ທະນາຄານ​ພັດທະນາ​ລາວ ແລະ ລັດ​ວິ​ສາ​ຫະ​ກິດ​ໄຟຟ້າ​ລາວ ຈັດ​ຖະແຫຼງ​ຂ່າວ ການ​ຊຳລະ​ຄ່າ​ຊົມໃຊ້​ພະລັງງານ​ໄຟຟ້າ ຜ່ານ​ລະບົບ​ທັນ​ສະໄໝ ທະນາຄານ​ພັດທະນາ​ລາວ​ຂຶ້ນ ວັນ​ທີ 25 ເມສາ 2014 ທີ່​ຜ່ານ​ມາ ຢູ່​ທີ່​ລັດ​ວິ​ສາ​ຫະ​ກິດ​ໄຟຟ້າ​ລາວ ໂດຍ​ໃຫ້​ກຽດ​ຖະແຫຼງ​ຂ່າວ​ແມ່ນ​ທ່ານ ບົວ​ລຽນ ພົມ​ມະ​ວົງສາ ອຳນວຍ​ການ​ທະນາຄານ​ພັດທະນາ​ລາວ ມີ​ທ່ານ ດວງ​ສີ ພະ​ລາ​ຍົກ ຮອງ​ຜູ້ອຳນວຍການ​ລັດ​ວິ​ສາ​ຫະ​ກິດ​ໄຟຟ້າ​ລາວ ມີ​ບັນດາ​ຫ້ອງການ​ລູກ​ຄ້າ​ທີ່​ໃຊ້​ບໍລິການ ພະນັກງານ​ທີ່​ກ່ຽວຂ້ອງ​ເຂົ້າ​ຮ່ວມ.

ທະນາຄານ​ພັດທະນາ​ລາວ ມີ​ຕາ​ນ່າງ​ບໍລິການ​ທີ່​ກວ້າງຂວາງ​ໃນ​ທົ່ວ​ປະເທດ ປະກອບ​ມີ 18 ສາຂາ 67 ໜ່ວຍ​ບໍລິການ 12 ໜ່ວຍ​ແລກປ່ຽນ ມີ​ຕູ້ ATM ທັງ​ໝົດ 170 ໜ່ວຍ ແລະ ມີ​ເຄື່ອງຮັບ​ບັດ​ຫຼາຍ​ກວ່າ 50 ເຄື່ອງ ພ້ອມ​ໃຫ້​ບໍລິການ​ແກ່​ສັງຄົມ​ຕະຫຼອດ 24 ຊົວ​ໂມງ ທະນາຄານ​ພັດທະນາ​ລາວ ມີ​ການ​ຍົກ​ລະດັບ​ການ​ບໍລິການ​ຫັນ​ເປັນ​ທັນ​ສະໄໝ ສະດວກ​ສະບາຍ ສ້າງ​ຄວາມ​ເຂັ້ມແຂງ​ດ້ານ​ທຶນຮອນ​ເທັກ​ໂນ​ໂລ​ຊີ ແລະ ບຸກ​ຄະລາ​ກອນ ເພື່ອ​ເປັນ​ພື້ນຖານ​ສຳຄັນ ທີ່​ສາມາດ​ແຂ່ງຂັນ​ໃນ​ເວທີ​ພາກ​ພື້ນ ແລະ ສາກົນ ນັບ​ແຕ່​ປີ 2010 ທະນາຄານ​ພັດທະນາ​ລາວ ຫັນ​ມາ​ນຳ​ໃຊ້​ລະບົບ Core Banking(T24) ທີ່​ມີ​ຄວາມ​ທັນ​ສະໄໝ ແລະ ພຽງ 1 ປີ ສາມາດ​ພັດທະນາ ແລະ ເປີດ​ນຳ​ໃຊ້​ລະບົບ​ດັ່ງກ່າວ​ສຳເລັດ ສາມາດ​ເຊື່ອມ​ໂຍງ​ກັນ​ໄດ້​ໃນ​ທຸກ​ສາຂາ​ທົ່ວ​ປະເທດ ເພື່ອ​ຕອບ​ສະໜອງ​ຕາມ​ຄວາມ​ຮຽກຮ້ອງ​ຕ້ອງການ​ຂອງ​ສັງຄົມ ທັງ​ພາຍ​ໃນ ແລະ ຕ່າງປະເທດ ສາມາດ​ເຂົ້າ​ເຖິງ​ການ​ບໍລິການ​ຂອງ​ທະນາຄານ​ໄດ້​ຫຼາຍ​ຊ່ອງ​ທາງ ເປັນຕົ້ນ​ແມ່ນ ບັດ ATM Mobile Banking Online Statement Bill Payment ບັດ​ສາກົນ VISA ແລະ ອື່ນໆ ຊຶ່ງ​ມີ​ຫຼາຍ​ຮູບ​ແບບ​ການ​ບໍລິການ​ເຊັ່ນ: ຊຳລະ​ຄ່າ​ຊົມໃຊ້​ພະລັງງານ​ໄຟຟ້າ ຊຳລະ​ຄ່າ​ນ້ຳ​ປະປາ ຊຳລະ​ຄ່າ​ໂທລະສັບ​ທຸກ​ເຄືອ​ຂ່າຍ ຊຳລະ​ຄ່າ​ອິນ​ເຕີ​ເນັດ ຊື້​ບັດ​ເຕີມ​ເງິນ ຊື້​ຫວຍ​ອອນ​ລາຍ ໂອນ​ເງິນ​ພາຍ​ໃນ ກວດ​ອັດຕາ​ແລກປ່ຽນ ກວດ​ຜົນ​ຮຸ້ນ ກວດ​ຍອດ​ເງິນ​ໃນ​ບັນຊີ ກວດກາ​ທຸລະ​ກຳ​ຕ່າງໆ​ທີ່​ເຄື່ອນ​ໄຫວ​ໃນ​ບັນຊີ ໂດຍ​ຜ່ານ​ລະບົບ Mobile Banking ແລະ ຕູ້ ATM ຜ່ານ​ເຄື່ອງ​ຮູດ​ບັດ EDC ແລະ ເຄື່ອງ Kios ຂອງ​ທະນາຄານ​ພັດທະນາ​ລາວ ໄດ້​ທຸກ​ເວລາ.

ທີ່ມາ http://www.vientianemai.net/teen/khao/1/11650