເຂດສິ່ງແວດລ້ອມ 7 ໂຕຊີ້ວັດ ແລະ ອີກ 16 ໂຕຊີ້ວັດ ແມ່ນຕິດພັນກັບຫຼາຍຂະແໜງການ ສຳລັບໂຕຊີ້ວັດທີ່ກ່ຽວຂ້ອງກັບເປົ້າໝາຍການພັດທະນາແບບຍືນຍົງ ມີທັງໝົດ 61 ໂຕຊີ້ວັດ ກວມ 37% ຂອງໂຕຊີ້ວັດທັງໝົດໃນຂອບການຕິດຕາມ-ປະເມີນຜົນ.

ແຫລ່ງຂ່າວຈາກ http://www.vtetoday.la/