ເກີດເລື່ອງໜ້າເສົ້າຜົວໃຊ້ມີດແທງເມຍຕົນເອງຈົນເສຍຊີວິດຢູ່ພາຍໃນເຮືອນຫຼັງຜິດຖຽງກັນ, ຜົວຫ້າມບໍ່ໃຫ້ເມຍໄປຮຽນບຳລຸງພາສາອັງກິດ ຕອນເຊົ້າວັນທີ 18 ກຸມພານີ້, ເຈົ້າໜ້າທີ່ພິສູດຫຼັກຖານ, ສືບສວນ-ສອບສວນ ປກສ ນະຄອນຫຼວງວຽງຈັນ ໄດ້ລົງກວດກາສະຖານທີ່ເກີດເຫດຄາຕະກຳຢູ່ບ້ານດອນໜູນ ເມືອງໄຊທານີ ນະຄອນຫຼວງວຽງຈັນ, ພົບເຫັນນາງ ຄຳພຽນ ອາຍຸ 46 ປີ ອາຊີບພະນັກງານຄູໂຮງຮຽນປະຖົມແຫ່ງໜຶ່ງຢູ່ນະ ຄອນຫຼວງວຽງຈັນ, ນອນຈົມກອງເລືອດ ຫຼັງຖືກທ້າວ ໄກສອນ ອາຍຸ 42 ປີ ອາຊີບກຳມະກອນ (ຜົວຜູ້ກ່ຽວ), ໃຊ້ມີດແຕ່ງກິນແທງໃສ່ຮ່າງກາຍຈຳນວນ 10 ກວ່າບາດ ຈົນເຮັດໃຫ້ເສຍຊີວິດຄາທີ່, ຫຼັງເກີດເຫດທ້າວ ໄກສອນ ໄດ້ກິນນ້ຳກົດກ້ອນເຂົ້າໄປເພື່ອຫວັງຂ້າຕົວຕາຍຕາມ ແຕ່ເຈົ້າໜ້າທີ່ເຂົ້າຊ່ວຍເຫຼືອໄດ້ທັນ ແລະນຳສົ່ງໂຮງໝໍ.
ທ້າວ ຄຳມຸ່ນ ອາຍຸ 48 ປີ ຢູ່ບ້ານດອນໜູນຍາດຜູ້ເສຍຊີວິດໄດ້ໃຫ້ການຕໍ່ເຈົ້າໜ້າທີ່ວ່າ: ກ່ອນເກີດເຫດເວລາປະມານ 16 ໂມງຂອງວັນທີ 17 ກຸມພາ, ຕົນເອງພ້ອມດ້ວຍຍາດພີ່ນ້ອງໄດ້ພາກັນມາສຶກສາອົບຮົມຄອບຄົວຂອງຜູ້ກ່ຽວ, ຍ້ອນຜິດຖຽງກັນຢ່າງຮຸນແຮງ, ສາເຫດຂອງເລື່ອງແມ່ນຍ້ອນຜູ້ເສຍຊີວິດຈະໄປຝຶກອົບຮົມບຳລຸງພາສາອັງກິດຢູ່ໂຮງຮຽນທ່າງ່ອນ ເປັນເວລາ 3 ວັນ, ແຕ່ຜູ້ເປັນຜົວບໍ່ຢາກໃຫ້ໄປ, ຮອດເວລາ 21 ໂມງຍາດພີ່ນ້ອງຈິ່ງພາກັນກັບໝົດຈິ່ງເກີດເລື່ອງໜ້າເສົ້າດັ່ງກ່າວຂຶ້ນ.
ທີ່ມາ: ນສພ ເສດຖະິກດ-ສັງຄົມ
