ເຈົ້າໜ້າທີ່ ປກສ ເມືອງໄຊທານີ ໄດ້ຮັບແຈ້ງຄວາມຈາກການຈັດຕັ້ງບ້ານນາກຸງ ເມືອງໄຊທານີວ່າ: ມີຄົນຮ້າຍກຳລັງລັກຂ້າງົວຂອງປະຊາຊົນ, ເຈົ້າໜ້າທີ່ຈິ່ງໄດ້ລົງສົມທົບກັບການຈັດຕັ້ງກຸ່ມບ້ານນາກຸງແລ້ວ ເຂົ້າປິດລ້ອມບໍລິເວນທີ່ຄົນຮ້າຍກໍາລັງຂ້າງົວຢູ່ ແລະບຸກເຂົ້າຈັບກຸມຕົວຄົນຮ້າຍໄດ້ຊື່ ທ້າວ ຈື່ ຊໍ່ເຮີ່ ອາຍຸ 49 ປີ ຢູ່ບ້ານປາກແຮດ ເມືອງນາຊາຍທອງ ນະຄອນຫຼວງວຽງຈັນ ມາສືບສວນ-ສອບສວນໃນວັນທີ 8 ມັງກອນ 2016; ຈາກນັ້ນເຈົ້າໜ້າທີ່ໄດ້ສືບສວນຂະຫຍາຍຜົນຫາຜູ້ຊັດທອດສາມາດກັກຕົວ ທ້າວ ຊົ່ງຢາງ ອາຍຸ 52 ປີ ພັກເຊົາ ຢູ່ບ້ານຈັນສະຫວ່າງ ເມືອງສີໂຄດຕະບອງ ນະຄອນຫຼວງວຽງຈັນ ໃນວັນທີ 12 ມັງກອນ 2016 ໃນຂະນະທີ່ກໍາລັງຊອກຫາລັກງົວຂອງປະຊາຊົນ.
ຜ່ານການສືບສວນ-ສອບສວນ ທັງສອງໄດ້ຮັບສາລະພາບວ່າ: ໄດ້ເຄື່ອນໄຫວລັກຂ້າງົວຂອງປະຊາຊົນເພື່ອເອົາ ຊີ້ນໄປຂາຍມາແຕ່ຕົ້ນປີ 2015, ເປັນ ຈຳນວນທັງໝົດ 4 ຄັ້ງຄື: ຊ່ວງຕົ້ນປີ 2015 (ບໍ່ຈື່ເດືອນ ແລະບໍ່ຈື່ວັນທີ) ຢູ່ເຂດບ້ານປາກແຮດ ເມືອງນາຊາຍທອງ, ຄັ້ງທີ 2 ແມ່ນຫ່າງຈາກຄັ້ງທໍາອິດປະມານ 1 ເດືອນຢູ່ເຂດບ້ານຈໍາປາ ເມືອງນາຊາຍທອງ ຄັ້ງຕໍ່ມາແມ່ນໃນລະຫວ່າງເດືອນພະຈິກຂອງປີດຽວກັນເຂດບ້ານສີເກີດ-ໜອງບຶກ ແລະຄັ້ງສຸດທ້າຍໃນ ວັນທີ 8 ມັງກອນ 2016 ເຂດບ້ານນາກຸງ ເມືອງໄຊທານີ ໂດຍແຕ່ລະຄັ້ງແມ່ນໃຊ້ວິທີເອົາເກືອມາລໍ້ໃຫ້ງົວກິນ ເພື່ອສະດວກໃນການຈັບກ່ອນລົງມືຂ້າແລ້ວປາດເອົາແຕ່ 4 ຂາໃສ່ເປົາທີ່ກຽມມາໄປຂາຍທີ່ຕະຫຼາດເມື່ອໄດ້ເງິນມາກໍແບ່ງກັນ.
ຕໍ່ກັບຄະດີດັ່ງກ່າວນີ້ ເຈົ້າໜ້າທີ່ ປກສ ເມືອງໄຊທານີໄດ້ກ່າວວ່າ: ແມ່ນບັນຫາທີ່ສ້າງຜົນເສຍຫາຍໃຫ້ແກ່ພົນລະເມືອງຢ່າງຫຼວງຫຼາຍ ທັງເປັນການສ້າງຄວາມບໍ່ສະຫງົບໃຫ້ແກ່ສັງຄົມ, ດັ່ງນັ້ນ ຈິ່ງຢາກໃຫ້ປະຊາຊົນທຸກຄົນມີສະຕິລະວັງຕົວຢູ່ສະເໝີ, ຊ່ວຍກັນເປັນເຈົ້າການໃນການປົກປັກຮັກສາຊັບສິນທີ່ມີຄ່າລວມໄປເຖິງສັດລ້ຽງນ້ອຍ-ໃຫຍ່, ເມື່ອນໍາໄປປ່ອຍແລ້ວກໍຄວນໝັ່ນເບິ່ງໝັ່ນແຍງ ເພື່ອບໍ່ໃຫ້ກຸ່ມຄົນບໍ່ດີໄດ້ສວຍໂອກາດລັກເອົາໄປໄດ້.
ທີ່ມາ: 