ເຈົ້າອະທິການວັດປ່ານາລ້ອງ ບ້ານນາລ້ອງ ເມືອງຫາດ ຊາຍຟອງນະຄອນຫລວງວຽງຈັນ ໃຫ້ຮູ້ວ່າ: ໃນຄ່ຳຄືນວັນທີ 30 ມັງກອນ ຜ່ານມານີ້, ໄດ້ມີກຸ່ມຄົນຮ້າຍບໍ່ຮູ້ຈຳນວນໄດ້ເຂົ້າມາລັກ ເອົາພະພຸດທະຮູບທອງສຳລິດຈຳນວນ 5 ອົງ, ໃນນັ້ນມີ 1 ອົງທີ່ເປັນພະພຸດທະຮູບທີ່ເກົ່າແກ່ຂອງວັດ, ຊຶ່ງພາຍຫລັງເກີດເຫດ, ທາງວັດໄດ້ແຈ້ງໃຫ້ເຈົ້າໜ້າທີ່ລົງກວດກາເພື່ອຕິດຕາມຄົນຮ້າຍມາດຳເນີນຄະດີ.
ເຈົ້າໜ້າທີ່ພະແນກສືບສວນ-ສອບສວນ ປກສ ນະຄອນຫຼວງວຽງຈັນ ໃຫ້ຮູ້ວ່າ: ຈາກ ການລົງກວດກາສະຖານທີ່ເກີດເຫດຄົນຮ້າຍໄດ້ເຂົ້າໄປໃນກຸດຕິດຂອງວັດ ແລ້ວ ໃຊ້ຄີມຕັດກະແຈ, ຂະນະນັ້ນ ມີສາມະ ເນນ 2 ອົງ ທີ່ນອນເຝົ້າກຸດຕິດັ່ງກ່າວ, ຊຶ່ງພະພຸດທະຮູບທອງສຳລິດປາງນັ່ງສມາທິໜັກ 12 ກິໂລ ທີ່ຄົນຮ້າຍລັກໄປແມ່ນ ເປັນພະເກົ່າແກ່, ໂດຍທຸກປີທາງວັດຈະນຳເອົາພະດັ່ງກ່າວມາຫົດສົງ ແລະສ່ຽງໂຊກຊະຕາຂອງບ້ານຕາມຄວາມເຊື່ອຖືຂອງປະຊາຊົນພາຍໃນບ້ານ, ພ້ອມນັ້ນ ຍັງມີພະພຸດທະຮູບນ້ອຍອີກຈຳນວນ 4 ອົງທີ່ຖືກຄົນບໍ່ດີລັກໄປເຊັ່ນກັນ.
ເຈົ້າໜ້າທີ່ຍັງເປີດເຜີຍວ່າ: ຈາກການ ກວດກາເບື້ອງຕົ້ນຄາດວ່າ ກຸ່ມຄົນບໍ່ດີທີ່ ເຂົ້າມາລັກເອົາພະພຸດທະຮູບ ນັ້ນອາດຈະເປັນຄົນທີ່ຄຸ້ນເຄີຍ ແລະອາດຢູ່ພາຍໃນບ້ານ, ເພາະກ່ອນໜ້ານີ້ ທາງວັດຍັງຖືກກຸ່ມຄົນບໍ່ດີລັກງັດແງະຕູ້ສ່ຽງຊີ ແລະ ຕູ້ບໍລິຈາກເງີນຂອງວັດມາແລ້ວ, ຊຶ່ງປັດຈຸບັນທາງເຈົ້າໜ້າທີ່ກຳລັງເລັ່ງຕິດຕາມຕົວຄົນຮ້າຍມາດຳເນີນຄະດີ.