ແຂວງຫຼວງພະບາງໄດ້ເນັ້ນບັນຫາການຮ່ວມງານຕະຫຼາດນັດການທ່ອງທ່ຽວກັບຕ່າງປະເທດເພື່ອເປີດໂອກາດໃນການໂຄສະນາໃຫ້ບັນດາປະເທດທີ່ຍັງບໍ່ທັນຮູ້ຈັກກັບປະເທດລາວ ໂດຍສະເພາະແມ່ນນັກທ່ອງທ່ຽວທີ່ຍັງບໍ່ທັນໄດ້ໄປທ່ຽວເມືອງມໍລະດົກໂລກຫຼວງພະບາງ ພ້ອມນັ້ນກໍໄດ້ແລກປ່ຽນຂໍ້ມູນຂ່າວສານກັບບັນດາປະເທດເຂົ້າຮ່ວມ ງານທີ່ມີແຫຼ່ງທ່ອງທ່ຽວ ເພື່ອເປັນ ການດຶງດູດນັກທ່ອງທ່ຽວເຂົ້າໄປທ່ຽວເມືອງມໍລະດົກໂລກຫຼວງພະບາງໃຫ້ນັບມື້ນັບເພີ່ມຂຶ້ນ.
ໂດຍທ່ານ ນາງ ສຸດາພອນ ຄົມທະວົງ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວທັງເປັນຜູ້ຊີ້ນຳວຽກງານການທ່ອງທ່ຽວແຂວງຫຼວງພະບາງໄດ້ ໃຫ້ຮູ້ຫວ່າງບໍ່ດົນນີ້ວ່າ: ເພື່ອເປັນການເປີດກວ້າງໃຫ້ການທ່ອງທ່ຽວຢູ່ປະເທດລາວເວົ້າລວມ, ເວົ້າສະເພາະກໍແມ່ນເມືອງມໍລະດົກໂລກຫຼວງພະບາງມີຄວາມຄຶກຄື້ນມີ ນັກທ່ອງທ່ຽວເພີ່ມຂຶ້ນໃນແຕ່ລະປີ ທາງແຂວງຫຼວງພະບາງຈິ່ງໄດ້ເຂົ້າຮ່ວມງານວາງສະແດງຕະຫຼາດນັດການທ່ອງທ່ຽວກັບກັບຕ່າງປະເທດຄື: ປະເທດຫວຽດນາມ ແລະປະເທດສິງກະໂປ 1 ຄັ້ງ ໃນປີ 2015 ທັງນີ້ ກໍເພື່ອເປັນການເປີດໂອກາດໂຄສະນາໃຫ້ບັນດາປະເທດທີ່ຍັງບໍ່ທັນຮູ້ຈັກກັບປະເທດລາວໂດຍສະເພາະແມ່ນນັກທ່ອງທ່ຽວທີ່ຍັງບໍ່ທັນໄດ້ໄປທ່ຽວປະເທດລາວ ແລະຍັງບໍ່ທັນໄດ້ໄປສຳຜັດກັບວັດທະນະທຳຊາວເມືອງຫຼວງພະບາງ ແລະຄວາມສວຍງາມຂອງເມືອງມໍລະດົກໂລກໃຫ້ໄດ້ຮູ້ຈັກກັນຫຼາຍຂຶ້ນ.
ທ່ານຍັງໃຫ້ຮູ້ຕື່ມອີກວ່າ: ຕະຫຼາດນັດການທ່ອງທ່ຽວແມ່ນໄດ້ ສ້າງສິ່ງອຳນວຍຄວາມສະດວກໃຫ້ແກ່ການເຜີຍແຜ່ໃນການແລກປ່ຽນຂໍ້ມູນຂ່າວສານການທ່ອງ ທ່ຽວໃຫ້ກວ້າງຂວາງອອກ ແລະໃນການໄປຮ່ວມງານທາງແຂວງ ກໍຄືຂະແໜງໂຄສະນາການທ່ອງທ່ຽວແຂວງຫຼວງພະບາງຍັງໄດ້ນຳເອົາແຜ່ນພັບຂໍ້ມູນການທ່ອງທ່ຽວຂອງປະເທດລາວແຕ່ເໜືອຮອດໃຕ້ໂດຍສະເພາະແມ່ນຂອງແຂວງຫຼວງພະບາງໄປແລກປ່ຽນຂໍ້ມູນຂ່າວສານກັບບັນດາປະເທດເຂົ້າຮ່ວມງານທີ່ມີແຫຼ່ງທ່ອງທ່ຽວ ແລະຍັງບໍ່ທັນຮູ້ຈັກກັບປະເທດຂອງລາວຈົນເຮັດໃຫ້ບັນດາເທດເພື່ອນມິດຫັນມາສົນໃຈ ແລະທຳຄວາມຮູ້ຈັກກັບປະເທດລາວຫຼາຍຂຶ້ນພ້ອມນັ້ນຍັງໄດ້ວາງແຜນໃນເດືອນມິຖຸນາປີນີ້ຈະໄປຮ່ວມງານຕະຫຼາດນັດກັບເພື່ອນບ້ານທີ່ຊຽງໄໝ່ປະເທດໄທຕື່ມອີກ.
ຈາກການທີ່ໄດ້ໄປຮ່ວມງານຕະຫຼາດນັດກັບຕ່າງປະເທດ ຊຶ່ງໄດ້ເຮັດໃຫ້ບັນດາປະເທດ ແລະນັກທ່ອງທ່ຽວທີ່ຍັງບໍ່ທັນຮູ້ຈັກປະເທດລາວໄດ້ຫັນມາສົນໃຈ ແລະເດີນທາງເຂົ້າມາທ່ຽວປະເທດລາວຫຼາຍຂຶ້ນໂດຍສະເພາະແມ່ນເມືອງມໍລະດົກໂລກຫຼວງພະບາງຈະສັງເກດເຫັນໄດ້ວ່າມີໂຕເລກນັກທ່ອງທ່ຽວເຂົ້າມາທ່ຽວຊົມແຕ່ລະປີມີການເພີ່ມຂຶ້ນແບບກະໂດດ ຊຶ່ງໃນ ປີ 2014 ມີນັກທ່ອງທ່ຽວເຂົ້າມາສູງເຖິງ 5 ແສນກວ່າຄົນ ແລະໃນປີຜ່ານມາມີນັກທ່ອງທ່ຽວເຂົ້າມາ 6 ແສນກວ່າຄົນ, ອັນໄດ້ສ້າງລາຍຮັບໃຫ້ແກ່ທາງແຂວງຫຼວງພະບາງນັບຫຼາຍຮ້ອຍລ້ານໂດລາສະຫະລັດໃນແຕ່ລະປີ.
ທີ່ມາ: