ສຳນັກຂ່າວຕ່າງປະເທດ ລາຍງານໃນວັນທີ 24 ທັນວາຜ່ານມານີ້ວ່າ ໃນລະຫວ່າງພິທີເປີດນຳໃຊ້ ເຂື່ອນໄຟຟ້າສະຕຶງຕາໄຕ ຂະໜາດ 246 ເມກະວັດ ຢູ່ແຂວງເກາະກົງ ໃນວັນພຸດທີ 23 ທັນວາ 2015 ທ່ານ ຮຸນແຊນ ນາຍົກລັດຖະມົນຕີ ແຫ່ງ ຣາຊະອານາຈັກກຳປູເຈຍ ໄດ້ຕອບໂຕ້ນັກສິ່ງແວດລ້ອມ ທີ່ພາກັນຄັດຄ້ານ ນະໂຍບາຍການກໍ່ສ້າງເຂື່ອນໄຟຟ້າ ຂອງລັດຖະບານກຳປູເຈຍ ດ້ວຍການສະເໜີວ່າ ຈະຕັດໄຟຟ້າຈາກເຮືອນຂອງພວກເຂົາ ແລະ ໃຫ້ພວກເຂົາໄປນຳໃຊ້ທວນໄຟແທນ.
ບັນດານັກສິ່ງແວດລ້ອມ ໄດ້ພາກັນຄັດຄ້ານ ແລະ ວິຕົກກັງວົນ ຕໍ່ກັບແຜນການກໍ່ສ້າງ ເຂື່ອນໄຟຟ້າຈຳນວນ 14 ແຫ່ງ ໃຫ້ສຳເລັດ ພາຍໃນປີ 2020 ຂອງລັດຖະບານກຳປູເຈຍ ຊຶ່ງຈະກະທົບຕໍ່ສັດປ່າ ຫລື ສິ່ງທີ່ມີຊີວິດໃກ້ສູນພັນ ແລະ ພື້ນທີ່ປ່າໄມ້ຕ່າງໆ, ໃນຂະນະທີ່ ນາຍົກລັດຖະມົນຕີກຳປູເຈຍ ລະບຸວ່າ ພວກເຮົາຈຳເປັນຕ້ອງຍອມເສຍ ເພາະກຳປູເຈຍບໍ່ມີທາງເລືອກ.
ທັງນີ້ ກຳປູເຈຍ ເປັນປະເທດທີ່ເພິ່ງພາພະລັງານ ຈາກການນຳເຂົ້ານ້ຳມັນເຊື້ອໄຟ ແລະ ຄວາມຕ້ອງພະລັງານດ້ານອື່ນໆ ແມ່ນນັບມື້ນັບສູງຂຶ້ນເລື້ອຍໆ ເຮັດໃຫ້ຄ່າໃຊ້ຈ່າຍຕໍ່ໜ່ວຍ ຢູ່ໃນລະດັບແພງທີ່ສຸດໃນບັນດາປະເທດອາຊຽນ.
ທ່ານ ຮຸນແຊນ ກ່າວວ່າ ” ພວກເຮົາສາມາດເຮັດທວນໄຟ ໃຫ້ແກ່ນັກສິ່ງແວດລ້ອມຫົວຮຸນແຮງ ເພື່ອໄວ້ນຳໃຊ້ໄດ້ ແລະ ຈະຕັດໄຟຟ້າຈາກເຮືອນຂອງພວກເຂົາ “