ກອງ​ປະຊຸມ​ໃຫຍ່​ຜູ້​ແທນ​ຊາວໜຸ່ມ​ທົ່ວ​ປະເທດ ​ຄັ້ງ​ທີ VII ໄດ້​ໄຂຂຶ້ນ​ຢ່າງ​ເປັນ​ທາງ​ການ ​ໃນ​ວັນ​ທີ 30 ທັນວາ 2015 ທີ່​ຫໍ​ປະຊຸມແຫ່ງ​ຊາດ ໂດຍ​ເປັນ​ປະທານ​ຂອງສະຫາຍ ​ດຣ. ວິໄລ​ວົງ ບຸດ​ດາ​ຄຳ ເລຂາ​ຄະນະ​ບໍລິຫານ​ງານ​ສູນກາງ​ຊາວ​ໜຸ່ມ​ປະຊາຊົນປະຕິວັດລາວ ໂດຍ​ເປັນ​ກຽດ​ເຂົ້າ​ຮ່ວມຂອງ​ສະຫາຍ ບຸນ​ຍັງ ວໍລະ​ຈິດ ກຳມະການ​ກົມ​ການເມືອງ​ສູນກາງ​ພັກ ຜູ້​ປະຈຳການ​ຄະນະ​ເລຂາ​ທິ​ການ​ສູນ​ກາງ​ພັກ ຮອງ​ປະທານ​ປະເທດ ພ້ອມ​ດ້ວຍ​ການ​ນຳພັກ-ລັດ ອະດີດ​ການ​ນຳ​ຂັ້ນ​ສູງ ແລະ ຜູ້​ແທນ​ສົມບູນ 538 ສະຫາຍ ແລະ ແຂກ​ທີ່​ຖືກ​ເຊີນ​ເຂົ້າຮ່ວມ.

ສະຫາຍ​ເລຂາ​ຄະນະ​ບໍ​ລິຫານ​ງານ​ສູນ​ກາງ​ຊາວ​ໜຸ່ມ​ປະຊາ​ຊົນປະຕິວັດ​ລາວ ໄດ້​ກ່າວ​ໄຂກອງ​ປະຊຸມ​ດັ່ງກ່າວ​ວ່າ: ກອງ​ປະຊຸມ​ໃຫຍ່ຜູ້​ແທນ​ຊາວ​ໜຸ່ມ​ທົ່ວ​ປະເທດ​ໃນ​ຄັ້ງ​ນີ້ ​ໄດ້​ພ້ອມ​ກັນ​ຕີ​ລາຄາຄືນ​ຢ່າງຮອບດ້ານ ແລະ ເລິກເຊິ່ງ ​ກ່ຽວ​ກັບ​ຜົນສຳເລັດ​ຂອງການຈັດຕັ້ງ​ປະຕິບັດ ທິດ​ທາງ ຄາດໝາຍ ແລະ ຈັດ​ຕັ້ງ​ປະຕິບັດວຽກ​ງານ​ທີ່​ໄດ້​ວາງ​ອອກ ຍົກ​ໃຫ້ເຫັນ​ຜົນສຳເລັດ ສິ່ງ​ທີ່​ຄົງ​ຄ້າງ ພ້ອມ​ສາເຫດ ຈາກ​ນັ້ນ ກໍ່​ຖອດຖອນ​ບົດຮຽນ​ເພື່ອ​ຊີ້​ນຳ​ວຽກ​ງານໃນຕໍ່ໜ້າ ພ້ອມ​ທັງ​ໄດ້​ກຳນົດ​ທິດທາງ ຄາດໝາຍສູ້​ຊົນ​ໜ້າທີ່​ວຽກງານ​ ຕະຫຼອດ​ໄລຍະ​ກອງ​ປະຊຸມໃຫຍ່​ ຄັ້ງ​ທີ VII (2016-2020) ແນໃສ່​ສືບຕໍ່​ຜັນ​ຂະຫຍາຍ​ແນວທາງ​ປ່ຽນແປງ​ໃໝ່​ຂອງ​ພັກ ​ເຂົ້າ​ສູ່ຊີວິດ​ຕົວ​ຈິງ​ຂອງ​ຄະນະ​ຊາວ​ໜຸ່ມ ໃຫ້​ເປັນ​ໂຄງການ​ແຜນ​ວຽກ​ລະອຽດ​ແຕ່​ລະ​ໄລຍະ ທັງ​ນີ້ ເພື່ອ​ເປັນການ​ປັບປຸງ​ບູລະນະ​ຄະນະ​ຊາວໜຸ່ມ ​ໃຫ້​ມີ​ຄວາມ​ເຂັ້ມແຂງ​ຮອບດ້ານ​ໃນ​ເງື່ອນໄຂ​ໃໝ່ ແຫ່ງ​ການເຊື່ອມ​ໂຍງ​ສາກົນ ແລະ ພາກ​ພື້ນ ເປັນ​ໄລຍະ​ແຫ່ງ​ການຈັດຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ ​ຄັ້ງ​ທີ X ຂອງ​ພັກ ແຜນ​ພັດທະນາ 5 ປີ ຄັ້ງ​ທີ VIII ຂອງ​ລັດ ໂດຍ​ເນັ້ນ​ໃສ່ການ​ແກ້​ໄຂ​ຄວາມທຸກ​ຍາກ ສ້າງພື້ນຖານ​ໜັກ​ແໜ້ນ​ ໃຫ້​ແກ່​ການເປັນ​ອຸດສາຫະກຳ ແລະ ຫັນ​ເປັນທັນ​ສະໄໝ ເພື່ອ​ແນໃສ່​ສຶກ​ສາອົບຮົມ​ຊາວ​ໜຸ່ມ-ເຍົາວະ​ຊົນ ໃຫ້ກາຍເປັນ​ຜູ້​ສືບ​ທອດ​ທີ່​ດີ​ຂອງ​ພັກ ສ້າງ​ປັດ​ໄຈ​ໃໝ່​ເຂົ້າ​ໃນ​ການ​ພັດທະ​ນາ​ປະເທດ​ຊາດ ສ້າງ ​ສປປ ລາວ​ ໃຫ້​ເປັນ​ປະເທດ​ທີ່​ມັ່ງ​ຄັ່ງເຂັ້ມແຂງ ປະຊາຊົນ​ຮັ່ງມີ​ຜາ​ສຸກ ສັງຄົມ​ມີ​ຄວາມ​ປອງ​ດອງ ປະຊາທິ​ປະ​ໄຕ ຍຸຕິ​ທຳ ແລະ ສີວິໄລ ພ້ອມ​ນີ້ ກອງ​ປະຊຸມ​ຍັງ​ໄດ້​ພິ​ຈາລະ​ນາ​ຮັບຮອງ​ເອົາ​ແຜນ​ພັດ​ທະນາ​ຊາວ​ໜຸ່ມ-ເຍົາວະ​ ຊົນ ກົດ​ລະບຽບ​ຄະນະ​ຊາວ​ໜຸ່ມ​ປະຊາຊົນປະຕິວັດ​ລາວ ກົດ​ລະບຽບ​ເຍົາວະ​ຊົນ​ທັນວາ​ສະບັບ​ປັບປຸງ​ໃໝ່ ຂໍ້​ແຂ່ງຂັນ 4 ບຸກຂອງ​ຊາວ​ໜຸ່ມ ເພື່ອ​ໃຫ້​ສອດຄ່ອງ​ກັບ​ການ​ປັບປຸງ​ບູລະນະ​ການຈັດຕັ້ງ ແລະ ການເຄື່ອນໄຫວ​ໃນ​ໄລຍະ​ໃໝ່.

ເພື່ອ​ຢັ້ງຢືນ​ເຖິງ​ຜົນງານ​ອັນໃຫຍ່​ຫຼວງ ແລະ ຄຸນ​ງາມ​ຄວາມດີ​ໃນ​ການ​ປະກອບສ່ວນ​ຢ່າງ​ຕັ້ງໜ້າ​ ເຂົ້າ​ໃນ​ພາລະກິດ​ຕໍ່ສູ້​ປົດ​ປ່ອຍ​ຊາດ ແລະ ພາລະກິດ​ປົກ​ປັກ​ຮັກສາ​ສ້າງສາ​ພັດທະນາ​ປະເທດຊາດ​ ຕະຫຼອດ​ໄລຍະ​ຜ່ານ​ມາ​ຂອງຄະນະ​ຊາວ​ໜຸ່ມ​ປະຊາຊົນປະຕິວັດ​ລາວ ທ່ານ ບຸນ​ຍັງ ວໍລະ​ຈິດ ຈຶ່ງ​ໄດ້​ຂຶ້ນ​ປະດັບ​ຫຼຽນ​ຄຳ​ແຫ່ງຊາດ ເຊິ່ງ​ເປັນ​ຫຼຽນ​ສູງ​ສຸດ​ຂອງ ​ສປປ ລາວ ໃຫ້​ກັບ​ຄະນະ​ຊາວໜຸ່ມ​ປະຊາຊົນ​ປະຕິວັດ​ລາວ.