ສຳນັກຂ່າວຕ່າງປະເທດ ລາຍງານໃນວັນທີ 4 ທັນວານີ້ວ່າ ທ່ານ ອະເລັກຊານເດີ ໂນວັກ ລັດຖະມົນຕີວ່າການ ກະຊວງພະລັງງານ ປະເທດຣັດເຊຍ ໄດ້ເປີດເຜີຍວ່າ ຣັດເຊຍໄດ້ລະງັບ ການເຈລະຈາລະຫວ່າງ ຄະນະກຳມະການລັດຖະບານ ດ້ານການຮ່ວມມືການຄ້າ ແລະ ເສດຖະກິດຂອງຣັດເຊຍ ແລະ ຕວກກີ ຕໍ່ກັບໂຄງການ ສ້າງທໍ່ສົ່ງແກັສ ຊຶ່ງຢູ່ໃນຂັ້ນຕອນການວາງໂຄງຮ່າງແລ້ວ ອັນເປັນຜົນຈາກເຫດການ ຕວກກີຍິງເຮືອບິນສູ້ຮົບ Su-24 ຂອງຣັດເຊຍຕົກ ແລະ ເປັນສ່ວນໜຶ່ງ ໃນມາດຕະການຂວ້ຳບາດ ທີ່ລັດຖະບານຣັດເຊຍ ກຳລັງໃຊ້ເພື່ອຕອບໂຕ້ ການກະທຳຂອງຕວກກີ.
ທັງນີ້ ໂຄງການກໍ່ສ້າງທໍ່ສົ່ງແກັສ ເປັນໜຶ່ງໃນໂຄງການຂະໜາດໃຫຍ່ ທີ່ລັດຖະບານຣັດເຊຍ ແລະ ຕວກກີ ມີຈຸດປະສົງໃນການສົ່ງແກັສທຳມະຊາດ ຈາກປະເທດຣັດເຊຍ ໄປຍັງປະເທດຕວກກີ ຜ່ານທາງທະເລດຳ ແລະ ຈະສົ່ງຕໍ່ໄປຍັງເອີຣົບຕອນໃຕ້.
