ສຳນັກຂ່າງຕ່າງປະເທດ ທັງຈາກຈີນແລະຣອຍເຕີຂ່າວ – ຊາວເຊິນເຈີ້ນສຸດຊັອກ ເມື່ອເກີດເຫດດິນເຈື່ອນຄັ້ງໃຫຍ່ ໃນນິຄົມອຸດສາຫະກຳ ທາງຕາເວັນອອກສຽງເໜືອ ລ້າງແລະສູບຕຶກຈົມທໍລະນີ ລວມ 22 ຫຼັງ ພ້ອມຜູ້ຄົນຈຳນວນຫຼາຍ.
ຕອນໃກ້ທ່ຽງ ວານນີ້ ( 20 ທັນວາ 2015) ໄດ້ເກີດເຫດການດິນເຈື່ອນຂຶ້ນ ທີ່ນິຄົມອຸດສາຫະກຳຫຼິວຊີ ເຂດກວາງໝິງໃໝ່ຂອງນະຄອນ ເຊິນເຈີ້ນ ມົນທົນກວາງຕຸ້ງ ທາງຕອນໃຕ້ຂອງຈີນ ເຊິ່ງສຳນັກຂ່າວຊິນຫົວຂອງຈີນ ລາຍງານວ່າຍອດຜູ້ສູນຫາຍຫຼ້າສຸດ ຢ່າງໜ້ອຍຢູ່ທີ່ 41 ຄົນ.
ເຈົ້າໜ້າທີ່ຈາກໜ່ວຍກູ້ໄພ ສັງກັດກະຊວງພິທັກສັນຕະລາດ ລະບຸວ່າກ່ອນໜ້ານີ້ເຈົ້າໜ້າທີ່ ສາມາດຊ່ວຍຊີວິດຜູ້ປະສົບໄພ 8 ຄົນ ສ່ວນປັດຈຸບັນເຈົ້າໜ້າທີ່ກູ້ໄພກວ່າ 1500 ຄົນ ກຳລັງຄົ້ນຫາຜູ້ລອດຊີວິດ ທີ່ອາດຈະຕິດຄ້າງຢູ່ໃຕ້ຊາກ ອາຄານທີ່ເພພັງ.
ທ່ານ ເຣິ່ນ ຈີ້ກວງ ຮອງຫົວໜ້າ ສຳນັກງານພິທັກສັນຕິລາດ ນະຄອນເຊິນເຈີ້ນ ໃຫ້ສຳພາດກັບ ຊີຊີທີວີວ່າ ເຈົ້າໜ້າທີ່ສາມາດອົບພະຍົບ ປະຊາຊົນປະມານ 900 ຄົນ ໄປຍັງບ່ອນທີ່ປອດໄພໄດ້ທັນເວລາ ກ່ອນຫາຍະນະຈະເກີດຂຶ້ນ ແຕ່ກໍຍັງເຊື່ອວ່າອາດຈະມີຜູ້ ໂຊກຮ້າຍຖືກຝັງຢູ່ໃຕ້ດິນ.
ນອກຈາກນັ້ນ ຊີຊີທີວີ ລາຍງານວ່າ ເກີດເຫດທໍ່ສົ່ງແກ໊ສທຳມະຊາດ ສາຍຕາເວັນຕົກ-ຕາເວັນອອກ ຂອງທາງການຈີນ ເຊິ່ງວາງຢູ່ໃກ້ ກັບສະຖານທີ່ເກີດເຫດດິນເຈື່ອນ ໄດ້ລະເບີດຂຶ້ນມາອີກດ້ວຍ.
ໜັງສືພິມເປີ່ຍຈິງ ຍູດ ເດລີ ອີງປະຊາຊົນທ້ອງຖິ່ນລາຍງານວ່າ ດິນທີ່ເຈື່ອນເປັນຂອງເສຍຈາກ ໂຄງການກໍ່ສ້າງ ເຊິ່ງຖືກຂຸດຂຶ້ນມາກອງໄວ້ສູງກວ່າ 100 ແມັດ ຢູ່ຂ້າງນິຄົມອຸດສາຫະກຳຯ ເປັນເວລາ 2 ປີມາແລ້ວ.
ສ່ວນໜັງສືພິມທ້ອງຖິ່ນ ເຊິນເຈີ້ນ ສະເປຊຽວ ໂຊນ ເດລີ ອ້າງພະນັກງານພະແນກ ກວດສອບຄວາມປອດໄພຂອງເຂດ ກວາງໝິງ ໃໝ່ ລະບຸວ່າ ສາເຫດດິນເຈື່ອນມາຈາກ ກອງດິນຖືກຝົນຕົກເຮັດໃຫ້ກາຍເປັນຕົມ ແລ້ວໄຫຼເຈື່ອນລົງມາ.