ສຳນັກຂ່າວຕ່າງປະເທດ ລາຍງານໃນວັນທີ 17 ກຸມພາຜ່ານມານີ້ວ່າ ນະຄອນທຽນຈິນ ປະເທດຈີນ ໄດ້ສັ່ງຍ້າຍໂຮງງານສານເຄມີ ທີ່ຕັ້ງຢູ່ໃກ້ກັບເຂດທີ່ຢູ່ອາໄສຫລາຍເກີນໄປ ເພື່ອປ້ອງກັນເຫດຊ້ຳຮອຍ ຈາກສາງເຄມີລະເບີດຮຸນແຮງ ເມື່ອຫົກເດືອນກ່ອນໜ້ານີ້ ໂດຍທາງການໄດ້ກວດພົບ ໂຮງງານສານເຄມີ ທີ່ມີບັນຫາທັງໝົດ 85 ແຫ່ງ ໃນນັ້ນມີ 10 ແຫ່ງ ຕັ້ງຢູ່ໃກ້ກັບບ່ອນຢູ່ອາໄສຂອງປະຊາຊົນຫລາຍເກີນໄປ.

ທັງນີ້ ເນື່ອງຈາກໃນວັນທີ 12 ສິງຫາ 2015 ຜ່ານມາ ນະຄອນທຽນຈິນ ໄດ້ປະເຊີນກັບເຫດການ ສາງເຄມີລະເບີດຮຸນແຮງ ສ້າງຄວາມເສຍຫາຍແກ່ອາຄານ 304 ແຫ່ງ, ລົດໃຫຍ່ 12,428 ຄັນ ແລະ ຕູ້ຄອນເທັນເນີ້ອີກ 7,533 ໜ່ວຍ ສ້າງຄວາມເສຍຫາຍກວ່າ 6.87 ຕື້ຢວນ ມີຜູ້ເສຍຊີວິດ 173 ຄົນ ແລະ ບາດເຈັບອີກ 798 ຄົນ.