spot_img
Homeຂ່າວເຫດການສະຫາຍເລຂາທິການໃຫຍ່ ຕ້ອນຮັບຜູ້ຕາງໜ້າພິເສດ ພັກແຮງງານເກົາຫລີ!

ສະຫາຍເລຂາທິການໃຫຍ່ ຕ້ອນຮັບຜູ້ຕາງໜ້າພິເສດ ພັກແຮງງານເກົາຫລີ!

Published on

ຂປລ. ວັນ​ທີ 11 ກຸມພານີ້ ສະຫາຍ ບຸນ​ຍັງ ວໍລະ​ຈິດ ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ ປະ​ຊາ​ຊົນ ປະຕິວັດລາວ ​ໄດ້​ໃຫ້​ກຽດ​ຕ້ອນຮັບ​ ການ​ເຂົ້າ​ຢ້ຽມ​ຄຳນັບ​ຂອງສະຫາຍ ກິມຢົງ​ຈົນ ເລຂາທິການ​ສູນ​ກາງ​ພັກ, ຫົວໜ້າ​ຄະນະ​ແນວ​ໂຮມ​ສູນ​ກາງ​ພັກ​ແຮງ​ງານ​ເກົາຫລີ ​ໃນ​ນາມ​ຜູ້ຕາງ​ໜ້າ​ພິ​ເສດ​ຂອງ​ສະຫາຍ ກິມ​ເຈິ​ງອຸນ ​ເລຂາທິ ການທີ ​ໜຶ່ງ​ພັກ​ແຮງ​ງານ​ເກົາຫລີ, ປະທານ​ທີ​ໜຶ່ງ​ຄະນະ​ກຳມາ​ທິການ​ປ້ອງ​ກັນຊາ​ດ ​ແຫ່ງ ສປປ ​ເກົາຫລີ ພ້ອມ​ດ້ວຍ​ຄະນະ ​ໃນ​ໂອກາດ​ເດີນທາງ​ມາ​ຢ້ຽມຢາມ ສປປ ລາວ ​ເພື່ອ​ຊົມຜົນສຳ​ເລັດ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ ​ຄັ້ງ​ທີ X ຂອງ​ພັກ​ປະຊາຊົນ ປະຕິວັດ​ລາວ.

ໂອກາດ​ດັ່ງກ່າວ, ສະຫາຍ ບຸນ​ຍັງ ວໍລະ​ຈິດ ​ໄດ້​ຕີ​ລາຄາ​ສູງ ​ແລະ ສະ​ແດງ​ຄວາມ​ຂອບ​​ໃຈ​ຢ່າງ​ຈິງ​ໃຈ ຕໍ່​ພັກ​ແຮງ​ງານ​ເກົາຫລີ ທີ່​ໄດ້​ແຕ່ງ​ຕັ້ງ​ຄະນະ​ມາ​ຊົມ​ເຊີຍ​ຜົນ​ກອງ​ປະຊຸມ​ໃຫຍ່ ​ຄັ້ງ​ທີ X ຂອງ​ພັກ ປປ ລາວ ​ໃນ​ຄັ້ງ​ນີ້, ​ເຊິ່ງ​ເປັນ​ການ​ໃຫ້​ກຳລັງ​ໃຈ​ອັນ​ແຮງ​ກ້າ ​ແກ່​ພັກ, ລັດຖະບານ ​ແລະ ປະຊາຊົນ​ລາວ​ບັນດາ​ເຜົ່າ, ​ເປັນ​ການສະ​ແດງ​ໃຫ້​ເຫັນ​ເຖິງ​ໄມຕີ​ຈິດ​ມິດຕະພາບ ​ອັນ​ເປັນ​ມູນ​ເຊື້ອ ​ ລະຫວ່າງ ສອງພັກ, ສອງລັດ ​ແລະ ປະຊາຊົນ​ສ​ອງຊາດ ສປປ ລາວ ​- ສປປ ​ເກົາຫລີ ພ້ອມ​ທັງ​ສະ​ແດງ​ຄວາມ​ພາກພູມ​ໃຈ​ເປັນ​ຢ່າງ​ຍິ່ງ ທີ່​ເຫັນ​ວ່າ​ ສາຍ​ພົວພັນ​ມິດຕະພາບ​ອັນ​ເປັນ​ມູນ​ເຊື້ອ ທີ່​ມີ​ມາ​ແຕ່​ດົນ​ນານ ລະຫວ່າງ​ ສອງ​ພັກ, ສອງ​ລັດ ​ແລະ ປະຊາຊົນ​ສອງ​ຊາດ ສປປ ລາວ-ສປປ ​ເກົາຫລີ ​ໂດຍ​ແມ່ນ​ການ​ນຳ​ລຸ້ນກ່ອນ ຂອງ​ສອງ​ປະ​ເທດ ​ຄື: ປະທານ ​ໄກສອນ ພົມວິຫານ ​ແລະ ປະທານ ກິ​ມອິນ​ຊຸງ ທີ່​ເຄົາລົບ​ຮັກ ​ເປັນ​ຜູ້ກໍ່​ຕັ້ງ, ສືບ​ຕໍ່​ໄດ້​ຮັບ​ການ​ເພີ່ມ​ພູນ​ຄູນ​ສ້າງ ​ແລະ ຂະຫຍາຍຕົວ​ຢ່າງ​ຕໍ່​ເນື່ອງ, ນຳ​ເອົາ​ຜົນ​ປະ​ໂຫຍ​ດມາ​ໃຫ້​ປະ​ເທດ​ທັງ​ສອງ.

ສະຫາຍ ​ ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ ປປ ລາວ ​ໄດ້​ຕາງໜ້າ​ໃຫ້​ພັກ, ລັດຖະບານ ​ແລະ ປະຊາຊົນ​ລາວ​ ບັນດາ​ເຜົ່າ ສະ​ແດງ​ຄວາມ​ຂອບ​ໃຈ​ຢ່າງ​ຈິງ​ໃຈ ຕໍ່​ພັກ, ລັດຖະບານ ​ແລະ ປະຊາຊົນ ສປປ ​ເກົາຫລີ ​ອ້າຍ​ນ້ອງ ທີ່​ໄດ້​ໃຫ້ການ​ສະໜັບສະໜູນ ​ແກ່​ພາລະກິດ​ຕໍ່ສູ້​ປົດ​ປ່ອຍ​ຊາ​ດ ​ໃນ​ເມື່ອ​ກ່ອນ ກໍ​ຄືພາລະກິດ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ ຂອງ​ປະຊາຊົນ​ລາວ​ ໃນ​ປັດຈຸບັນ ​ແລະ ຢືນຢັນ​ວ່າ ພັກ ປປ ລາວ ຈະ​ສື​ບຕໍ່​ຮັດ​ແໜ້ນ ​ແລະ ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ທີ່​ເປັນ​ມູນ​ເຊື້ອ ​ແລະ ການ​ຮ່ວມ​ມື​ກັບ ສປປ ​ເກົາຫລີ ​ໃຫ້​ແຕກ​ດອກ​ອອກ​ຜົນ​ຍິ່ງໆ​ຂຶ້ນ ​ເພື່ອ​ຜົນ​ປະ​​ໂຫຍ​ດຂອງ​ປະຊາຊົນ​ສອງ​ຊາດ ສປປ ລາ​ວ-ສປປ ​ເກົາຫລີ ກໍ​ຄື​ເພື່ອ​ພາລະກິດ​ສັນຕິພາບ, ມິດຕະພາບ ​ແລະ ການ​ຮ່ວມ​ມື ​ເພື່ອ​ພັດທະນາ​ໃນ​ຂົງ​ເຂດ ​ແລະ ​ໃນ​ໂລກ.

ໂອກາດ​ນີ້, ສະຫາຍ ກິມຢົງ​ຈົນ ​ໄດ້​ສະ​ແດງ​ຄວາມ​ຂອບ​ໃຈ​ເປັນ​ຢ່າງ​ສູງ ຕໍ່​ການ​ຕ້ອນຮັບ​ອັນ​ອົບ​ອຸ່ນ ຂອງ​ສະຫາຍ ​ເລຂາ​ທິການ​ໃຫຍ່ ບຸນ​ຍັງ ວໍລະ​ຈິດ ​ແລະ ​ໄດ້​ນຳ​ເອົາ​ຄວາມ​ຢື້​ຢາມ​ຖາມ​ຂ່າວ, ອວຍພອນ​ໄຊ​ອັນ​ປະ​ເສີດ ຂອງ​ສະຫາຍ ກິມ​ເຈິ​ງອຸນ ມາ​ຍັງ​ສະຫາຍ ບຸນ​ຍັງ ວໍລະ​ຈິດ ທີ່​ໄດ້​ຮັບ​ການ​ເລືອກ​ຕັ້ງ​ໃຫ້​ດຳລົງ​ຕຳ​ແໜ່​ງ​ເປັນ​ເລຂາທິການ​ໃຫຍ່​ຄະນະ​ ບໍລິຫານ​ງານ​ສູນ​ກາງ​ພັກ ປປ ລາວ ​ໃນ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ ​ຄັ້ງ​ທີ X ຂອງ​ພັກ​ປະຊາຊົນ ປະຕິວັດ​ລາວ ພ້ອມ​ທັງ ສະ​ແດງ​ຄວາມ​ຊົມ​ເຊີຍ ຕໍ່​ຜົນສຳ​ເລັດ​ກອງ​ປະ​ຊຸມ​ໃຫຍ່ ​ຄ​ັ້ງທີ X ຂອງ​ພັກ ປປ ລາວ ​ເຊິ່ງ​ແມ່ນ​ເຫ​ດການ​ການ​ເມືອງ​ທີ່​ມີ​ຄວາມ​ສຳຄັນ​ ໃນ​ຊີ​ວີ​ດການ​ເມືອງ-ສັງຄົມ ຂອງ ສປປ ລາວ, ​ເປັນ​ຂີດ​ໝາຍ​ທີ່​ສຳຄັນ​ໃນ​ໄລຍະ​ໃໝ່ ​ແຫ່ງ​ການ​ພັດທະນາ​ຂອງ​ການ​ປະຕິວັດ​ລາວ.

ສະຫາຍ ກິມຢົງ​ຈົນ ສະ​ແດງ​ຄວາມ​ປີຕິ​ຊົມ​ຊື່ນ​ເປັນ​ຢ່າງ​ຍິ່ງ ຕໍ່​ໜາ​ກຜົນ​ແຫ່ງ​ການ​ພັດທະນາ​ຂອງ ສປປ ລາວ ຕະຫລອດ​ໄລຍະ 40 ປີ ຜ່ານ​ມາ ​ໂດຍ​ສະ​ເພາະ​ແມ່ນ​ໄລຍະ 30 ປີ ​ແຫ່ງ​ການ​ປະຕິບັດ​ແນວທາງ​ປ່ຽນ​ແປງ​ໃໝ່​ຮອບດ້ານ, ພາຍ​ໃຕ້​ການ​ນຳພາ​ອັນ​ສະຫລາດ​ສ່ອງ​ໃສ​ຂອງ​ພັກ​ປະຊາຊົນ ປະຕິວັດ​ລາວ, ປະຊາຊົນ​ລາວ​ອ້າຍ​ນ້ອງ ສາມາດ​ຍາດ​ໄດ້ຜົນ​ສຳ​ເລັດ​ອັນ​ໃຫຍ່​ຫລວງ, ຮອບດ້ານ ​ແລະ ມີ​ຄວາມ​ໝາຍ​ປະຫວັດສາດ ​ເຊິ່ງ​ເຮັດ​ໃຫ້​ຊ່ວງ​ທ່າ ​ແລະ ກຳລັງ​ແຮງ​ຂອງ ສປປ ລາວ​ ນັບ​ມື້​ໄດ້​ຮັບ​ການ​ຂະຫຍາຍຕົວ​ຢ່າງ​ບໍ່​ຢຸດ​ຢັ້ງ, ບົດບາດ ​ແລະ ອິດ​ທິພົນ ຂອງ ສປປ ລາວ ​ນັບ​ມື້​ສູງ​ເດັ່ນ​ຂຶ້ນ​ໃນ​ເວທີ​ພາກ​ພື້ນ ​ແລະ ສາກົນ ພ້ອມ​ທັງ ​ເຊື່ອ​ໜັ້ນຢ່າງ​ໜັ້ກ​ແໜ້ນ​ວ່າ ພາຍ​​ໃຕ້​ການ​ນຳພາ​ອັນ​ຖືກຕ້ອງ, ສະຫລາດ ​ສ່ອງ​ໃສ ​ຂອງ​ພັກປະຊາຊົນ ປະຕິວັດ​ລາວ ​ໂດຍ​ມີ​ສະຫາຍ ບຸນ​ຍັງ ວໍລະ​ຈິດ ​ເປັນ​ຜູ້ນຳ​ໜ້າ​ນັ້ນ, ປະຊາຊົນ​ລາວ ບັນດາ​ເຜົ່າ ຈະ​ສືບ​ຕໍ່​ຍາດ​ໄດ້​ບັນດາ​ຜົນສຳ​ເລັດ​ໃໝ່ ​ໃຫຍ່​ຫລວງ​ກວ່າ​ເກົ່າ ​ໃນ​ພາລະກິດ​ປ່ຽນ​ແປງ​ໃໝ່, ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ, ຈັດ​ຕັ້ງ​ຜັນ​ຂະຫຍາຍ​ບັນດາ​ມະຕິ​ຂອງ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ ຄັ້ງ​ທີ X ຂອງ​ພັກ​ວາງ​ອອກ​ຢ່າງ​ມີ​ໄຊ, ສ້າງ​ປະ​ເທດ​ຊາດ​ໃຫ້​ມີ​ຄວາມ​ມັ່ງ​ຄັ່ງ, ປະຊາຊົນ​ຮັ່ງມີ, ສັງຄົມ​ມີ​ຄວາມ​ສາມັກຄີ​ປອງ​ດອງ, ຍຸຕິ​ທຳ ​ແລະ ສີວິ​ໄລ.

ໃນ​ວັນ​ດຽວ​ກັນ ສະຫາຍ ກິມຢົງ​ຈົນ ກໍ​ໄດ້​ເຂົ້າ​ພົບ​ປະ​ສອງ​ຝ່າຍ ກັບ​ສະຫາຍ ສຈ.ປອ ກິ​ແກ້ວ ​ໄຂ​ຄຳ​ພິທູນ ຄະນະ​ເລຂາທິການ​ສູນ​ກາງ​ພັກ, ຫົວໜ້າ​ຄະນະ​ໂຄສະນາ​ອົບຮົມ​ສູນ​ກາງ​ພັກ ​ເຊັ່ນ​ດຽວ​ກັນ.

 

ແຫລ່ງຂ່າວ:

ຂປລ

ບົດຄວາມຫຼ້າສຸດ

ສົ່ງເສີມການທ່ອງທ່ຽວທາງທຳມະຊາດໃນລາວ ໂອກາດການທ່ອງທ່ຽວໃນເຂດປ່າໄມ້ຂອງລາວແບບເປີດກວ້າງ ພ້ອມກັບສ້າງວຽກເຮັດງານທຳໃຫ້ກັບແມ່ຍິງເຖິງ 75,000 ຄົນ

ກະຊວງ ກະສິກໍາ ແລະ ສິ່ງແວດລ້ອມ ໄດ້ອອກຂໍ້ຕົກລົງ ສະບັບ ເລກທີ 1926/ກປ,ລົງວັນທີ 03 ມິຖຸນາ 2025. ຊຶ່ງຂໍ້ຕົກສະບັບດັ່ງກ່າວນີ້ໄດ້ເປັນປັດໃຈພື້ນຖານໃນການຊຸກຍູ້ ແລະ ສົ່ງເສີມການທ່ອງທ່ຽວທຳມະຊາດ...

ສະຫາຍນາງ ວຽງທອງ ສີພັນດອນ ໄດ້ຮັບເລືອກເປັນເລຂາຄະນະບໍລິຫານງານພັກ ສປສສ

ຂໍສະແດງຄວາມຊົມເຊີຍ ສະຫາຍນາງ ວຽງທອງ ສີພັນດອນ ໄດ້ຮັບເລືອກຕັ້ງເປັນເລຂາຄະນະບໍລິຫານງານພັກສານປະຊາຊົນສູງສຸດ (ສປສສ) ກອງປະຊຸມໃຫຍ່ສະມາຊິກພັກ ຄັ້ງທີ V ອົງຄະນະພັກສານປະຊາຊົນສູງສຸດ ປິດລົງດ້ວຍຜົນສຳ ເລັດຢ່າງຈົບງາມໃນວັນທີ 11 ກັນຍານີ້ ທີ່ນະຄອນຫຼວງວຽງຈັນ...

ຖືກກັກໂຕແລ້ວ ຈາກກໍລະນີແພດທຳຮ້າຍຮ່າງກາຍຄົນເຈັບ ຢູ່ຫວຽດນາມ ພົບເຄື່ອງມືບໍ່ໄດ້ມາດຕະຖານ ແລະ ບໍ່ມີໃບອະນຸຍາດ

ໃນວັນທີ 11 ກັນຍາ 2025 ທີ່ຜ່ານມາ, ເຈົ້າໜ້າທີ່ຕຳຫຼວດນະຄອນໂຮຈິມິນ ປະເທດຫວຽດນາມ ໄດ້ຈັບກຸມ ນາງ ຫວຽນ ຖິ ຕ່ວນ ຈິງ (Nguyen...

ຮູ້ຈັກກັບ Nepo Kids ກະແສຈາກລູກຫຼານນັກການເມືອງເນປານ ໃຊ້ຊີວິດອວດລວຍທ່າມກາງຄວາມລຳບາກຂອງປະຊາຊົນ

ເມື່ອບໍ່ດົນມານີ້ໄດ້ມີເຫດການປະທ້ວງລັດທະບານໃນປະເທດເນປານ ໃນວັນທີ 09/09/2025, ເຊິ່ງສາເຫດແມ່ນເກີດຈາກການອອກມາດຕະການຫ້າມປະຊາຊົນນໍາໃຊ້ສື່ສັງຄົມອອນລາຍ ແລະ ອີກໜຶ່ງສາເຫດຄືລັດຖະບານ ມີການສໍ້ລາດບັງຫຼວງ ເຮັດໃຫ້ຄົນນລຸ້ນໃໝ່ເກີດຄວາມບໍ່ພໍໃຈ. Nepo Kids ຫຼື ລູກເຈົ້າຫຼານເພິ່ນ ເຊິ່ງປະຊາຊົນວິພາກວິຈານລູກຫຼານນັກງານເມືອງ ເພາະພວກເຂົານັ້ນໄດ້ໃຊ້ຊີວິດຫຼູຫຼາ ແລະ...