ໂດຍ: [ ຕໍເຟືອງແຫ້ງແດດ]
“ພວກເຮົາຄວນດີໃຈ ຫຼື ຈະເສົ້າໃຈ ຫຼືບໍ່ກັບການໄດ້ເປັນແຊ້ມໃນຄັ້ງນີ້, ຫຼືວ່າເຮົາຈະຮັກສາແຊ້ມນີ້ໄວ້ຕະຫຼອດໄປບໍ່? ພວກເຮົາຈະສ້າງສັງຄົມລາວ ໃຫ້ຫຼຸດຜ່ອນ ສິ່ງມືນເມົາເຫຼົ່ານີ້ໄດ້ແນວໃດ?”
ໃນວັນທີ 28 ທັນວາ ປີ2013, ຢູ່ໃນໜ້າກະດານເວປເພສ ASEAN Community ທີ່ໄດ້ສະແດງຂໍ້ມູນກຸ່ມປະເທດສະມາຊິກອາຊຽນຕໍ່ການດື່ມເຫຼົ້າເບຍ ເຊິ່ງໃນນັ້ນປະເທດລາວເຮົາ ແມ່ນຄອງແຊ້ມນັກດຶ່ມເຫຼົ້າເບຍ! ເຫັນແລ້ວບໍ່ຮູ້ຈັກຊິເຮັດແນວໃດ ຈັກຊິດີໃຈ ຫຼື ເສຍໃຈກັນແທ້ກັບການໄດ້ແຊມນີ້ມາຄອງ.
ປີ 2013 ທີ່ຜ່ານມາໃໝ່ໆນີ້, ຂ້າພະເຈົ້າເຊື່ອວ່າຍັງມີຫຼາຍໆຄົນທີ່ຍັງເມົາຄ້າງກັບການສະຫຼອງປີ ໃໝ່ສົ່ງທ້າຍປີເກົ່າຢູ່ ຫຼື ເອີ້ນກັນວ່າ ວັນ “ຄາວດາວ” (Countdown ) ນັ້ນເອງ, ໃນການສະຫລອງຢ່າງເອົາຈິງຈັງຂອງຄົນລາວເຮົານີ້ ຈົນເຮັດໃຫ້ປະເທດລາວເຮົາກາຍເປັນສະຖິຕິໃໝ່ໃນການດື່ມຂອງມື່ນເມົາແຫ່ງກຸ່ມສະມຊິກອາຊຽນໄປແລ້ວ.
ອິງຕາມຂໍ້ມູນທີ່ສະຖິຕິທີ່ສະແດງຢູ່ເທິງ ເວປເພສ ອາຊຽນຄອມມູນິຕີ ASEAN Community ວັນທີ 28 ທັນວາ ປີ 2013, ໄດ້ຈັດລຽງລຳດັບການສົມທຽບເຄື່ອງດື່ມລະຫວ່າງນົມ ແລະ ເຫຼົ້າເບຍ ໃນກຸ່ມປະເທດສະມາຊິກອາຊຽນທີ່ມັກດື່ມຫຼາຍທີ່ສຸດໃນປີ 2013 ເຊິ່ງສະຖິຕິນັ້ນໄດ້ສະແດງລາຍລະອຽດ ຢ່າງຊັດເຈນຄື ປະລິມານໃນການດື່ມນ້ຳນົມຂອງປະເທດລາວເຮົາແມ່ນ 4,6 ລິດຕໍ່ປີ ເຊິ່ງໄດ້ຈັດເປັນປະເທດທີອັນດັບສຸດທ້າຍ ໃນ10 ປະເທດຂອງກຸ່ມອາຊຽນເຊິ່ງອັນດັບທີ 1 ນັ້ນແມ່ນປະເທດ ບູຣໄນ ແລະ ຕາມມາດ້ວຍ ປະເທດມາເລເຊຍ ມຽນມ້າ. ສ່ວນປະເທດທີ່ມີປະລິມານໃນການດື່ມ ສິ່ງມື່ນເມົາໂດຍສະເພາະເຫຼົ້າເບຍ ແມ່ນປະເທດລາວຂອງເຮົາຂຶ້ນເປັນອັນດັບທີ່ 1 ເລີຍໂດຍມີປະລິມານຂອງການດື່ມ ເຫຼົ້າແມ່ນ 7 ລິດຕໍ່ ຄົນຕໍ່ປີ ເປີເຊັນຂອງການດື່ມຂອງຜູ້ຊາຍແມ່ນ 70% ສ່ວນຜູ້ຍິງ ແມ່ນ 30 % ຕາມມາດ້ວຍໄທ ແລະ ຟີລິບປິນ, ສ່ວນປະເທດອັນດັບສຸດທ້າຍຂອງການດື່ມຂອງມື່ນເມົາແມ່ນປະເທດ ມຽນມາ ເຊິ່ງມີປະລິມານ 0.5 ລິດຕໍປີ.
ໃນເມື່ອເຫັນແບບນີ້ແລ້ວ ຈຶ່ງຖືໄດ້ວ່າເຫຼົ້້າເບຍຍັງເປັນປັດໃຈໜຶ່ງທີ່ສຳຄັນໃນການດຳລົງຊີວິດຂອງຄົນລາວ ເພາະເຫັນໄດ້ຈາກການດຳລົງຊີວິດໃນປະຈຸບັນຂອງຄົນລາວ ທີ່ຍັງໃຫ້ຄວາມສຳຄັນກັນຫຼາຍກັບການເສບດື່ນຂອງມື່ນເມົາ ໂດຍສະເພາະນັ້ນກໍ່ແມ່ນ ເຫຼົ້າ ແລະເບຍທີ່ຂາດບໍໄດ້ແທ້ໆໃນປະເພນີງານຕ່າງໆທີ່ໄດ້ຈັດຂຶ້ນ ບໍວ່າຈະເປັນງານ ສະລອງວັນເກີດ,ວັນສົ່ງທ້າຍປີເກົ່າ ວັນຕອນຮັບປີໃໝ່, ຮັບຊັ້ນຕຳແໜ່ງໃໝ່, ເງິນເດືອນອອກໃໝ່, ທ້າຍອາທິດ ແລະຍັງມີງານຕ່າງໆ ລວມໄປເຖິງງານ ວັດງານວາກໍຍັງມີ ເຫຼົ້າຢາ ສຸລາປາປີ້ງເຂົ້າໄປປົນເປນຳ, ເຊິ່ງໄດ້ກາຍເປັນປະເພນີ ງານມື່ນເມົາຂອງຄົນລາວເຮົາໄປແລ້ວໃນປະຈຸບັນ.
ພວກເຮົາຄວນດີໃຈ ຫຼື ຈະເສົ້າໃຈ ຫຼືບໍ່ກັບການໄດ້ເປັນແຊ້ມໃນຄັ້ງນີ້, ຫຼືວ່າເຮົາຈະຮັກສາແຊ້ມນີ້ໄວ້ຕະຫຼອດໄປບໍ່? ພວກເຮົາຈະສ້າງສັງຄົມລາວ ໃຫ້ຫຼຸດຜ່ອນ ສິ່ງມືນເມົາເຫຼົ່ານີ້ໄດ້ແນວໃດ? ອັນທຳອິດເຮົາກໍ່ຕ້ອງປະຕິບັດຕົນເອງ ໃຫ້ເປັນແບບຢ່າງໃຫ້ແກ່ຄົນໄວ້ໜຸ່ມເດັກນ້ອຍ ຄວນມີການຈຳກັດ ສະກັດກັ່ນກັບເຄື່ອງດື່ມທີ່ເປັນສານມື່ນເມົາ ແລະ ລວມໄປເຖິ່ງອົງກອນຕ່າງໆຄວນມີຂອບເຂດຈຳກັດໃນການສະລອງຄວນຫັນຈາກການດື່ມສິ່ງມື່ນເມົາ ຫັນມາສົ່ງເສີມເຮັດກິດຈະກຳອັນອື່ນທີ່ປາສະຈາກຈາກສິ່ງຂອງມື່ນເມົາຈະເປັນການດີ ແລະ ຖ້າຫາກບໍມີການໂຄສະນາເຫຼົ້າເບຍຕາມສະຖານທີ່ຕ່າງໆກໍຍິ່ງສະເປັນຫານດີ. ແລະ ຂໍຮຽກຮ້ອງໃຫ້ທາງ ພາກສ່ວນທີ່ກ່ຽວຂ້ອງ ຊ່ວຍພິຈາລະນາ ແລະ ກວດກາໃຫ້ແດ່. ຄວນມີກົດໝາຍຄຸ້ມຄອງການໂຄສະນາໃຫ້ເໝາະສົມ.