ໃນຕອນແລງຂອງວັນທີ 10ມີນາ 2016 ຢູ່ທີ່ ໂຮງແຮມແລນມາກ ໄດ້ມີພິທີເຊັນສັນຍາການຖ່າຍທອດສົດລາວພຣີເມຍລີກເຊິ່ງສະຫະພັນບານເຕະແຫ່ງຊາດລາວໄດ້ມອບລິຂະສິດໃຫ້ສະຖານີໂທລະພາບທີວີລາວເປັນຜູ້ຖ່າຍທອດລາວພຣີເມຍລີກ 2016-2018ເປັນຈຳນວນ 3 ປີ ໂດຍໃຫ້ກຽດເຊັນສັນຍາໂດຍທ່ານ ປະສາດໄຊ ພິລາພັນເດຊ ຮັກສາການປະທານສະຫະພັນບານເຕະແຫ່ງຊາດລາວ , ທ່ານ ດຣ ຫົງຄຳ ສຸວັນນະວົງ ປະທານສະຖານີໂທລະພາບທີວີລາວ ເຂົ້າຮ່ວມເປັນສັກຂີພິຍານມີ ທ່ານຄຳໄພ ປະເສີດ ຮອງປະທານສະຫະພັນບານເຕະແຫ່ງຊາດລາວ , ທ່ານ ດຣ ໄຊບັນດິດ ຣາຊະພົນ ເລຂາທິການສະຫະພັນບານເຕະແຫ່ງຊາດລາວ ແລະ ສື່ມວນຊົນເຂົ້າຮ່ວມ. 

ສຳລັບເນື້ອໃນສັນຍາການຖ່າຍທອດສົດ ລາວພຣີເມຍລີກໄດ້ລະບຸໄວ້ວ່າສະຖານີໂທລະພາຍທີວີລາວ ມີຫນ້າທີ່ຮັບຜິດຊອບການຖ່າຍທອດສົດກາແຂ່ງຂັນ ລາວພຣີເມຍລີກ 52ນັດ ແລະ ຈະຕ້ອງຖ່າຍ 2 ນັດຕໍ່ອາທິດ ແລະ ຖ່າຍທອດສົດ ຫລື ເທັບບັນທຶກ 48 ນັດ ລວມທັງຫມົດທີ່ຈະຕ້ອງຖ່າຍ ແລະ ບັນທຶກເທັບຈຳນວນ 100ນັດ. ພ້ອມກັນນັ້ນຍັງມີຫນ້າ ທີ່ຜະລິດລາຍການ ລາວພຣີເມຍລີກ ເຊິ່ງເປັນລາຍການ 60 ນາທີ ເປັນລາຍການວິເຄາະ , ລາຍງານອັບເດດການແຂ່ງຂັນ ,ລາຍງານການເຄື່ອນໄຫວຂອງລາວພຣີເມຍລີກ ແລະ ສະຫະພັນບານເຕະແຫ່ງຊາດລາວໂດຍອອກອາກາດ 1 ຄັ້ງຕໍ່ອາທິດ. 

ລາວພຣີເມຍລີກ 2016 ຈະເລີ່ມເປີດສາກຄວາມມັນໃນວັນທີ 26 ມີນາ ສຳລັບປີນີ້ມີ 14 ສະໂມສອນ ເຂົ້າຮ່ວມຄື :
1. ລາວໂຕໂຢຕ້າ .
2. ລ້ານຊ້າງ ຢູໄນເຕັດ
3. ຊ້າງນ້ອຍ
4. ກະຊວງ ປ້ອງກັນຄວາມສະຫງົບ ຫລື ປກສ
5. ໄອດີຊີ ຈໍາປາສັກ ຢູໄນເຕັດ
6. ອິສເຕີນສະຕຣາ
7. ກະຊວງ ປ້ອງກັນປະເທດ ຫລື ກອງທັບ
8. ມະຫາວິທະຍາໄລແຫ່ງຊາດ ຫລື ມຊ
9. ໄຟຟ້າລາວ
10.ເອສຣາ
11. ສະຫວັນ ຢູໄນເຕັດ
12.CSC ຈໍາປາ
13. VSV ຢູໄນເຕັດ
14. ໄຊທານີ ຊິດຕີ້

ແຫລ່ງຂ່າວຈາກ: Lao Football News ຂ່າວສານບານເຕະລາວ