ກອງປະຊຸມຄັ້ງທຳອິດຂອງລັດຖະມົນຕີ ກະຊວງການເງິນຂອງ ສປປ ລາວ ແລະ ສ.ເກົາຫຼີ ຈັດຂຶ້ນວັນທີ 10 ມັງກອນ 2014 ທີ່ໂຮງແຮມລາວພລາຊາ ນະຄອນຫຼວງວຽງຈັນ ໂດຍການເປັນປະທານຮ່ວມລະຫວ່າງ ທ່ານ ພູເພັດ ຄຳພູນວົງ ລັດຖະມົນຕີວ່າການ ກະຊວງການເງິນຂອງ ສປປ ລາວ ແລະ ທ່ານ ໂອ ໂຊກ ຮຸນ ຮອງນາຍົກລັດຖະມົນຕີ ລັດຖະມົນຕີວ່າການ ກະຊວງຍຸດທະສາດ ແລະ ການເງິນແຫ່ງ ສ.ເກົາຫຼີ.
ກອງປະຊຸມຄັ້ງນີ້ ໄດ້ແລກປ່ຽນບົດຮຽນດ້ານການພັດທະນາເສດຖະກິດ-ສົງຄົມ ກໍ່ຄືການຈັດຕັ້ງປະຕິບັດໂຄງການ ທີ່ໄດ້ຮັບການສະໜັບສະໜູນຈາກ ສ.ເກົາຫຼີ ທີ່ເຫັນໄດ້ທັງຄວາມຄືບໜ້າ ກໍ່ຄືຄວາມຫຍຸ້ງຍາກ ແລະ ສິ່ງທ້າທາຍຕ່າງໆຂອງການພັດທະນາເສດຖະກິດ-ສັງຄົມຢູ່ ສປປ ລາວ ເພື່ອເປັນຂໍ້ມູນເພີ່ມເຕີມໃຫ້ແກ່ການປຶກສາຫາລື ໃນການສ້າງຍຸດທະສາດການຮ່ວມມືດ້ານເສດຖະກິດ ລະຫວ່າງສອງປະເທດໃນຕໍ່ໜ້າ ເພື່ອປະກອບສ່ວນສະໜັບສະໜູນ ສປປ ລາວ ໃຫ້ບັນລຸຄາດໝາຍສະຫັດສະວັດດ້ານການພັດທະນາ ໃນປີ 2015 ແລະ ນຳພາປະເທດຊາດ ອອກຈາກສະຖານະດ້ອຍພັດທະນາ ໃນປີ 2020.
ທັງສອງຝ່າຍໄດ້ເປັນເອກະພາບ ແລະ ເຫັນຄວາມສຳຄັນຂອງການຮ່ວມມື ແລະ ການຊ່ວຍເຫຼືອຂອງ ສ.ເກົາຫຼີ ຕໍ່ການພັດທະນາເສດຖະກິດ-ສັງຄົມຂອງ ສປປ ລາວ ທ່ານ ພູເພັດ ຄຳພູນວົງ ໄດ້ສະແດງຄວາມຂອບໃຈຕໍ່ລັດຖະບານ ສ.ເກົາຫຼີ ກໍ່ຄືທ່ານລັດຖະມົນຕີວ່າການກະຊວງຍຸດທະສາດ ແລະ ການເງິນແຫ່ງ ສ.ເກົາຫຼີ ທີ່ໄດ້ໃຫ້ຄວາມເອົາໃຈໃສ່ ແລະ ຊຸກຍູ້ກອງທຶນຮ່ວມມືເພື່ອພັດທະນາເສດຖະກິດ (EDCF) ໃນການສະໜອງເງິນກູ້ດອກເບັ້ຍຕ່ຳໃຫ້ ສປປ ລາວ ທ່ານຍັງເຊື່ອໝັ້ນວ່າ ຜົນຂອງກອງປະຊຸມຄັ້ງທຳອິດນີ້ ຈະເປັນພື້ນຖານໃຫ້ແກ່ການພົບປະກັນຕື່ມໃນຄັ້ງຕໍ່ໆໄປ ເພື່ອແລກປ່ຽນຄວາມຄິດເຫັນ ແລະ ສົ່ງເສີມການພັດທະນາເສດຖະກິດ-ສັງຄົມຂອງ ສປປ ລາວ ກໍ່ຄືການຮ່ວມມືມິດຕະພາບລະຫວ່າງສອງປະເທດ.
ທີ່ມາ http://www.vientianemai.net/teen/khao/1/10972