ສະຫາຍ ບຸນທົງ ເທບໄກສອນ ປະທານສະຫະກອນຜູ້ຜະລິດກາເຟ ເຂດພູພຽງບໍລະເວນ, ຫລັກ 24 ເມືອງບາຈຽງຈະເລີນສຸກ, ແຂວງຈຳປາສັກ ໄດ້ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ຊຶ່ງພວມດຳເນີນຢູ່ປັດຈຸບັນນີ້ວ່າ: ພາຍໃຕ້ການນຳພາອັນສະຫລາດສ່ອງໃສຂອງພັກປະຊາຊົນປະຕິວັດລາວ ໃນໄລຍະຜ່ານມາ, ເຫັນວ່າ ວຽກງານການຜະລິດກະສິກໍາ ເປັນຕົ້ນ ການຜະລິດກາເຟຂອງຊາວກະສິກອນເຂດພູພຽງບໍລະເວນ ມີການເຕີບໃຫຍ່ຂະຫຍາຍຕົວ ແລະ ນັບມື້ມີລາຍຮັບ ເພີ່ມຂຶ້ນສາມາດຊ່ວຍໃຫ້ຊາວກະສິກອນ ກໍຄືຜູ້ຜະລິດສາມາດຫລຸດພົ້ນອອກຈາກຄວາມທຸກຍາກ ແລະ ກ້າວໄປສູ່ຄວາມຮັ່ງມີຜາສຸກຂຶ້ນເທື່ອລະກ້າວ.
ທ່ານປະທານສະຫະກອນດັ່ງກ່າວ ໃຫ້ຮູ້ວ່າ: ໃນເບື້ອງຕົ້ນ ສະມາຊິກຂອງສະຫະກອນສ່ວນໜຶ່ງຍັງບໍ່ທັນເຂົ້າໃຈ ແລະ ລະແວງຕໍ່ການເຮັດວຽກລວມໝູ່, ຈຶ່ງເຮັດໃຫ້ມີພຽງ 20% ຂອງຈຳນວນສະມາຊິກເທົ່ານັ້ນ ທີ່ເອົາຜົນຜະລິດເຂົ້າມາຂາຍລວມໝູ່, ຈຶ່ງສົ່ງຜົນໃຫ້ຜົນຜະລິດມີຈຳນວນໜ້ອຍ ບໍ່ສາມາດສົ່ງອອກໄປຂາຍຕ່າງປະເທດໄດ້, ແຕ່ຫລາຍປີຕໍ່ມາ, ຈຶ່ງເຮັດໃຫ້ສະມາຊິກສະຫະກອນ ສົນໃຈນຳເອົາຜົນຜະລິດຂອງຕົນເຂົ້າມາຂາຍ ເຮັດໃຫ້ມີປະລິມານເພີ່ມຂຶ້ນຢ່າງຕໍ່ເນື່ອງຄື: ສົກປີ 2008-2009 ບັນລຸກໄດ້ຫລາຍກວ່າ 140 ໂຕນ, ມາຮອດສົກປີ 2009-2010 ເພີ່ມຂຶ້ນເປັນ 4 ແສນກວ່າໂຕນ, ພ້ອມນັ້ນ ສະຫະກອນ ຍັງໄດ້ຮັບໃບຢັ້ງຢືນຮັບຮອງຜະລິດຕະພັນປອດສານພິດ ແລະ ການຄ້າເປັນທຳ ຈາກສະຫະພາບເອີຣົບ, ທະວີບອາຊີ-ປາຊີຟິກ, ສະຫະລັດອາເມລິກາ, ປະເທດການາດາ ແລະ ເຢຍລະມັນ ແລະ ໃນສົກປີ 2014-2015 ການສົ່ງອອກກາເຟລາວໄປຍັງຕະຫລາດສາກົນ ເພີ່ມຂຶ້ນສູງເຖິງ 1.100 ກວ່າໂຕນ, ໃນນັ້ນ 90% ແມ່ນສົ່ງເຂົ້າຕະຫລາດເອີຣົບ, ພ້ອມນີ້ ຍັງມີບໍລິສັດຊື່ດັງຂອງໂລກມາຊື້ກາເຟຈາກສະຫະກອນຂອງລາວເຮົາເຊັ່ນ: ບໍລິສັດ ກາເຟມາ (CAFEMA) ຂອງປະເທດສະວິດເຊີແລນ, ບໍລິສັດຂົ້ວກາເຟມາລົງໂກ (MALONGO) ຂອງປະເທດຝຮັ່ງ, ບໍລິສັດອາວິດນໍກິດ (ARVID MORDQUIST) ຂອງປະເທດສະວີເດັນ, ບໍລິສັດລົມບຸດ (ROMBOUTS) ຂອງປະເທດແບນຊິກ, ບໍລິສັດ ຈອນເບີຕັນ (JOHN BURTON ຂອງປະເທດນິວຊີແລນ ແລະ ບໍລິສັດ ເຄແອບທີເອ (KFTA) ຂອງປະເທດ ສ. ເກົາຫລີ ແລະ ອື່ນໆ, ອັນໄດ້ສ້າງມູນຄ່າໃຫ້ກາເຟລາວດີຂຶ້ນ.
ທ່ານປະທານສະຫະກອນດັ່ງກ່າວ ເປີດເຜີຍວ່າ: ໃນຜ່ານມານີ້, ສະຫະກອນຂອງຕົນ ຍັງໄດ້ຮັບໃບຢັ້ງຢືນ ເປັນຜະລິດຕະພັນກະສິກຳປອດສານພິດ ແລະ ການຄ້າເປັນທຳ, ຈຶ່ງເຮັດໃຫ້ຕະຫລາດຄູ່ຄ້າເຂົ້າມາຄ້ຳປະກັນລາຄາຕ່ຳສຸດ 3.500 ກີບຕໍ່ກິໂລ, ຖ້າລາຄາຕະຫລາດຫລຸດລົງ ເຂົາກໍຈະເກັບຊື້ໃນລາຄາຄ້ຳປະກັນນີ້, ແຕ່ຖ້າວ່າລາຄາກາເຟສູງຂຶ້ນ ກໍຊື້ຕາມຕົວຈິງຂອງຕະຫລາດ, ເຮັດໃຫ້ສະມາ ຊິກສະຫະກອນ ຂາຍກາເຟໃນລາຄາດີ ແລະ ສູງກວ່າລາຄາທົ່ວໄປເກືອບສອງເທົ່າເຊັ່ນ: ສົກປີ 2013-2014 ຊາວສວນທົ່ວໄປຂາຍກາເຟນ້ອຍໝາກແດງໄດ້ພຽງ 2.396 ກີບຕໍ່ກິໂລ, ແຕ່ສະ ມາຊິກສະຫະກອນ ສາມາດ ຂາຍໄດ້ 4.487 ກີບຕໍ່ກິໂລ, ຍ້ອນມີໃບຢັ້ງຢືນປອດສານພິດ ລາຄາກາເຟ ຈະໄດ້ເພີ່ມຕື່ມອີກ 500 ກີບ/ກິໂລ ແລະ ໄດ້ເພີ່ມຈາກໃບຢັ້ງຢືນການຄ້າເປັນທຳ 1.382 ກີບ/ກິໂລ, ສຳລັບເງິນຈຳນວນນີ້ ຈະນຳເຂົ້າເປັນເງິນລວມຂອງສະຫະກອນ, ຖ້າຫາກວ່າບໍ່ໄດ້ມີການປັບປຸງສູນອີ້ວ ແລະ ຊ່ວຍເຫລືອສັງຄົມ ຈະນຳເຂົ້າເປັນເງິນກອງທຶນໃຫ້ສະມາຊິກພາຍໃນກູ້ຢຶມ, ເວົ້າລວມແລ້ວ ລາຍຮັບຂອງສະຫະກອນປີໜຶ່ງ ປະມານ 20-100 ລ້ານກີບ/ຄອບຄົວ.
ຄຽງ ຄູ່ກັນນີ້ ຍັງປະກອບສ່ວນຊ່ວຍເຫລືອສັງຄົມໃນຫລາຍດ້ານເຊັ່ນ: ປຸກສ້າງໂຮງ ຮຽນ ຈຳນວນ 2 ຫລັງ ມູນຄ່າ 540 ລ້ານກີບ, ສ້າງສຸກສາລາ ແລະ ເຮືອນພັກແພດໝໍ ພ້ອມດ້ວຍອຸປະ ກອນຈຳນວນໜຶ່ງ ມູນຄ່າ 640 ລ້ານກີບ, ຊື້ອຸປະກອນຮັບໃຊ້ຫ້ອງການ ໃຫ້ພະແນກການຂັ້ນແຂວງ ແລະ ຫ້ອງການຂອງເມືອງມູນຄ່າ 200 ກວ່າລ້ານກີບ, ປະ ຕິບັດດ້ານສະຫວັດດີການສັງຄົມຕໍ່ສະມາຊິກສະຫະກອນ 850 ລ້ານກີບ ແລະ ອື່ນໆ.
ແຫລ່ງຂ່າວ:
