ສຳນັກຂ່າວຕ່າງປະເທດ ລາຍງານໃນວັນທີ 7 ມັງກອນນີ້ວ່າ ທ່ານ ໂທມັສ ເດ ໄມຊີເຣີ ລັດຖະມົນຕີວ່າການກະຊວງພາຍໃນ ປະເທດເຢຍລະມັນ ໄດ້ອອກມາເປີດເຜີຍ ໃນວັນພຸດທີ 6 ມັງກອນຜ່ານມາວ່າ ໃນປີ 2015 ຜ່ານມານີ້ ມີຜູ່ອົບພະຍົບລີ້ໄພຈາກຕ່າງປະເທດ ເດີນທາງເຂົ້າມາປະເທດເຢຍລະມັນ ລວມທັງໝົດ 1,091,894 ຄົນ ໂດຍໃນຈຳນວນດັ່ງກ່າວນີ້ ເປັນຜູ້ອົບພະຍົບຊາວຊີຣີຫລາຍກ່ວາໝູ່ ເຖິງ 428,468 ຄົນ ຖັດລົງມາແມ່ນຊາວອັບການິສະຖານ 154,046 ຄົນ ແລະ ຊາວອີຣັກອີກ 121,662 ຄົນ.
ແນວໃດກໍຕາມ ກະຊວງພາຍໃນເຢຍລະມັນໄດ້ລາຍງານວ່າ ເຖິງແມ່ນຈະມີຜູ້ລີ້ໄພເຂົ້າປະເທດ ສູງເຖິງ 1.1 ລ້ານຄົນ ໃນປີຜ່ານມາ ແຕ່ກໍມີພຽງແຕ່ຈຳນວນ 476,649 ຄົນເທົ່ານັ້ນ ທີ່ໄດ້ຍື່ນເອກະສານ ເພື່ອຂໍລີ້ໄພຢ່າງເປັນທາງການ.
