ໂຄງການກໍ່ສ້າງທາງແຕ່ສາມແຍກ ກມ 22 ທາງເລກທີ 13 ໃຕ້-ບ້ານຫົວຊຽງ-ທາງ 450 ປີ-ບ້ານດຸງນະຄອນຫຼວງວຽງຈັນ ພາຍຫຼັງທີ່ໄດ້ເລີ່ມລົງມືກໍ່ສ້າງມາແຕ່ທ້າຍປີ 2012 ກໍນັບມື້ຈະເຫັນຜົນສຳເລັດ ໂດຍເຈົ້າຂອງໂຄງການເຜີຍຮູ້ວ່າ ດຽວນີ້ໜ້າວຽກທັງໝົດຂອງໂຄງການສຳເລັດແລ້ວເກືອບຈະເຄິ່ງ ຊຶ່ງຄາດວ່າທ້າຍປີ 2017 ຈະໃຫ້ສຳເລັດສົມບູນ.
ທ່ານ ສຸດໃຈ ດວງດາຣາ ຫົວໜ້າໂຄງການດັ່ງກ່າວໃຫ້ສຳພາດກັບທີມຂ່າວເສດຖະກິດ-ສັງຄົມ ມື້ວານນີ້ວ່າ: ໂຄງການກໍ່ສ້າງທາງແຕ່ 3 ແຍກ ກິໂລແມັດ 22 ທາງເລກທີ 13 ໃຕ້-ບ້ານຫົວຊຽງ-ຖະໜົນ 450 ປີ ທີ່ຕິດພັນກັບການອຳນວຍຄວາມສະດວກໃນການເຊື່ອມຈອດແກ່ເຂດນິຄົມອຸດສາຫະກຳການຄ້າວຽງຈັນ ໂນນທອງ ເມືອງໄຊທານີ ແລະເຂດເສດຖະກິດກວມລວມເມືອງໄຊເສດຖາ, ສ່ວນອີກດ້ານໜຶ່ງແມ່ນເພື່ອລະບາຍການສັນຈອນຂອງພາຫະນະບໍ່ໃຫ້ຜ່ານຕົວເມືອງນະຄອນຫຼວງ, ທັງຊ່ວຍຫຼຸດຜ່ອນການແອອັດຂອງການສັນຈອນທີ່ນັບມື້ນັບຫຼາຍຂຶ້ນ ຊຶ່ງເຫັນໄດ້ເຖິງຄວາມສຳຄັນອັນຈຳເປັນຂອງເສັ້ນທາງ ດັ່ງກ່າວ ພັກ-ລັດກໍຄືນະຄອນຫຼວງວຽງຈັນ ຈຶ່ງໄດ້ລົງທຶນເຂົ້າໃນການພັດທະນາພື້ນຖານໂຄງລ່າງດ້ານເສັ້ນທາງດັ່ງກ່າວ ໂດຍເຫັນດີເປັນເອກະພາບມອບໃຫ້ບໍລິສັດສະຫະກໍ່ສ້າງຄົບວົງຈອນ ຈຳກັດ ລົງທຶນຮັບເໝົາກໍ່ສ້າງດ້ວຍທຶນຂອງບໍລິສັດເອງ ແລະລັດຈະໄດ້ຂຶ້ນແຜນຊຳລະພາຍຫຼັງວຽກກໍ່ສ້າງສຳເລັດພາຍໃນກຳນົດ 5 ປີ ລວມມູນຄ່າ ຂອງໂຄງການທັງໝົດແມ່ນ 542,84 ຕື້ກີບໃນໄລຍະການກໍ່ສ້າງ 36 ເດືອນ, ໃນນີ້ ຈຸດເລີ່ມແມ່ນຈາກສາມແຍກທາງ 13 ໃຕ້ ກມ 22 ຫາບ້ານຫົວຊຽງ-ເຂດອຸດສາຫະກຳບ້ານໂນນທອງ-ບ້ານດຸງ ມີຄວາມຍາວ 19 ກິໂລແມັດ, ກວ້າງ 18 ແມັດ, ໜ້າທາງປູ ດ້ວຍເບຕົງເສີມເຫຼັກ, ມີດອນກາງທາງ, ມີຮ່ອງລະບາຍນ້ຳ, ທາງຄົນຍ່າງ ແລະ ໄຟເຍືອງທາງສອງຝາກທາງ, ມີຈຸດທີ່ຜ່ານເຂດຊຸມຊົນເຂດອຸດສາຫະກຳຄວາມກວ້າງທັງໝົດແມ່ນ 21 ແມັດ.
ໂຄງການໄດ້ເລີ່ມລົງມືກໍ່ສ້າງມາແຕ່ເດືອນພະຈິກປີ 2012 ເປັນຕົ້ນມາ ຈົນມາຮອດປະຈຸບັນ ບັນດາໜ້າວຽກທັງຫຼາຍ ແມ່ນສຳເລັດແລ້ວ 42,50%, ເຫັນວ່າ ການປະຕິບັດແມ່ນບໍ່ສາມາດໄປຕາມແຜນທີ່ກຳນົດໄວ້ຄືຊ້າກວ່າແຜນການ ເນື່ອງ
ຈາກວ່າມີຄວາມຫຍຸ້ງຍາກໃນການໄກ່ເກ່ຍປະຊາຊົນອອກຈາກແລວທາງ, ອີກສ່ວນໜຶ່ງແມ່ນຍ້ອນ ສະພາບໂດຍລວມຂອງບໍລິສັດທີ່ລົງທຶນຍັງບໍ່ຄ່ອງຕົວດ້ານທຶນຮອນທີ່ນຳເຂົ້າສູ່ໂຄງການຍັງມີຄວາມຫຍຸ້ງຍາກ, ເຖິງຢ່າງໃດກໍຕາມ ແຕ່ບໍລິ
ສັດກໍຍັງໄດ້ສຸມກຳລັງ ແລະທຶນຮອນເຂົ້າໃນວຽກງານດັ່ງກ່າວ ຊຶ່ງເຮັດໃຫ້ມີບາງໜ້າວຽກສຳເລັດແລ້ວ ເປັນຕົ້ນແມ່ນ ເທເບຕົງແຕ່ 3 ແຍກທາງ 13 ໃຕ້ ຜ່ານເຂດອຸດສາຫະກຳ ແລະການຄ້າວຽງຈັນ ໂນນທອງຫາບ້ານຫົວຊຽງ ໄດ້ 7,5 ກິໂລແມັດ, ຍົກຍ້າຍສິ່ງກີດຂວາງ, ວຽກອະນາໄມບຸກເບີກແລວທາງ, ວຽກລະບົບລະບາຍນ້ຳ ແລະທາງຄົນຍ່າງຈຳນວນໜຶ່ງ.
ປະຈຸບັນທາງເຈົ້າຂອງໂຄງການ ແລະ ບໍລິສັດຜູ້ຮັບເໝົາກຳລັງສືບຕໍ່ເຮັດວຽກໄກ່ເກ່ຍສິ່ງກີດຂວາງ, ບຸກເບີກແລວທາງ, ຖົມດິນຍົກລະດັບ, ກໍ່ສ້າງຮ່ອງລະບາຍນ້ຳ, ກໍ່ສ້າງຊັ້ນໂຄງສ້າງທາງ ເທເບຕົງ ແລະຕິດຕັ້ງເສົາໄຟເຍືອງທາງຂະນະທີ່ໂຄງການຮອດ (ດຽວນີ້ເຫຼືອເວລາປະມານ 24 ເດືອນແຕ່ຜູ້ຮັບຜິດຊອບຢືນຢັນຈະໃຫ້ສຳເລັດຕາມແຜນ.
ຫາກໂຄງການດັ່ງກ່າວນີ້ສຳເລັດ ແນ່ນອນວ່າ ຈະເປັນໂຄງການໜຶ່ງທີ່ອຳນວຍຄວາມສະດວກໃນການສັນຈອນຂອງເຂດອຸດສາຫະກຳໂນນທອງ ເມືອງໄຊເສດຖາ, ພ້ອມນັ້ນ ຍັງຈະຊ່ວຍຫຼຸດຜ່ອນບໍ່ໃຫ້ລົດໜັກແລ່ນຜ່ານເຂົ້າສູ່ຕົວເມືອງ ແລະເປັນການແກ້ໄຂການສັນຈອນ ທີ່ນັບມື້ແອອັດ ໄປພ້ອມໆດຽວກັນນັ້ນ ກໍຈະເປັນສ່ວນໜຶ່ງໃນການນຳເອົາຄວາມສີວິໄລ, ເປັນລະບຽບຮຽບຮ້ອຍມາສູ່ຂົງເຂດ ດັ່ງກ່າວ ເປັນຕົ້ນການບໍລິການ, ການຄ້າ ແລະການລົງທຶນ, ຊຶ່ງຈະຊ່ວຍເຮັດໃຫ້ປະຊາຊົນມີຊີວິດການເປັນຢູ່ນັບມື້ດີຂຶ້ນເລື້ອຍໆ.
ທີ່ມາ:
