ວັງຄຳຖືເປັນອີກແຫຼ່ງທ່ອງທ່ຽວທາງທຳມະຊາດທີ່ສວຍງາມຕັ້ງຢູ່ຈຸດໃຈກາງລະຫວ່າງ ບ້ານນາຕູ ແລະບ້ານກະແຫຼງເມືອງ ແລະແຂວງສາລະວັນ, ຊຶ່ງໄດ້ຮັບການພັດທະນາ ແລະປັບປຸງມາແຕ່ທ້າຍປີ 2015 ຜ່ານ ມາຮອດປະຈຸບັນໃກ້ຈະສຳເລັດແລ້ວ, ຄາດຈະເລີ່ມເປີດໃຫ້ບໍລິການຢ່າງເປັນທາງການໃນອີກບໍ່ດົນ, ທັງນີ້ກໍເພື່ອດຶງດູດບັນດານັກທ່ອງທ່ຽວຈາກທົ່ວທຸກສາລະທິດເຂົ້າມາ ທ່ຽວຊົມພາກໃຕ້ ໂດຍສະເພາະແຂວງສາລະວັນໃຫ້ນັບມື້ຫຼາຍຂຶ້ນ.
ວັນທີ 26 ມັງກອນຜ່ານມານີ້ ທ່ານ ພູທົງ ຄຳມະນີວົງ ຮອງເຈົ້າແຂວງໆສາລະວັນ ຜູ້ຊີ້ນຳວຽກງານວັດທະນະທຳສັງຄົມໄດ້ລົງຊຸກຍູ້ຕິດຕາມສະຖານທີ່ແຫຼ່ງທ່ອງທ່ຽວແຫ່ງ ດັ່ງກ່າວ ພ້ອມດ້ວຍຫົວໜ້າພະແນກການຕ່າງໆທີ່ກ່ຽວຂ້ອງ ໃນນັ້ນ ມີຮອງເຈົ້າເມືອງສາລະວັນ, ເມືອງເລົ່າງາມ ແລະພະນັກງານວິຊາການຈາກຂະແໜງທ່ອງທ່ຽວ, ພ້ອມນາຍບ້ານ ແລະພໍ່ແມ່ປະຊາຊົນບ້ານນາຕູ ແລະບ້ານກະແຫຼງໃຫ້ການຕ້ອນຮັບ.
ໂອກາດນີ້ ທ່ານ ສົມໃຈ ອຸ່ນຈິດ ກຳມະການພັກແຂວງສະມາຊິກສະພາແຫ່ງຊາດເຂດເລືອກຕັ້ງທີ 14 ທັງແມ່ນຫົວໜ້າພະແນກຖະແຫຼງຂ່າວ ວັດທະນະທຳ ແລະທ່ອງທ່ຽວແຂວງໄດ້ລາຍງານກ່ຽວກັບການຈັດຕັ້ງປະຕິບັດ ແຫຼ່ງທ່ອງທ່ຽວວັງຄຳໃນໄລຍະຜ່ານມາ ໂດຍຫຍໍ້ວ່າ: ແຫຼ່ງທ່ອງທ່ຽວວັງຄຳແມ່ນສະຖານທີ່ທ່ອງທ່ຽວທາງທຳມະຊາດ ແຫ່ງໜຶ່ງທີ່ຢູ່ໃນການຄຸ້ມຄອງຂອງລັດ ຊຶ່ງໄດ້ລົງມືປັບປຸງມາແຕ່ເດືອນທັນວາ 2015 ແລະເດືອນມັງກອນຂອງປີ 2016 ແມ່ນໄດ້ນຳເອົາເຄື່ອງກົນຈັກເຂົ້າມາບຸກເບີກ ພ້ອມທັງອະນາໄມຕາມຈຸດຕ່າງໆເພື່ອໃຫ້ສະອາດ ແລະຈົບງາມ, ມາຮອດປະຈຸບັນແມ່ນສຳເລັດການແກ້ໄຂບັນຫາເລື່ອງດິນຂອງພໍ່ແມ່ປະຊາຊົນທີ່ຕິດຈອດກັບແຫຼ່ງທ່ອງທ່ຽວຕາມເຂດລຳນຳເຊເສັດ, ສະຖານທີ່ຈອດລົດ, ຂົວໄມ້ໃຜ່ລຽງລຳ ແລະຄັນກັນລຳຈຳນວນ 2 ຈຸດ, ສຳເລັດສ້າງເຮືອແພ 1 ລຳ, ຈັດຊື້ກົງເບັງຈຳນວນ 13 ອັນ, ໄດ້ສ້າງຈຸດກະໂດດນ້ຳໃຫ້ນັກທ່ອງທ່ຽວ ແລະສຳເລັດການສ້າງປ້າຍໂຄສະນາ ແລະຊີ້ບອກທາງເຂົ້າຫາແຫຼ່ງທ່ອງທ່ຽວຈຳນວນໜຶ່ງ ພ້ອມທັງໂຄສະນາຜ່ານແຜນໃບປີວ, ທັງນີ້ ກໍເພື່ອໃຫ້ມີຄວາມພ້ອມທີ່ຈະເປີດເປັນແຫຼ່ງທ່ອງທ່ຽວແຫ່ງໃໝ່ຢ່າງເປັນທາງການໃນຊວງບຸນປີໃໝ່ລາວທີ່ຈະມາເຖິງນີ້.
ສຳລັບທິດທາງຕໍ່ໜ້າ ແມ່ນຈະສືບຕໍ່ສ້າງສາລາຊົມວິວ, ບຸກເບີກປັບໜ້າດິນສະຖານທີ່ຕ່າງໆໃຫ້ຈົບງາມ, ສ້າງສີລະປະວັດທະນາທຳປະຈຳບ້ານ, ແລະຍົກລະດັບເສັ້ນທາງເຂົ້າຫາແຫຼ່ງທ່ອງທ່ຽວ, ສ້າງແຜນຄຸ້ມຄອງ ແລະນຳໃຊ້, ສ້າງກົນໄກການຄຸ້ມຄອງການທ່ອງທ່ຽວເພື່ອນຳສະເໜີກົມພັດທະນາການທ່ອງທ່ຽວລົງມາຊ່ວຍຈັດສັນວາງແຜນພັດທະນາ.
ທ່ານຮອງເຈົ້າແຂວງຍັງໄດ້ເນັ້ນໃຫ້ບັນດາພະແນກການຕ່າງທີ່ກ່ຽວຂ້ອງ ເປັນເຈົ້າການໃນການຈັດຕັ້ງປະຕິບັດ ໜ້າວຽກຂອງຕົນເປັນຕົ້ນແມ່ນເລື່ອງ ເສັ້ນທາງຕ້ອງໃຫ້ໄດ້ມາດຖານເພື່ອຫຼີກລ້ຽງຈາກນ້ຳຖ້ວມ ແລະຈາກການເຊາະ ເຈື່ອນຂອງນ້ຳ, ພ້ອມທັງສ້າງຫ້ອງສຸກ ຂາເພື່ອບໍລິການແຂກທີ່ມາທ່ອງທ່ຽວ ແລະບັນຫາເລື່ອງດຶງຕາຂ່າຍໄຟຟ້າເຂົ້າມາໃສແຫຼ່ງທ່ອງທ່ຽວ, ນອກນັ້ນກໍໄດ້ໂອ້ລົມຕໍ່ພໍ່ແມ່ປະຊາຊົນຕ້ອງເປັນເຈົ້າການ, ຕ້ອງມີສ່ວນຮ່ວມໃນການບຸກເບີກອະນາໄມໃນຈຸດເຂດແຫຼ່ງທ່ອງທ່ຽວນີ້ໃຫ້ມີ ຄວາມສະອາດ ແລະຈົບງາມ ພ້ອມທັງ ຮັກສາລະບົບນິເວດໃຫ້ໄວ້ຄືເກົ່າເພາະວ່າວຽກງານການທ່ອງທ່ຽວນີ້ເປັນວຽກງານທີ່ສຳຄັນໃນການພັດທະນາເສດຖະກິດ-ສັງຄົມແຫ່ງຊາດ.
ໂດຍປະຈຸບັນ ທົ່ວແຂວງສາລະວັນມີແຫຼ່ງທ່ອງທ່ຽວທັງໝົດ 84 ແຫ່ງ, ໃນນັ້ນ ມີແຫຼ່ງທ່ອງທ່ຽວທຳມະຊາດ 43 ແຫ່ງ, ປະຫວັດສາດ 7 ແຫ່ງ ແລະວັດທະນະທຳ 34 ແຫ່ງ.
ທີ່ມາ: