ບໍລິສັດ ເອັສຊີລໍ ຊຶ່ງເປັນນັກລົງທຶນຈາກປະເທດຝຣັ່ງ ຜູ້ຜະລິດແກ້ວແວ່ນຕາລາຍໃຫຍ່ລະດັບໂລກລົງທຶນ 112 ຕື້ກີບ ຕັ້ງຖານການຜະລິດແກ້ວແວ່ນຕາຢູ່ເຂດເສດຖະກິດພິເສດສະຫວັນເຊໂນ ແຂວງສະຫວັນນະເຂດ ດ້ວຍກຳລັງການຜະລິດ 15 ລ້ານເລນຕໍ່ປີ ເພື່ອສົ່ງອອກ.
ພິທີເປີດໂຮງງານເອັສຊີລໍ ຈຳກັດ ຜະລິດແກ້ວແວ່ນຕາ ໄດ້ຈັດຂຶ້ນເປັນທາງການໃນຕອນບ່າຍຂອງວັນທີ 2 ເມສາ 2014 ທີ່ເຂດເສດຖະກິດພິເສດສະຫວັນເຊໂນ (ຂສສຊ) ຈຸດ C ເມືອງໄກສອນພົມວິຫານ ໂດຍການເປັນກຽດເຂົ້າຮ່ວມຂອງ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ທັງເປັນປະທານຄະນະກຳມະການແຫ່ງ ຊາດລາວ ເພື່ອຄຸ້ມຄອງເຂດເສດຖະກິດພິເສດ ແລະ ເສດຖະກິດສະເພາະ, ທ່ານ ດຣ. ລຽນ ທິແກ້ວ ລັດຖະມົນຕີວ່າການກະຊວງການເງິນ, ທ່ານ ດຣ. ສຸພັນ ແກ້ວມີໄຊ ເຈົ້າແຂວງສະຫວັນນະເຂດ, ທ່ານ ດຣ. ບຸນກອງ ສີຫາວົງ ລັດຖະມົນຕີຊ່ວຍວ່າການກະຊວງສາທາລະນະສຸກ, ທ່ານ ອິບຟ ຄາໂມນາ ເອກອັກຄະລັດຖະທູດປະເທດຝຣັ່ງ ປະຈຳລາວ ນອກນັ້ນ ຍັງມີບັນດາທ່ານການນຳຂັ້ນສູງຈາກສູນກາງ ແລະ ການນຳຂອງແຂວງ ຕະຫຼອດເຖິງບໍລິ ສັດ ແລະ ແຂກຈາກພາກສ່ວນຕ່າງໆເຂົ້າຮ່ວມ.
ທ່ານ ກິດຕິພົງ ທົງຕາກົບ ອຳນວຍການບໍລິສັດໄດ້ລາຍງານໃຫ້ຮູ້ວ່າ: ໂຮງງານເອັສຊີລໍ ຈຳກັດ ຊຶ່ງເປັນບໍລິສັດນຳໜ້າຂອງໂລກ ໃນການຜະລິດແກ້ວແວ່ນຕາ ແລະ ກໍເປັນໂອກາດອັນດີທີ່ ສປປ ລາວ ໄດ້ຮັບການຄັດເລືອກໃນການສ້າງຕັ້ງໂຮງງານ. ໃນເດືອນກຸມພາ ປີ 2012 ໂຄງການຂອງເອັສຊີລໍລາວ ກໍໄດ້ຮັບການເລີ່ມຕົ້ນຂຶ້ນ ພາຍໃຕ້ການຊີ້ນຳຂອງທ່ານ ເຈີຫຼາດ ມາເລີແດນ ຫົວໜ້າໂຄງການ ໂດຍໄດ້ຮັບຄຳແນະນຳຈາກນັກທຸລະກິດດ້ວຍກັນ. ຕໍ່ມາບໍລິສັດຈິ່ງໄດ້ຕັດສິນໃຈມາລົງທຶນຢູ່ເຂດ C ຂອງເຂດເສດຖະກິດພິເສດສະຫວັນເຊໂນ ຫຼື ສະຫວັນປາກ.
ທ່ານ ກິດຕິພົງ ກ່າວໃຫ້ຮູ້ຕື່ມວ່າ: ໃນເດືອນສິງຫາ 2012 ໄດ້ມີການຈົດທະບຽນບໍລິສັດ ຈາກນັ້ນ ໃນເດືອນມີນາ 2013 ກໍໄດ້ເລີ່ມຕົ້ນໂຄງການກໍ່ສ້າງມາຮອດເດືອນສິງຫາກໍໄດ້ນຳເອົາເຄື່ອງຈັກເຂົ້າມາຕິດຕັ້ງ ພ້ອມທັງເລີ່ມທົດລອງຜະລິດ, ຮອດເດືອນທັນວາ 2013 ຈິ່ງໄດ້ເລີ່ມຕົ້ນຜະລິດ ຊຶ່ງມີກຳລັງການຜະລິດ 15 ລ້ານເລນຕໍ່ປີ ເພື່ອສົ່ງອອກໄປຈຳໜ່າຍໃນທົ່ວໂລກປະຈຸບັນມີແຮງານ ແລະ ພະນັກງານທັງໝົດ 100 ກວ່າຄົນ, ຖ້າຜະລິດເຕັມກຳລັງຈະນຳໃຊ້ພະນັກງານທັງໝົດ 300 ຄົນ.
ໂຮງງານ ເອັສຊີລໍ ມີມູນຄ່າລົງທຶນເບື້ອງຕົ້ນ 112 ຕື້ກີບ ຫຼື ເທົ່າກັບ 14 ລ້ານໂດລາສະຫະລັດ ນອກຈາກເປົ້າ ໝາຍທາງດ້ານທຸລະກິດແລ້ວ ບໍລິສັດຍັງມີເປົ້າໝາຍໃນການພັດທະນາຮ່ວມກັບຊຸມຊົນ ແລະ ສັງຄົມຂອງ ສປປ ລາວ, ໃນຜ່ານມາ ກໍໄດ້ຮ່ວມມືກັບໂຮງຮຽນວິທະຍາໄລໄຊສົມບັດເຕັກໂນໂລຊີໄດ້ສ້າງສູນອົບຮົມ ເພື່ອສົ່ງເສີມທັກສະດ້ານເຕັກນິກ ແລະ ອຸດສາຫະກຳໃຫ້ແກ່ວິຊາການ ແລະ ການຮ່ວມມືໃນດ້ານອື່ນໆອີກ.
ໃນເວລາຕໍ່ມາ ຄະນະບໍລິຫານງານເອັສຊີລໍ, ທ່ານເຈົ້າແຂວງສະຫວັນນະເຂດ, ທ່ານເອກອັກຄະລັດຖະທູດຝຣັ່ງປະຈຳລາວ, ທ່ານຫົວໜ້າເຂດເສດຖະກິດພິເສດ ສະຫວັນເຊໂນ ກໍໄດ້ຜັດ ປ່ຽນກັນຂຶ້ນປະກອບຄຳເຫັນ, ຈາກນັ້ນ ພະນະທ່ານ ສົມສະຫວາດ ເລັ່ງສະຫວັດ ພ້ອມດ້ວຍຄະນະປະທານກໍໄດ້ຮ່ວມກັນຕັດແຖບຜ້າ, ລັ່ນຄ້ອງ ເພື່ອເປັນສັນຍະລັກໃນການເປີດໂຮງງານຢ່າງເປັນທາງການ.
ທີ່ມາ http://www.sedthakid.la/khao/18406.spc