ເຖິງແມ່ນວ່າທາງເຈົ້າໜ້າທີ່ພະແນກຕຳຫຼວດປ້ອງກັນສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ ຈະໄດ້ສຸມໃສ່ວຽກງານໂຄສະນາສຶກສາ ແລະ ຝຶກອົບຮົມກ່ຽວກັບວຽກງານປ້ອງກັນສະກັດກັ້ນ ແລະ ຕ້ານອັກຄີໄພ ເພື່ອເຮັດໃຫ້ພໍ່ແມ່ປະຊາຊົນ ບັນດາຫົວໜ່ວຍທຸລະກິດຕ່າງໆ ທັງພາກລັດ ແລະ ເອກະຊົນ ຮັບຮູ້ຕໍ່ຜົນຮ້າຍຂອງການເກີດອັກຄີໄພ ແຕ່ບັນຫາດັ່ງກ່າວນີ້ ກໍ່ຍັງເກີດຂຶ້ນຢ່າງຕໍ່ເນື່ອງ.
ທ່ານ ພັນຕີ ຈັນທະບູນ ມະນີວົງ ວ່າການຫົວໜ້າພະແນກຕຳຫຼວດປ້ອງກັນສະກັດກັ້ນ ແລະ ຕ້ານອັກຄີໄພນະຄອນຫຼວງວຽງຈັນ ໄດ້ໃຫ້ສຳພາດຕໍ່ນັກຂ່າວພວກເຮົາວ່າ: ປັດຈຸບັນ ການເກີດອັກຄີໄພໃນນະຄອນຫຼວງວຽງຈັນ ເຫັນວ່າມີທ່າອ່ຽງເພີ່ມຂຶ້ນກວ່າປີທີ່ຜ່ານມາ ພຽງແຕ່ສາມເດືອນຂອງປີ 2014 ມີອັກຄີໄພເກີດຂຶ້ນແລ້ວທັງໝົດ 38 ຄັ້ງ ໃນນີ້ ໄໝ້ເຮືອນລຸ່ມກໍ່ເທິງໄມ້ 10 ຫຼັງ ເຮືອນໄມ້ຊັ້ນໜຶ່ງ 1 ຫຼັງ ເຮືອນກໍ່ສອງຊັ້ນ 1 ຫຼັງ ເຮືອນກໍ່ຊັ້ນດຽວ 1 ຫຼັງ ຕະຫຼາດ 2 ແຫ່ງ ຫ້ອງການລັດ 2 ແຫ່ງ ຫ້ອງແຖວ 3 ຫ້ອງນອນ ແລະ ອື່ນໆ ສາເຫດຂອງການເກີດອັກຄີໄພຈາກໄຟ້ຟ້າລັດວົງຈອນມີ 25 ຄັ້ງ ໄຕ້ທູດທຽນບູຊາ 1 ຄັ້ງ ຄົນຈູດ 7 ຄັ້ງ ຂັດຂ້ອງທາງດ້ານເຕັກນິກ (ລົດ) 4 ຄັ້ງ ຄິດໄລ່ມູນຄ່າຄວາມເສຍຫາຍປະມານ 9 ຕື້ກວ່າກີບ 5 ລ້ານກວ່າບາດ (ສະກຸນເງິນໄທ) 3 ແສນກວ່າໂດລາສະຫະລັດ ຖ້າທຽບໃສ່ໃນປີ 2013 ທົ່ວນະຄອນຫຼວງວຽງຈັນ ມີອັກຄີໄພເກີດຂຶ້ນທັງໝົດ 64 ຄັ້ງ ຜົນເສຍຫາຍທີ່ປະເມີນໄດ້ທັງໝົດ 20 ຕື້ກວ່າກີບ.
ຈາກເຫດການດັ່ງກ່າວນັ້ນ ທ່ານ ພັນຕີ ຈັນທະບູນ ມະນີວົງ ໄດ້ຮຽກຮ້ອງໃຫ້ບັນດາພໍ່ແມ່ປະຊາຊົນບັນດາເຜົ່າ ຕ້ອງເປັນເຈົ້າການນຳກັນ ໃນການຮັບປະກັນການໃຊ້ຟືນໄຟທຸກໆຄັ້ງ ກ່ອນຈະອອກຈາກເຮືອນ ຕ້ອງກວດກາເບິ່ງສາຍຟືນສາຍໄຟ ໝໍ້ຕົ້ມນ້ຳ ສາຍໂທລະພາບຖອດແລ້ວຫຼືຍັງ ອຸປະກອນການໄຟຟ້າທຸກຊະນິດ ຕ້ອງມີຄວາມຮັບປະກັນ ຖ້າເກົ່າຫຼາຍແລ້ວກໍ່ຄວນຈະປ່ຽນ ການໃຕ້ທູບທຽນບູຊາວັນສິນຕ່າງໆ ກໍ່ໃຫ້ມີສະຕິ ຖ້າທຸກຄົນຫາກປະຕິບັດໄດ້ຄືດັ່ງກ່າວນີ້ ການເກີດອັກຄີໄພກໍ່ຈະຫຼຸດໜ້ອຍຖອຍລົງ.
http://www.vientianemai.net/teen/khao/1/11405