ຂົວນ້ຳຂອງລະຫວ່າງບ້ານຫາດ ຫາບ້ານນາ ເມືອງໂຂງ ແຂວງຈຳປາສັກ ມາຮອດປັດຈຸບັນຄືບໜ້າແລ້ວ 80% ຫຼັງກໍ່ສ້າງແຕ່ກາງປີ 2012 ຜ່ານມາ ຂະນະດຽວກັນ ກໍ່ຄາດວ່າຈະກໍ່ສ້າງສຳເລັດ ແລະ ເປີດນຳໃຊ້ໃນເດືອນຕຸລາປີນີ້.
ທ່ານ ຄຳຮຸ່ງ ໜູພະໄຊ ຫົວໜ້າໂຄງການກໍ່ສ້າງຂົວນ້ຳຂອງດອນໂຂງ ແຂວງຈຳປາສັກ ກ່າວວ່າ: ປັດຈຸບັນການກໍ່ສ້າງຄືບໜ້າແລ້ວ 80% ໂດຍໄດ້ກໍ່ສ້າງທາງເຂົ້າ ທາງຂຶ້ນ-ລົງ ຖອກເບຕົງຂາງຂົວ ແລະ ອື່ນໆ ແນວໃດກໍ່ດີ ຂະນະນີ້ກໍ່ໄດ້ຂຸ້ນຂ້ຽວສຸມໃສ່ຖອກເບຕົງຂາງຂົວ ແລະ ຄາດວ່າເດືອນມິຖຸນາປີນີ້ ຈະໃຫ້ສາມາດຈອດກັນໝົດ ແລະ ສືບຕໍ່ຖອກເບຕົງໜ້າຂົວ ລະບົບໄຟເຍືອງທາງ ປ້າຍສັນຍານຈະລາຈອນ ລະບົບປ້ອງກັນຕາຝັ່ງເຈື່ອນ ແລະ ອື່ນໆ ແລະ ຈະສຳເລັດ ແລະ ເປີດນຳໃຊ້ຢ່າງເປັນທາງການພາຍໃນເດືອນຕຸລາ.
ຂົວນ້ຳຂອງລະຫວ່າງບ້ານຫາດ ຫາບ້ານນາ ເມືອງໂຂງ ຍາວ 718 ແມັດ ກວ້າງ 11 ແມັດ ມີທາງຍ່າງສອງເບື້ອງ ເບື້ອງລະ 1,5 ແມັດ ແລະ ທາງລົດແລ່ນກວ້າງ 8 ແມັດ ເຊິ່ງໂຄງການນີ້ ນອນໃນໂຄງການກໍ່ສ້າງຂົວນ້ຳຂອງດອນໂຂງ ໄດ້ຮັບທຶນຊ່ວຍເຫຼືອຈາກລັດຖະບານ ສປ ຈີນ 95% ແລະ ທຶນສົມທົບຂອງລັດຖະບານລາວ 5% ລວມມູນຄ່າ 34 ລ້ານໂດລາສະຫະລັດ ໂດຍມີຈຸດປະສົງກໍ່ສ້າງຂົວນ້ຳຂອງ ເຊື່ອມຕໍ່ລະຫວ່າງບ້ານຫາດຫາບ້ານນາ ຂົວແຕ່ບ້ານໂຂງແຫຼມຫາບ້ານດອນສັນ ກໍ່ສ້າງທາງປູຢາງແຕ່ເສັ້ນທາງເລກທີ 13 ໃຕ້ ຫາຂົວບ້ານຫາດ ແລະ ກໍ່ສ້າງທ່າບັກແຕ່ບ້ານຫົວໂຂງພະໃຫຍ່ ຫາເມືອງມຸນລະປະໂມກ.
ທີ່ມາ : http://www.vientianemai.net/teen/khao/1/11458