ວັນທີ 19 ກຸມພາ 2016 ຜ່ານມາ ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ໄດ້ພົບປະເຮັດວຽກກັບທ່ານ ຟູມິໂອະ ກິຊີດະ ລັດຖະມົນຕີວ່າການກະຊວງການຕ່າງປະເທດຍີ່ປຸ່ນ ທີ່ໂຕກຽວ ເພື່ອເສີມຂະຫຍາຍຄູ່ຮ່ວມມືຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ.
ການພົບປະຄັ້ງນີ້ ທັງສອງຝ່າຍໄດ້ສະແດງຄວາມຍິນດີ ແລະ ຕີລາຄາສູງຕໍ່ໝາກຜົນຂອງການພົວພັນຮ່ວມມື ທີ່ມີມູນເຊື້ອອັນດີງາມລະຫວ່າງສອງປະເທດ ໃນໄລຍະ 60 ປີຜ່ານມາ ເຊິ່ງນັບມື້ໄດ້ຮັບການຂະຫຍາຍຕົວຢ່າງບໍ່ຢຸດຢັ້ງ ໂດຍສະເພາະ ສອງປະເທດໄດ້ສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ຄົບຮອບ 60 ປີ ຢ່າງຄຶກຄື້ນໃນປີ 2015 ຜ່ານມາ ໂດຍໄດ້ມີການແລກປ່ຽນການຢ້ຽມຢາມ ລະຫວ່າງການນຳຂັ້ນສູງຂອງສອງປະເທດ ທັງສອງຝ່າຍໄດ້ມີການຍົກລະດັບການພົວພັນ ການຮ່ວມມືຂຶ້ນມາເປັນຄູ່ຮ່ວມມືຍຸດທະສາດ ເຮັດໃຫ້ການພົວພັນລະຫວ່າງສອງປະເທດ ມີການເຕີບໃຫຍ່ຂະຫຍາຍຕົວຂຶ້ນສູ່ລະດັບສູງ ເປັນຕົ້ນ ທາງດ້ານເສດຖະກິດ ແລະ ການລົງທຶນ ເຊິ່ງການລົງທຶນຂອງຍີ່ປຸ່ນຢູ່ລາວ ໄດ້ເພີ່ມຂຶ້ນຢ່າງໄວວາໃນຊຸມປີຜ່ານມາ ແລະ ປັດຈຸບັນມີນັກທຸລະກິດຍີ່ປຸ່ນເຂົ້າມາລົງທຶນຢູ່ລາວ ຈຳນວນ 130 ບໍລິສັດ ໄດ້ສ້າງວຽກເຮັດງານທຳ ສ້າງລາຍໄດ້ໃຫ້ແກ່ປະຊາຊົນທ້ອງຖິ່ນຂອງລາວ ແລະ ທັງເປັນການພັດທະນາສີມືແຮງງານລາວ ການສ້າງຕັ້ງສູນອາຊີມູນນິທິຍີ່ປຸ່ນ (Japan Foundation Asia Center) ຢູ່ນະຄອນຫຼວງວຽງຈັນ ໃນທ້າຍປີ 2015 ກໍ່ຈະສ້າງຜົນປະໂຫຍດອັນດີ ໃຫ້ແກ່ການສົ່ງເສີມຄວາມຮັບຮູ້ ແລະ ເຂົ້າໃຈຂອງປະຊາຊົນສອງຊາດ ກ່ຽວກັບວັດທະນະທຳ ແລະ ຮີດຄອງປະເພນີຂອງທັງສອງປະເທດຫຼາຍຂຶ້ນ ພ້ອມທັງເປັນການສົ່ງເສີມການທ່ອງທ່ຽວລະຫວ່າງລາວ ແລະ ຍີ່ປຸ່ນ ໃຫ້ນັບມື້ຫຼາຍຂຶ້ນກວ່າເກົ່າ ພ້ອມດຽວກັນ ສອງຝ່າຍກໍ່ໄດ້ຕີລາຄາສູງຕໍ່ການຊ່ວຍເຫຼືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ໂດຍສອງຝ່າຍໄດ້ແຈ້ງໃຫ້ກັນຊາບ ກ່ຽວກັບສະພາບພົ້ນເດັ່ນຂອງແຕ່ລະປະເທດ ເປັນຕົ້ນ ການເປັນປະທານໝູນວຽນອາຊຽນ ຄັ້ງທີ 2 ຂອງລາວ ໃນປີ 2016 ພາຍໃຕ້ຄຳຂວັນ: “ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ” ເຊິ່ງເປັນປີທີ່ມີຄວາມໝາຍສຳຄັນສຳລັບອາຊຽນ ເພາະວ່າເປັນປີທຳອິດຂອງການເປັນປະຊາຄົມອາຊຽນ ພາຍຫຼັງໄດ້ຮັບການສ້າງຕັ້ງຢ່າງເປັນທາງການ ໃນວັນທີ 31 ທັນວາ 2015.
ຂໍ້ມູນຈາກ http://www.vientianemai.net/