ຂປລ. ລັດຖະບານ ໄດ້ຈັດຕັ້ງປະຕິບັດ ການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວ ໃຫ້ຄົນຕ່າງປະເທດ ໃນຂອບເຂດທົ່ວປະເທດ ໂດຍເລີ່ມແຕ່ວັນທີ 16 ທັນວາ 2015 ໄປຈົນເຖິງວັນທີ 16 ມີນາ 2016 ເຊິ່ງຈະໃຊ້ເວລາໃນການຈັດຕັ້ງປະຕິບັດ 3 ເດືອນ ແລະ ຄາດວ່າຈະມີຜູ້ມາຂຶ້ນທະບຽນ ບໍ່ຕໍ່າກວ່າ 30.000 ຄົນ.
ທ່ານ ພົງໄຊສັກ ອິນຖາລາດ ຫົວໜ້າກົມຄຸ້ມຄອງແຮງງານ, ກະຊວງແຮງງານ ແລະ ສະຫວັດດີການສັງຄົມ ໄດ້ຖະແຫລງຂ່າວໃຫ້ຮູ້ ໃນວັນທີ 15 ທັນວາ ນີ້ວ່າ: ເພື່ອເຮັດໃຫ້ສັງຄົມມີຄວາມເປັນລະບຽບຮຽບຮ້ອຍ ທັງເປັນການປົກປ້ອງສິດ ແລະ ຜົນປະໂຫຍດຂອງແຮງງານເຄື່ອນຍ້າຍ, ສ້າງຄວາມພ້ອມໃນການເຂົ້າເປັນປະຊາຄົມເສດຖະກິດອາຊຽນ ໃນທ້າຍປີ 2015 ລັດຖະບານຈຶ່ງໄດ້ດໍາເນີນການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວ ໃຫ້ຄົນຕ່າງປະເທດທີ່ຍັງເຄື່ອນໄຫວແບບບໍ່ຖືກຕ້ອງຢູ່ ສປປ ລາວ. ການຂຶ້ນທະບຽນຄັ້ງນີ້ ແມ່ນເພື່ອເກັບກໍາຈໍານວນຄົນຕ່າງປະເທດ ທີ່ເຄື່ອນໄຫວບໍ່ຖືກຕ້ອງວ່າມີຈໍານວນເທົ່າໃດ ແລ້ວມາແຍກໃຫ້ເຫັນ ລັກສະນະການເຄື່ອນໄຫວຂອງເຂົາເຈົ້າ ເພື່ອຈະໄດ້ມອບຄວາມຮັບຜິດຊອບ ໃຫ້ແຕ່ລະຂະແໜງການທີ່ກ່ຽວຂ້ອງຂອງລັດ ເປັນຜູ້ຄຸ້ມຄອງຕາມລະບຽບການຕໍ່ໄປ ຫລີກເວັ້ນບັນຫາຄວາມສັບສົນ ໃນການຄຸ້ມຄອງ.
ທ່ານ ພົງໄຊສັກ ອິນຖາລາດ ກ່າວຕື່ມວ່າ: ການຈັດ ຕັ້ງປະຕິບັດການຂຶ້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວ ໃຫ້ຄົນຕ່າງປະເທດນີ້ ຈະດຳເນີນໄປເປັນເວລາ 3 ເດືອນ. ສ່ວນຄ່າຂຶ້ນທະບຽນ ແມ່ນຜູ້ໜຶ່ງ 3 ແສນກີບ/ຄົນ/ເດືອນ. ຖ້າ ສິ້ນສຸດເວລາທີ່ກໍານົດ ໃຫ້ນີ້ແລ້ວແຕ່ຍັງມີຜູ້ເຄື່ອນໄຫວບໍ່ຖືກຕ້ອງ ຫລື ຍັງມີຜູ້ໃຫ້ຄວາມສະດວກແກ່ກຸ່ມຄົນດັ່ງກ່າວ ໂດຍບໍ່ມີເຫດຜົນ ທາງເຈົ້າໜ້າທີ່ກ່ຽວຂ້ອງຈະໄດ້ດໍາເນີນມາດຕະການທາງກົດໝາຍ. ດັ່ງນັ້ນຈຶ່ງຮຽກຮ້ອງມາຍັງທຸກພາກສ່ວນທີ່ກ່ຽວຂ້ອງເປັນຕົ້ນ ແມ່ນຜູ້ໃຊ້ແຮງງານ, ຊາວຕ່າງດ້າວ, ຊາວຕ່າງປະເທດ ລວມທັງປະຊາຊົນລາວ ຜູ້ໃຫ້ເຊົ່າສະຖານທີ່ເຮັດທຸລະກິດ, ຄ້າຂາຍ, ໃຫ້ເຊົ່າສະຖານທີ່ພັກພາອາ ໄສ, ໃຫ້ເຊົ່າທະບຽນວິສາຫະກິດ ແລະ ໂຄງການຕ່າງໆ ລວມທັງ ເຂດເສດຖະກິດພິເສດ ແລະ ເຂດເສດຖະກິດສະເພາະ ຈົ່ງພ້ອມກັນເຂົ້າຮ່ວມເປັນເຈົ້າການນໍາກັນ.
ແຫລ່ງຂ່າວ:
